Hebreo 1 - Ino sapiti Dios: bawuwa tulag

I Jesu Kristo A Abbingi Diosino Nappasapitanna

¹ Siꞌin, namipidya a aneno nepakaammuwi Dios sino gagginafutamira gafu sino nappasapitannera a gumalabbunna. E nanganganangkappayino inangwana a nipakaammu sikwara.

² Udde sito ingkein, ino Abbingngeno nappasapitanna sikwatam. Inaya Abbingnga, antuweno pinilina a namaratu si ammin, e antu kappayino pinilina a millalupat si amammin.

³ Antu kappayino pangitantam sino ammina kinalawari Dios a awana keampariyanna. Antuweno kakunnana, se amminino ana ki Dios, ana kappay sino Abbingnga. Gafu pelang sino pannakadameno sapiꞌna, tangngallanna amamminino pinaratuna. Wasin nasinduwennino inangwana a naddalus sino liwattamira, nuliyen sey langit e nattuttud sino padiwanani Dios ta makituray sikwana.

Napatiyino Abbingi Dios Amma Sino Anghelira

⁴ Antuweno nabbaliyeno Abbingi Dios si napatig amma sino anghelira. Kunna kappayino nepingngani Dios sikwana, nadayaw amma sino nganino anghelira.

⁵ Se awana nassapitani Dios si massiki sanna sino anghelira si, “Ikkeno Abbingku, e sitoya, ipakaammuk si ikkanakino Amam.” E awangkappaya nassapitanna sino anghelira si, “Ikkanakino Amam e ikkeno Abbingku.”

⁶ Wasin araꞌniyennino nanundunani Dios sino madandayawa Abbingnga sito lubag, sinapiꞌna si, “Ammingkayuwa anghelkuwera, dayawandonad.”

⁷ Kunnayawino sinapiꞌna mappeafu sino anghelira, “Ino anghelkuwera, ireno aripangkuwa dundunangkuwa pabbalingku si bayabbag anna afuy.”

⁸ Udde ino kappay sinapiꞌna sino Abbingnga, kunna si, “Ikka Dios, mattureka si makkikiyad. Naggaddangngingke ino aggangwama matturay.

⁹ Anggammuweno nalawad e kaꞌgannuweno narakkat. Antu gafuna, ikkanaka Diosnu, nepallanggattaka anna neyantotaka amma sino bafulunnuwera.”

¹⁰ E sinapiꞌna kappay sino Abbingnga si, “Sin palunguwa aw, ikka Afuweno namaratu sito lubag. Kunna kappay sino langit, ikkeno namaratu.

¹¹ Mawawanirana ammin, udde ikka, magyangka si makkikiyad. Mekunnera si barawasi a maddadan anna mapataliyan,

¹² se gumamwangino awa kappilannuwera a kunnangke tafal, e pataliyannuwera a kunnangke barawasiya ammenan meusar. Udde ikka, ammeka mangangkakwa, se awana pakkiyaranneno biyangngu.”

¹³ E awangkappay nassapitani Dios si massiki tata sino anghelira sino sinapiꞌna sino Abbingnga a kunnayaw, “Mattuttugga sito padiwanangku makkiyad si pangaffutantaka sino ammina kakalingamira a kunnangke ipiꞌnaꞌnguwera.”

¹⁴ Sanna mantuweno serbiyeno anghelira? Ireno ammena maita a masserbi ki Dios, e dundunannera a umang manuffun sino amminira a pinilina a mesalakan.