1Korintus 16 - Nouveau Testament en Guidar

Zəga nabaah sit ɗii na Maŋgəlva na Zerusalem

¹ Yo say nəməs əpel suɗike aket deleɗ məs nabaah sit ɗii na Maŋgəlva na Zerusalem. Va nənah sit kretiyenɗe na Galatiya, nokum bo məɗɗa vaska.

² Pay Alat pak ko naway dəzaɓ deleɗ suɗike va an məs arahə Məzeɓet lelewi ha pay nədazawa. Asna nan wəray tay natəŋ əkkelet əmpa ɓa.

³ Pay nədazaw na, wanəslin ɗii məs kədaweleŋ, nawka letərɗe a Zerusalem, dəkanən gən zəga nan adaka.

⁴ An zəga məs kəɗiyaŋ van agapək va zəga ka nəka gən dəvawa, asna wambataŋ də ina.

An məs Pol aɗumu

⁵ An nadaw ula kretiyenɗe annokumda na, kla Makedoniya nədaw toŋgo.

⁶ Kuzuŋ wanənzi annokumda, va wagəɗ na anəɗɗa mawala annokumda. Vasna kakəbaahaŋ suwən gən ha tər wəray naw aka tive na malaka nawa, ha atəki məs nəŋgəl əmbata.

⁷ An nədek ulukum na, nəŋgəl na əmbat gu'ləŋ ɓa. Mawaka ənziya annokumda, an Ɗəfdaya aŋgerke.

⁸ Amma wanəsaw a Efesus ha gap pay na wəzləra na Pentekosta*.

⁹ Vi nərahək sembe naɗɗa wəza metiŋgin nawtər wəray aŋka, ko də məzuzelwən asoŋ aŋ diiɗa zlaŋ.

¹⁰ An Timote adek annokumda na, mətaf mogoni vi adawsan awaloŋkum də geslne ɓa. Nan bo tay gəɗ sən wəza sən Ɗəfdaya vanawa.

¹¹ Ɗəf adawzelen ɓa. Məbaah səni vi dəgrak gən malaka nan də zamə, dəde gən azawa. Ina dit milmiŋgiɗu naŋka mənam tatə ga wəziya nani.

¹² Amma na məlməm Apollos na, məsɓanək diiɗa ka dəmbat gən annokumda dit milmiŋgiɗəm meɓɓeti. Amma aɓoŋguk dadan kakaŋka. Abe suɗike na, an arahək tive na wambatə.

Dawka an bayma də wəsɗa

¹³ Məga, məmpa tulkum adəv ətafa, məsok mokrokum, məsoŋ də sembe.

¹⁴ An məs kədaɗɗaŋ pak məɗɗa də əŋgla.

¹⁵ Milmiŋgiɗwa, kəsənənək Estefanas də gəla nani. Ndəɗaŋgəŋ ɗii məs dətafaŋ dabəŋ aka dələv na Akaya, tahəŋ əsokən zit aza wəɗɗa wəza sit ɗii na Maŋgəlva.

¹⁶ Intatə kamokum məɓe sit ɗiiyen veski, ndəɗaŋ dit məɗɗaŋ wəza pak tahəŋ wəsokən ziti.

¹⁷ Zu neki də wəziya net may Estefanas də Fortunatus gəm Akaykus. Apsuwənək an məs kərəhaŋ na əvaya, vi faraɗa kənanaŋ.

¹⁸ Affetenənək makrawa, va affetenən makrokum, məɗi kiyit ɗiiyen veski.

¹⁹ Kretiyenɗe naka dələv na Asiya pak asɗokumənka. Akilas dət Piriskilla dit məzəkkalaŋ eŋgil annetda pak asɗokumənka də iya na Ɗəfdaya.

²⁰ Milmiŋgiɗəm məs naŋ pak asɗokumənka. Məsɗan zukum də ərma zukum.

²¹ In Pol aŋki məs nəver dəvawa: Nəsɗokumko.

²² An ɗəf dəŋglu Ɗəfdaya də makran taka ɓa, wasan məray gəni! Maranata - Ɗəfdaya nam ade!

²³ Mbəlembəle na Ɗəfdaya Zezu dəsan də munokum.

²⁴ Əŋgla naw tay də munokum adəv əsap də Zezu Krestu.