1Tesaloniki 3 - Nouveau Testament en Guidar

¹ Vi vaski dərɓagan na məɓap kaw ɓəsən əmpa ɓa, mulak na mogoni dəppamə gən katərgəm a Ateena.

² Məslənək Timote məlməm məgəɗ wəza na Maŋgəlva də mənam də wəpel Wən Nenek na Krestu. Məslən na dəɗikum gən adəv wətaf də wəsɓokum aka wətaf nokum,

³ vi ko ɗəf taka səmbokum adamzlə sən wən tattuwãh məs dərəhəm ɓa, kəsənənka ndəni zəga nawrəh namə də wəŋgla na Maŋgəlva.

⁴ Vi vaski bo daga məsam annokumda, dabəŋ nani, mənah sukumko, nam kawzəm gəmi saha, ndəni kan dəgəɗə, kəsənənək lewlewi.

⁵ Vini nəɓap wəɓəsən ɓa nəslənək Timote, vi nəsən gən wən nataf nokum, nam mənah na kuzuŋ Satan arokokumək soko, vi wəza nam adawsan ɗar mekeleŋ ɓa.

⁶ Amma kakaŋ na, adan Timote ade səzokum, anah səmək labara na taf nokum də wəŋgla nokum, annekək zəmə. Anah səmək na: Munokumtə zəga nawla haram azan pay pakə. Də wəɗum nokum naməsa uləmə, nam bo mənam tat də wəɗum naməsa ulukum.

⁷ Vi vaski milmiŋgiɗwa, kəziweŋgək adəv wətaf nokum, ndəni asɓam adəv makram də tattuwãh namə də wəzəm saha nam pakə.

⁸ Aski kan mədasam madaramə vi məsənka munokum tat adəv wəsap də Ɗəfdaya.

⁹ Askana wəsoko məs məda gəɗ sən Maŋgəlva nam aka wən nokuməŋ agapək zəga sa? Mənam tatəgəɗ sən soko vi wənnek metiŋgin məs kəneken səmən zəm abani.

¹⁰ Dəfəɗ dəkapay pak mənam tatə sohon tive dəzəm soksoku, vi kawlukum, də wəknahan an məs dəpəl aza wətaf nokum.

¹¹ Kakaŋ na Maŋgəlva Affəm sən kiyən də Ɗəfdaya nam Zezu, dəpan səmən tive məgap gən ulukum.

¹² Ɗəfdaya dəɓay gən, əŋgla nokum, dənzlər gən əŋgla nan awalaŋ zukum də azet ɗii pakə, dəsan gən va əŋgla məs məŋgulukum.

¹³ Vi dəsɓan gən mokrokum məza vi kəziweŋ gən aba Maŋgəlva Affəmə, də mambray ɓa salala* aba Maŋgəlva Ɗəfdaya namə, pay wəziya na Ɗəfdaya nam Zezu adazani dit maslayɗe nan məs salala.