रोमी 10 - परमेश्वरए ताँ तमु क्युइर1 ओ अलि-अङाँमैं, ङए सैं न्होंउँइँलेन् यहूदीमैंलाइ परमेश्वरजी जोगेमिंरिगे बिब ङए थेबै इच्छा मुँ, चमैंइ खोंयोंइ आखाँबै छ्ह योंरिगे बिसि ङइ परमेश्वरने प्राथना लम्। 2 चमैंइ परमेश्वरलाइ बेल्ले छेनाले म्हाँदिदा ङ्हाँमुँ बिसि ङ साक्षि पिंल् खाँम्; दिलेया खैले म्हाँदिल् त्हुम् बिसि चमैंइ आसेइमुँ। 3 परमेश्वरजी म्हिलाइ खैले ठिक ठर्दिमुँ बिब चमैंइ वास्ता आल, बरु चमैंइ ह्रोंसइ लबै धर्म-कर्मइ परमेश्वरए उँइँरि ठिक ठर्दिल् म्हैइ। छतमा चमैं परमेश्वरए उँइँर ठिक ठर्दिबै घ्याँर प्रल् आङिं। 4 तलेबिस्याँ खीए फिर बिश्वास लब्मैं ताँन् परमेश्वरए उँइँर ठिक ठर्दिरिगे बिसि ङ्योए ल्हागिर ख्रीष्टजीन् ठिमइ बिब् धोंबै के लमिंइ। ताँन् म्हिइ मुक्ति योंल् खाँम् 5 ठिमइ बिब् धोंले प्रसि परमेश्वरए उँइँर ठिक ठर्दिल् म्हैब्मैंए बारेर मोशाइ छले प्ह्रिइमुँ, “ठिमइ बिब् धोंले प्रबै म्हि सोब्मुँ।” 6 दिलेया ख्रीष्टए फिर बिश्वास लसि मत्त्रे परमेश्वरए उँइँर ठिक ठर्दिम् बिबै बारेर ठिमइ छले बिइमुँ, “क्हेमैंए सैंर ‘ख्रीष्टलाइ क्युरु पुइबर स्वर्गर खाब् ह्यामुँ?’ आबिद्। 7 छलेन ‘ख्रीष्टलाइ सिबउँइँले पखबर क्रोंर खाब् ह्याब?’ बिबै सैं या आमैंन्।” 8 बरु ठिमए ताँ चु ग, “परमेश्वरए ताँ क्हेमैंए ङाँर्न मुँ। क्हेमैंए सुँ नेरो सैं न्होंर्न मुँ।” ङिइ म्हिमैंने बिमिंबै ताँ: येशूए फिर बिश्वास लद् बिबै सैं तोंबै ताँ ग। 9 तलेबिस्याँ क्हिइ ह्रोंसए सुँइ “येशून् ङए प्रभु ग” बिसि अरूलाइ साक्षि पिंम् बिस्याँ, झाइले “परमेश्वरजी येशूलाइ सिबइले धबै सोगों लमिंइ” बिसि सैंर बिश्वास लम् बिस्याँ क्हिइ मुक्ति योंब्मुँ। 10 तलेबिस्याँ ङ्योए सैंइ बिश्वास लसिन् ङ्यो परमेश्वरए उँइँर ठिक ठर्दिम्, झाइले ङ्योए बिश्वास लबै ताँ अरूलाज्यै या बिमिंस्याँ ङ्योइ मुक्ति योंमुँ। 11 परमेश्वरए छ्वेर चु या बिइमुँ, “खीए फिर भर लब्मैं खाबै या फापिल् त्हुरिब् आरे।” 12 तलेबिस्याँ यहूदी नेरो अरू ह्रेंमैंए न्होंरि खाबै या स्यो आरे। घ्रि मत्त्रेन् परमेश्वर ताँनए प्रभु ग। खीने प्राथना लब्मैं ताँनए फिर खीजी आशिक पिंम्। 13 तलेबिस्याँ “प्रभुए मिं किंब्मैं ताँनइ मुक्ति योंब्मुँ,” बिसि परमेश्वरए छ्वेइ बिइमुँ। 14 दिलेया परमेश्वरए फिर बिश्वास आलब्मैंइ खीने खैले प्राथना लब? धै परमेश्वरए बारेर आथेब्मैंइ खीए फिर खैले बिश्वास लब? झाइले परमेश्वरए बारेर खाबज्यै आबिमिंस्याँ म्हिमैंइ खैले थेब? 15 छलेन खाबज्यै बिमिंबै म्हिमैं आकुलस्याँ चमैंइ खैले बिप्रब? “सैं तोंबै ताँ बिमिंबै म्हिमैंए प्हले कति छ्याँब,” बिसि परमेश्वरए छ्वेर प्ह्रिइमुँ। 16 दिलेया सैं तोंबै ताँ थेनाबिलेया ल्हें म्हिइ वास्था आल। छतसि “ओ प्रभु, ङिइ बिबै ताँ खाबै क्वेंइमुँ?” बिसि यशैया अगमबक्ताइ ओंसोंन् बिइमुँ। 17 सैं तोंबै ताँ थेसिन् बिश्वास खम्, धै ख्रीष्टए बारेर बिप्रबै ताँमैंन् सैं तोंबै ताँ ग। 18 बरु ङ चु ताँ ङ्योएम्: यहूदीमैंइ थेल् आयों रो वा? थेइमुँ, तले आथेब! तलेबिस्याँ परमेश्वरए छ्वेर छले प्ह्रिइमुँ: “चमैंए कै पृथ्बी तिगोंन् थेनेइमुँ, चमैंइ बिबै ताँ ह्युलए कुना-कुना समन् फेनेइमुँ।” 19 छतसि ङ चु ताँ धबै ङ्योएम्: यहूदीमैंइ चु सैं तोंबै ताँ आक्हो वा? क्होबमि क्होइ दिलेया आक्वें। ओंसों परमेश्वरजी मोशाउँइँले यहूदीमैंने छ बिल, “ङलाइ ङो आसेबै म्हिमैंउँइँलेन् ङइ क्हेमैंलाइ चमैंए फिर ह्रिस लब्मैं तल् पिंब्मुँ, तोइ आह्र आसेबै म्हिमैंउँइँलेन् ङइ क्हेमैंए त्होंदो राल् पिंब्मुँ।” 20 छलेन यशैयाइ अझै भों खल्ले अरू ह्रेंमैंए बारेर छले बिइमुँ, “ङलाइ आम्हैब्मैंइ ङलाइ योंइ, ङलाइ आम्हैब्मैंए म्हाँजोर ङ ह्रोंसन् म्रोंयुइमुँ।” 21 दिलेया इस्राएलीमैंए बारेर खीजी बिइमुँ, “ङइ बिब् आङिंब्मैं नेरो ङए बिरोधर राबै म्हिमैंए ल्हागिर ङइ त्हिंइतिमिन् यो स्योंइ।” |
© 2020, Wycliffe Bible Translators, Inc. All rights reserved.
Wycliffe Bible Translators, Inc.