रोमी 3 - परमेश्‍वरए ताँ तमु क्युइर

¹ छ तस्‍याँ यहूदी तसि तो फायदा तइ दि? धै ज्युर चिनु लसि तो फायदा मुँ?

² ल्हें सैर चु केर फेम्! परमेश्‍वरजी ताँन् भन्दा ओंसों यहूदीमैंलाइन खीए पबित्र ताँ म्हाँदिबर पिंइ।

³ यहूदीमैं न्होंर्बै को-कोइइ खीए पबित्र बचन आक्वेंरि तो तइ दि? चमैंइ आक्वेंलै या परमेश्‍वर भर लल् खाँबन् मुँ।

⁴ ताँन् म्‍हिमैं स्‍योर्गु मुँलेया परमेश्‍वर क्ह्रोंसेंन्बै मुँ, खीजी स्योर आते। “क्‍हिजी क्ह्रोंसेंन्बै ताँ पोंमुँ, निसाफ तबै त्हेर क्‍हि ट्होगों तब्‍मुँ,” बिसि परमेश्‍वरए छ्वेर प्ह्रिइमुँ।

⁵ ङ्योइ लबै आछ्याँबै केमैंउँइँलेन् परमेश्‍वरजी लबै छ्याँबै केमैं म्हिमैंइ म्रोंम् बिस्याँ ङ्योइ तो बिब् दि? “खीए ह्रिस ङ्योए फिर उँइँमा परमेश्‍वरजी लल् आतबै के लइ!” बिब् वा? आङिं! (दिलेया म्हिमैंइ छलेन मैंल् खाँम्।)

⁶ छाबै ताँ कत्ति मैंल् आत! खी ठिक निसाफ लबै परमेश्‍वर ग! आस्याँ खीजी खैले ह्‍युलर्बै म्हिमैंए निसाफ छेनाले लल् खाँम्?

⁷ “ङइ लबै स्‍योलिबै ताँमैंइ लमा परमेश्‍वरजी ङइ योंल् त्हुबै सजैं पिंसि खीए मिं कैंडों लम् बिब सेना-सेन् ङ तले पापर च्होरिइमुँ?”

⁸ छतसि “परमेश्‍वरए छ्याँबै बानि झन् छेनाले म्रोंरिगे बिसि ङ्योइ झन् पाप लले।” बिम् रो बिसि को-कोइ म्‍हिमैंइ ङ्योए फिर स्योलिबै छ्याब् ल्‍हैदिम्। छले आगुए फिर छ्याब् ल्हैदिबै म्हिमैंइ थेबै दण्ड योंब्मुँ।

खाबज्यै या ठिक के आल

⁹ छ बिस्‍याँ अरू म्हिमैं भन्दा ङि यहूदीमैं ठिक मुँ वा? तिफुँइ आरे! तलेबिस्याँ यहूदी मुँलेया अरू ह्रेंमैं मुँलेया ताँन् म्हिमैं पापर्न मुँ बिसि ङइ ओंसों बिवाल् खाँइमुँ।

¹⁰ परमेश्‍वरए छ्वेर छले प्ह्रिइमुँ: “परमेश्‍वरए उँइँरि खाबज्यै या ठिक के आल, अँहँ ठिक के लबै म्हि घ्रि या आरे।

¹¹ खीए बारेर्बै ताँ क्‍होबै म्‍हि खाबै आरे, खीलाइ म्हैब खाबै आरे।

¹² ताँन् म्हिमैंइ आछ्याँबै घ्‍याँ क्हाइमुँ, ताँन् म्‍हिमैं केर आफेब् तइमुँ। ठिक के लब्मैं खाबै आरे, खाबज्यै ठिक के आल, अँहँ घ्रि या आरे।

¹³ चमैंइ पोंबै ताँमैं छगोंर थेंसि सइ आउबै सिनुए थाँ धों तम्। चमैंए लेइ स्‍योलिबै ताँ मत्‍त्रे पोंम्, चमैंए ताँ प्‍हुरिए बिख धों तम्।

¹⁴ चमैंए सुँइ खोंयोंन् बिलै गाल् नेरो सराप मत्‍त्रे झोंम्।

¹⁵ चमैं म्हि सैबर वारम्।

¹⁶ चमैं खनिर ह्‍यालेया म्‍हिमैंलाइ दुःख पिंसि सैब् म्‍लुब् लम्।

¹⁷ चमैंइ शान्‍तिए घ्‍याँ आसेइमुँ।

¹⁸ चमैं परमेश्‍वरने आङ्हिं।”

