भजनमैं 87 - परमेश्वरए ताँ तमु क्युइरपरमेश्वरए सहरए बारेर छ्याँब बयन लइमुँ कोरहए च्हमैंए भजन घ्रि, क्वे घ्रि। 1 याहवेहजी ह्रोंसए सहरए जग पबित्र कोंर झोंइमुँ। 2 याकूबए सन्तानमैं टिबै ताँन् क्ल्ह्योमैं भन्दा खीजी यरूशलेम सहर ल्हें म्हाँया लम्। 3 ओ परमेश्वरए सहर, क्हिए बारेर छ्याँब बयन लइमुँ। तिस्याँदे मैंन् 4 ङलाइ ङोसेबै ह्रेंमैं न्होंर ङ मिश्र नेरो बेबिलोनए बारेर बिमिंब्मुँ; धै पलिश्त, टुरोस नेरो कूश ह्युलर्बै म्हिमैंए बारेरै या “चु यरूशलेमर्न फिल!” बिसि ङ चमैं ङए म्हिमैं ठर्दिब्मुँ। 5 म्हिमैंइ सियोनए बारेर छले बिब्मुँ, “चु तान् म्हि चर्न फिल; झाइले ताँन् भन्दा थेबै परमेश्वरजीन् चलाइ भोंब लमिंब्मुँ।” 6 याहवेहजी ह्रें-ह्रेंर्बै मिं प्ह्रिमा “चुमैं ताँन् यरूशलेमर्बै म्हिमैं ग,” बिसि प्ह्रिब्मुँ। तिस्याँदे मैंन् 7 “ओ यरूशलेम, ङए ताँन् आशिकमैं योंबै क्ल्ह्यो क्हिन् ग!” बिसि चमैंइ बाजा ह्रामा क्वे प्रिंब्मुँ। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.