भजनमैं 82 - परमेश्‍वरए ताँ तमु क्युइर

आखाँब्मैं नेरो आयों आख्युब्मैं जोगेमिंन्

आसापए भजन घ्रि।

¹ स्वर्गर्बै म्हिमैंए च्होंर परमेश्‍वर टिइमुँ; देवतामैंए उँइँर खीजी निसाफ लम्:

² “खोंयों समा क्हेमैं अनिया लब्मैंए ख लरिमुँ? धै दुष्‍टमैं ङाँइन ल्हैदिरिमुँ?” बिइ। तिस्याँदे मैंन्

³ “ङ्हाँदुमैं नेरो आबा आरेब्मैंल ठिक निसाफ लमिंन्; आयों-आख्युब्मैं नेरो आगुइ क्र ओलै आपिंब्मैंए रक्षा लमिंन्।

⁴ आखाँब्मैं नेरो आयों-आख्युब्मैं जोगेमिंन्; दुष्‍टमैंए योउँइँले चमैंलाइ फ्रेमिंन्।

⁵ क्हेमैंने ज्ञान आरे, क्होल् आखाँ, क्हेमैं मिछु खैबर प्ररिम्; ठिमइ बिब् धोंले आप्र।

⁶ “क्हेमैं देवतामैं ग!” बिसि ङइ बिल। “क्हेमैं ताँन् भन्दा थेबै परमेश्‍वरए च्हमैं ग,

⁷ दिलेया म्हिमैं धोंले क्हेमैं सिब्मुँ, धै चिब्मैं धोंले क्हमैं नास तब्मुँ।”

⁸ ओ परमेश्‍वर, रेत्ति, पृथ्बीए निसाफ लमिंन्; तलेबिस्याँ ताँन् ह्रें-ह्रेंमैंए हग वाल क्हि ग।