रोमी 15 - परमेश्वरए ताँ तमु क्युइरह्रोंसलाइ धोंले अरूलाज्यै वास्ता लले 1 ङ्यो बिश्वासर भोंसि तब्मैंइ बिश्वासर आभोंबै अलिमैंइ संका लबै ताँमैं सैदिल् त्हुम्। छलेन ङ्योइ ह्रोंस मत्त्रे सैं तोंबै केमैं लल् आत, 2 बरु ह्रोंसए अलिमैं प्रभुए फिर बिश्वास लबर भोंब तरिगे बिसि ङ्यो ताँनइ भों पिंल् त्हुम्, 3 तलेबिस्याँ ख्रीष्टज्यै या ह्रोंसए सैं तोंन् लबै केमैं आल, बरु परमेश्वरजी लद् बिबै केमैं लसिन् दुःख योंइ। छतसि “क्हिलाइ गाल् केब्मैंए गाल् ङए फिर तइमुँ,” बिसि परमेश्वरए छ्वेर प्ह्रिइमुँ: 4 ङ्योए आशालाइ बडिबर धै ङ्योए फिर तो तलेया सैदिबै भों पिंबर परमेश्वरए छ्वेर प्ह्रिबै ताँन् ताँ ङ्योलाइ लोमिंबर प्ह्रिब् ग। 5 सैदिबै भों पिंबै परमेश्वरउँइँलेन् क्हेमैं ख्रीष्टए घ्याँर प्रसि सैं घ्रिन् तबै भों योंरिगे। 6 झाइले क्हेमैं ताँनइ सैं घ्रिन् तसि कै घ्रिले, ङ्योए प्रभु येशू ख्रीष्टए आबा परमेश्वरए मिं थेब् लल् खाँरिगे। अरू ह्रेंमैंए ल्हागिरै या सैं तोंबै ताँ ग 7 येशू ख्रीष्टजी क्हेमैंलाइ म्हाँया लसि ख्वेब् धोंले परमेश्वरए थेबै मान तबै ल्हागिर क्हेमैंज्यै या घ्रिइ घ्रिलाइ म्हाँया लसि ख्वेद्। 8 तलेबिस्याँ ङ क्हेमैंने बिमुँ, यहूदीमैंए खेमैंने परमेश्वरजी फैबै बाछा पूरा लबै ल्हागिर परमेश्वर क्ह्रोंसेंन्ले भर लल् खाँब मुँ बिसि उँइँबर येशू ख्रीष्टजी यहूदीमैंलाइ ल्होमिंइ। 9 झाइले अरू ह्रेंमैंज्यै या परमेश्वरजी पिंबै ल्हयो योंसेरो खीए मिं थेब् लरिगे बिसि ख्रीष्ट युब् ग। चु ताँए बारेर परमेश्वरए छ्वेर छले प्ह्रिइमुँ, “ङइ अरू ह्रेंमैंए म्हाँजोरि क्हिए मिं थेब् लब्मुँ, झाइले क्हिए मिंर भजन प्रिंब्मुँ।” 10 छलेन मोशाइ प्ह्रिल, “ओ अरू ह्रेंमैं, परमेश्वरजी त्हाँबै म्हिमैंने क्ह्रिसि सैं तोंन्।” 11 छाबन् भजनसंग्रहर म्हि घ्रिइ बिइमुँ, “ओ अरू ह्रेंमैं, प्रभुए मिं थेब् लद्। ह्युलर्बै ताँन् ह्रेंमैं, खीए मिं थेब् लद्।” 12 झाइले यशैया अगमबक्ताज्यै या येशू ख्रीष्ट युबै बारेर छ बिल, “दाऊद म्रुँए खलकउँइँले म्हि घ्रि युब्मुँ, खीजी अरू ह्रेंर्बै म्हिमैंए फिर ग्याल्स लब्मुँ, खीए फिर अरू ह्रेंर्बै म्हिमैंइ आशा थेंब्मुँ।” 13 छतसि पबित्र प्ल्हए शक्तिजी क्हेमैंए आशा बडिमिंरिगे बिसि क्ह्रोंसेंन्बै आशा पिंबै परमेश्वरए फिर क्हेमैंइ बिश्वास लबइले क्हेमैंइ सैं तोंसि छिं ङ्हाँल् योंरिगे। पावलए मुख्य इच्छा 14 ओ ङए अलि-अङाँमैं, क्हेमैंइ छ्याँबै केमैं लरिइमुँ, धै तोन्दोंरि ताँर ह्रब् सेब् तसि घ्रिइ घ्रिलाइ छेनाले लोमिंल् खाँब्मैं तइमुँ बिसि ङइ सेइमुँ। 15 दिलेया परमेश्वरजी पिंबै थेबै दयाम्हाँयाजी लमा को-कोइ ताँमैं क्हेमैंइ अझै छेनाले च्हैंब् मैंब् लल् खाँरिगे बिसि ङइ थेबै आँट लसि चु प्ह्रिछ्या प्ह्रिइमुँ। 16 तलेबिस्याँ परमेश्वरजी ङलाइ अरू ह्रेंमैंए ल्हागिर येशू ख्रीष्टए सेवा लबै म्हि तल् पिंइमुँ। छतसि ख्रो पिंबै खेगिमैंइ परमेश्वरजी खोबै भेटि पिंब् धोंले ङइ सैं तोंबै ताँ बिमिंसि अरू ह्रेंमैंलाज्यै परमेश्वर ङाँर पमुँ। चमैंलाइ पबित्र प्ल्हजी चोखो लसि चमैं परमेश्वरजी खोबै भेटि तइमुँ। 