1Yohanna 3 - Nouveau Testament en Guidar

Kirtin Maŋgəlva

¹ Muɗumon wəŋgla na Maŋgəlva aŋgələm diiɗaŋka, ayəmək na Kirtini, məs gesiŋ gesiŋ. Vini duniya dəsənəm ɓa: Dəsən Maŋgəlva ɓa'a.

² Bayneŋgiɗwa, kakaŋ na kirtin Maŋgəlva mənani, an va mədakpaŋ səɓan abe na məsən tagay ɓa. Amma məsənka pay Krestu adazan na, waməsam va ndəni, vi mulak va asani.

³ Ko naway məs dəŋgəl wəsuwa va Krestu, say duɗak də mambraya, va Krestu sən kiyən awɗak dəndən.

⁴ Ɗəf məgəɗ mambray pak asban ma henziŋ na Maŋgəlva ɓa, vi wəzla ki ma henziŋgi wəɗɗa mambraya.

⁵ Kəsənənka Zezu Krestu ade a duniya na, vi kaviyan mambray nami, nan mambray taya zan ko taka ɓa.

⁶ Amma ɗəf məs dəsler dəndən wapan wəɗɗa mambraya, amma ɗəf məzəɗɗa mambraya nan dula ɗaah ɓa, dəsən ɗaah ɓa'a.

⁷ Kirin nawa, kədapanən ɗəf wəmbəɗokum dərwa ɓa, ɗəf məzəɗɗa an təstəssə nan bo təstəssi, va Zezu Krestu asan təstəssə.

⁸ Ɗəf məzəɗɗa mambray nan ava Satanni, Satan tayəɗɗa mambray daga wətən nani. Vini Wətən Maŋgəlva* ade vi kawzan wəza na Satan.

⁹ Ko naway dəkpaŋ wətən Maŋgəlva agəɗ na mambray ɓa, vi əmpəs na Maŋgəlva tayəɗɗa wəza amkrani, asbana wəɗɗa mambray ɓa, vi Maŋgəlva yi Affəni.

¹⁰ Awla an məs duɗeket kirtin Maŋgəlva dit kirtin Satan: Ko naway məs dədaɗɗa an məs tay təstəs ɓa, walla aŋglu məlmən ɓa, nan wətən Maŋgəlvayi ɓa.

Məŋglu zukum

¹¹ Aŋki labara məs kəpprəmaŋ daga wətəŋ nani, məŋglu səm zəmə.

¹² Mədawsam va Kaynu ɓa, nan abayək məlməni. Vi mi abay di? Vi wəza məs Kaynu agəɗ mbrayeni, na məlmən mogoni.

¹³ Milmiŋgiɗwa, kəda gətaŋ an ɗii na duniya azel kumənək ɓa.

¹⁴ Məsənka məzarək səza əmta mətoŋguk adəv zeŋgille. Məsən vasna, vi məŋglu milmiŋgiɗmi. Ɗəf məzel məlməni, nan dəɓəl wəzar sətəki namta ɓa.

¹⁵ Ko naway məzu zel məlməni, məbay gəbayi, kəsənənək bo məbay gəbay arah na zeŋgille nawsan ha faɗ ɓa.

¹⁶ Də aŋki məsən wəŋgla na Zezu Krestu, aŋgələməka appanək zəni amtək vimə. Aslək nam bo məppan gən ki zem viyit milmiŋgiɗmə.

¹⁷ An ɗəf tay də arya avani, awlak məlmən tay də wəray na zəga, amma akpaŋganək gəɓan səni dəbaah sən ɓa, ya ɗəffəs tay də əŋgla na Maŋgəlva amakran sa?

¹⁸ Kirin nawa, wəŋgla nam adaw san də ma ɗəf ɗarə, walla də əpel ɗar ɓa, say dəsan də wəza də an də goŋga.

Kirin Maŋgəlva ageslne'eŋ na dawziw aban ɓa

¹⁹ Vaŋki mədaw sənən na mənam tata dəv goŋga, məgeslne na dawziw aba Maŋgəlva ɓa.

²⁰ An makram arban səmək mambray namə, məsənək na Maŋgəlva dayki makramə asənək zəga pakə.

²¹ Vaski bayneŋgiɗwa, an makram dətaw səm kita ɓa, asna wa məziw aba Maŋgəlva də wəsənən.

²² Ko mi məssoh avani amərahə vi mərmak ma henziŋ nani, mənam tatəɗɗa an məs aŋgələ.

²³ Aŋki ma henziŋ nan vani: Mətaf səm iya na Wətəni ndəni Zezu Krestu, məŋglu səm zəmə va Krestu anah səm məɗɗa gəni.

²⁴ Ɗəf məzəsban ma henziŋ na Maŋgəlva, nan asapək də Maŋgəlva, Maŋgəlva bo tay san amakrani. Maŋgəlva apsəmək əmpəs nani, dəndəni mədaw sənən na Maŋgəlva tay də mənamə.