2Tesaloniki 3 - Nouveau Testament en Guidar

Məzuli vimə

¹ Milmiŋgiɗwa an dəmbər naw nah sukum na: Məzuli vimə vi labara na Ɗəfdaya dətray gən gu'u, vi ɗii diiɗa də gakdakanən gəni va agəɗ annokumda.

² Məkaman Maŋgəlva, vi dəkohgəmə gən səva kuket net ɗii mbreyit dit məɗɗaŋ mambraya. Vi ɗii pak dədawtafən labara Nenek ɓa.

³ Amma Ɗəfdaya də goŋgayi. Waɓəlokum wagukum vi Satan adasbər gukum ɓa.

⁴ Vi wənna Ɗəfdayayi məsənək Goŋga nokum, məsənka munokum tatəɗɗanən an mənah sukum, ko abe bo wakəɗɗanəni.

⁵ Ɗəfdaya nam Zezu Krestu dəkpaŋgan makrokum, vi kəsbanən gən wəŋgla na Maŋgəlva də an məs aŋgələ.

Ko naway dəgəɗ wəza

⁶ Milmiŋgiɗwa mənam tatəɗi sukum wənnan də iya na Ɗəfdaya Zezu Krestu, kədawsapaŋ dit milmiŋgiɗkum mətampəlɗe ɓa, məs asbanən wən məs məɗi sukuməŋ ɓaɓa.

⁷ Kəsənənək lewlewi, va məsam annokumda, məsban an va məgəɗə, vi nam mətampəlɗe mənan ɓa.

⁸ Məzəm ɗaah way na ɗəf na mekeleŋ ɓa, say an məfaɗ akani. Məzəmək saha məyəka, məgəɗ wəza kapayək dəfəɗ pak na, vi mədaw sam dorgoŋgol sən ɗəf səmbokum ɓa.

⁹ Gesiŋ, ɗii nawrəh zəga nawzəm səvokum mənan kəta. Amma məɗɗa zəm vasna, vi wərban sukum na kəgəmən gən təlmə.

¹⁰ Daga mədaw sam də munokum, mənah sukumək na: An ɗəf aɓoŋguk daɗɗa wəza, adawzəm ɓa bo.

¹¹ Vi məpprəmək na ɗii meɓɓet tahəŋ suwalaŋkum mətampəlɗe. Aɗɗaŋ wəza ɓa samə, amma tahəŋ wətoŋgoŋ aka wən məza wənneti ɓa.

¹² Zemvit ɗii neti, mənam tatəsəɓ siti də wənah siti, də iya na Ɗəfdaya nam Zezu Krestu, say dəsokun ziti, dəɗɗaŋ wəza nawzəm neti.

¹³ Annokum nədawnah sukum milmiŋgiɗwa, kədawyaŋ daɗɗa mogon ɓa.

¹⁴ Ɗəf məs dəɓoŋ dasban an məs mənah sukum də letər namaŋka, məsəŋlani, kədawsapaŋ dəndən ɓa, say wil dədanən gəni.

¹⁵ Amma kədawlanən va məzuzel nokum ɓa, say məsəɓ sən va məlmukum.

Zəzay də wəsɗa

¹⁶ Ɗəfdaya Affən zamə dəpsukum zam nan pay pakə, də tive temtem pakə. Ɗəfdaya dəsan də munokum pakə.

¹⁷ Aŋki wəsɗa naw azokum məs nəver də vawa: Əntə Pol, vaski nəvere ndəni saydawa net letərɗe naw pakə.

¹⁸ Ɗəfdaya nam Zezu Krestu dəgəɗ sukum mbəlembəle nani.