17 छतसि येशू ख्रीष्टने घ्रिन् तसि परमेश्वरए ल्हागिर ङइ लबै के म्रोंसि ङ सैं तोंइमुँ। 18 तलेबिस्याँ अरू सैए बारेर आङिं, दिलेया येशू ख्रीष्टजी ङए छ्हउँइँले लबै केए बारेर मत्त्रे प्हैंमुँ। ङए के नेरो प्रचारउँइँले, 19 झाइले बेल्ले थेबै औदिबै चिनुमैं नेरो पबित्र प्ल्हजी पिंबै भोंउँइँले येशू ख्रीष्टजी अरू ह्रेंमैंलाइ परमेश्वरलाइ म्हाँदिल् पिंइ। चु ताँर मत्त्रे ङ क्हेमैंने बिमुँ। ङइ यरूशलेम सहरउँइँले इल्लुरिकन बिबै ह्युल समा ह्यासि खन्तोंदोंन् येशू ख्रीष्टए बारेर सैं तोंबै ताँ बिप्रइमुँ। सैं तोंबै ताँउँइँलेन् अरू ह्रेंमैंए म्हाँजोरि औदिबै (थेब्-थेबै) केमैं लमिंबइले ङ सैं तोंइमुँ। 20 ख्रीष्टए मिं या आथेबै म्हिमैं ङाँर खीउँइँले खबै सैं तोंबै ताँ बिप्रब ङए सैं मुँ। अरूइ झोंथेंबै जगए फिर धिं बेनब छ्याँब आत। छतसि अरूइ ओंसोंन् बिप्रबै क्ल्ह्यो जरे ङ बिप्रदा आङ्हाँ। 21 परमेश्वरए छ्वेर छलेन् प्ह्रिइमुँ, “खाबज्यै या परमेश्वरए बारेर था आपिंबै म्हिमैंइ खीलाइ म्रोंब्मुँ, छलेन परमेश्वरए बारेर्बै ताँ खोंयोंइ आथेब्मैंइ खीए ताँ क्होब्मुँ।” पावलइ रोमर ह्याबै सैं लब 22 ल्हें खे ङ क्हेमैं ङाँर खबै सैं लइ, दिलेया खल् आयों। 23 दिलेया तोगो चु क्ल्ह्योजरे ङइ के लल् खाँइमुँ, धै ल्हें ओंसों ओनोंन् क्हेमैंने त्होदा ङ्हाँल। 24 छतसि तारे ङ स्पेन बिबै ह्युलर ह्यासिन्मुँ, च्हमन् क्हेमैंने त्होबै आशा मुँ। चर क्हेमैंने तिस्याँदेन् बिलै संगति लदा ङ्हाँइमुँ। धै स्पेन ह्याबै ल्हागिर क्हेमैंइ ङलाइ ल्होलै ङ्हाँइमुँ। 25 दिलेया तोगो ङ यरूशलेम सहरर परमेश्वरए म्हिमैंलाइ ल्होबर ह्यासिन् मुँ। 26 तलेबिस्याँ ग्रिस नेरो म्याकेडोनिया ह्युलजरेबै बिश्वासीमैंइ यरूशलेमर्बै यहूदी ङ्हाँदु बिश्वासी अलि-अङाँमैंए ल्हागिर च्हौदे मुइ पिमिंइमुँ। 27 चु मुइ चमैंइन पिंबै सैं लब् ग। बिलन त्हुमा च ङ्हाँदुमैं ल्होल् त्हुब्मैंन् ग, तलेबिस्याँ यहूदीमैंउँइँलेन् अरू ह्रेंमैंइ सैं तोंन् लबै ताँमैं थेल् योंइ, छतसि चमैंए खि फोबर अरू ह्रेंमैंज्यै या यहूदीमैंए खाँचोर ल्होल् त्हुम्। 28 छतसि चमैंए ल्हागिर रेबै मुइ सनेसि ङ यरूशलेमउँइँले क्हेमैं ङाँर खसि स्पेन ह्युलर ह्याब्मुँ। 29 ङ क्हेमैं ङाँर खमा येशू ख्रीष्टउँइँले खबै आशिकए बारेर ङइ अझै छेनाले क्होमिंल् खाँब्मुँ बिसि ङइ सेइमुँ। 30 ओ अलि-अङाँमैं, ङ्योए प्रभु येशू ख्रीष्टउँइँले नेरो खीए प्ल्हजी पिंबै म्हाँयाजी परमेश्वरने ङए ल्हागिरि ल्हें प्राथना लमिंन् बिसि ङ यो छ्युँ लमुँ। 31 यहूदीयार्बै येशूए फिर बिश्वास आलब्मैंउँइँले परमेश्वरजी ङलाइ जोगेमिंरिगे, झाइले यरूशलेमर्बै परमेश्वरए म्हिमैंइ ङइ बोबै मुइ किंरिगे बिसि प्राथना लमिंन्। 32 झाइले परमेश्वरए इच्छा मुँस्याँ ङ यरूशलेमउँइँले क्हेमैं ङाँर सैं तोंन्लेन् खब्मुँ, झाइले ङ्यो सैं तोंन्ले बालुन् टिस्यो। 33 शान्ति पिंबै परमेश्वर क्हेमैं ताँनने तरिगे। आमेन, छान तरिगे। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.