¹⁹ ठिमर्बै ताँ ठिम म्हाँदिब्मैंए ल्हागिर्न बिब ङिइ सेइमुँ। छतमा ताँन् ह्‍युलर्बै म्‍हिमैं परमेश्‍वरए उँइँर निसाफर रामा खाबज्‍यै या तोइ पोंबै घ्‍याँ आरे।

²⁰ छतसि ठिमर्बै ताँमैं छेनाले म्हाँदिलै या परमेश्‍वरए उँइँरि ठिक ठर्दिल् आखाँ। तलेबिस्याँ ठिमर्बै ताँउँइँलेन् म्‍हिमैंइ पाप तो जा बिसि सेम्।

परमेश्‍वरए फिर बिश्‍वास लसि म्हिमैं ठिक ठर्दिब

²¹ दिलेया तिंजोरोम् ठिम आम्हाँदिलैया खीए उँइँर म्हिमैं ठिक ठर्दिबै घ्‍याँ परमेश्‍वरजी उँइँमिंइमुँ। ठिम नेरो अगमबक्‍तामैंइ चु ताँए ग्वाइ पिंइमुँ।

²² छतमा येशू ख्रीष्‍टए फिर बिश्‍वास लब्मैं ताँनलाइ परमेश्‍वरजी ठिक ठर्दिम्। यहूदी नेरो अरू ह्रेंमैं खाबलाज्यै या खीजी आफेल।

²³ तलेबिस्याँ ताँन् म्‍हिइ पाप लइमुँ, छतसि खी ङाँर फेनेल् आखाँइमुँ।

²⁴ दिलेया परमेश्‍वरजी दयाम्हाँया लसि येशू ख्रीष्‍टउँइँले ताँन् म्हिलाइ छलेन् ठिक ठर्दिमिंइमुँ।

²⁵ म्‍हिमैंए पाप मेटिदिमिंबै घ्‍याँ येशू तरिगे बिसि परमेश्‍वरजी ख्रीष्‍ट येशूलाइ ङ्योए पापए ल्हागिर ख्रो तसि सिबर कुल्मिंइ। छतसि ङ्योए ल्हागिर ख्रो तसि येशूजी को बग्दिइ बिब म्‍हिमैंइ क्वेंस्याँ चमैं परमेश्‍वरए उँइँरि ठिक ठर्दिम्। येशू युब् भन्दा ओंसोंन् म्हिमैंइ पाप ललेया परमेश्‍वरजी ह्रिस थाँम्‍दिसि म्‍हिमैंलाइ पापए सजैं आपिंइमुँ,

²⁶ तलेबिस्याँ खीजी चमैं ङ्योने बालु खागु लइ, धै च ताँन् पापए सजैं येशूजी नोमिंइ। परमेश्‍वरजी ठिक निसाफ लमुँ धै येशूए फिर बिश्‍वास लब्मैं ताँनलाइ खीजी ठिक ठर्दिमिंम् बिसि उँइँमिंबै ल्हागिर्न खीजी छान् लइ।

²⁷ छतसि ङ्योइ तले प्हैंल् त्हुइ? प्‍हैंबै ताँ तोइ आरे। ङ्योइ ठिमइ बिब् ङिंसि परमेश्‍वरए उँइँर ठिक ठर्दिस्‍याँ प्‍हैंबै घ्याँ या तमल, दिलेया येशू ख्रीष्‍टए फिर बिश्‍वास लसि मत्‍त्रे ठिक ठर्दिबइले प्‍हैंबै ताँ तोइ आरे।

²⁸ छतसि ठिमइ बिब् म्हाँदिसि परमेश्‍वरए उँइँर ठिक ठर्दिल् आखाँ, दिलेया येशू ख्रीष्‍टए फिर बिश्‍वास लसि मत्‍त्रेन् परमेश्‍वरए उँइँरि म्‍हिमैं ठिक ठर्दिम्।

²⁹ परमेश्‍वर यहूदीमैंए परमेश्‍वर मत्‍त्रे आङिं। अरू ह्रेंमैंलैया परमेश्‍वर ग।

³⁰ तलेबिस्याँ परमेश्‍वर घ्रि मत्‍त्रे मुँ। छतसि ज्युर चिनु लबै यहूदी मुँलेया, ज्युर चिनु आलबै अरू ह्रेंमैं मुँलेया, ताँन् म्‍हिमैंइ येशू ख्रीष्‍टए फिर बिश्‍वास लसिन् मत्‍त्रे परमेश्‍वरए उँइँर ठिक ठर्दिम्।

³¹ येशू ख्रीष्‍टए फिर बिश्‍वास लसिन् मत्‍त्रे परमेश्‍वरए उँइँर ठिक ठर्दिम् बिस्याँ खीए ठिम केर आफेब तइ वा? कत्ति आत! बरु ङ्योइ खीए ठिम छेनाले म्हाँदिम्।