भजनमैं 75 - परमेश्‍वरए ताँ तमु क्युइर

परमेश्‍वरजी खाबै आफेलल्‍ले निसाफ लम्

क्वे प्रिंब्मैंए चिबए ल्हागिर “नास आलद्” बिबै भाकार प्रिंबै आसापए भजन घ्रि, क्वे घ्रि।

¹ ओ परमेश्‍वर, ङिइ क्हिलाइन धन्यबाद पिंम्, क्हि ङिए चेंदो मुँ, छतसि ङिइ क्हिलाइ धन्यबाद पिंम्। क्हिजी लबै औदिबै केमैंए बयन् म्हिमैंइ लम्।

² “ङजी ठिक त्हे तोक्दिइमुँ,” बिसि परमेश्‍वरजी बिइमुँ। “च त्हेर खाबै आफेलल्‍ले ङइ निसाफ लब्मुँ,

³ पृथ्बी नेरो चर मुँबै ताँन् सैमैं त्हारलेया पृथ्बीए त्होमैं थाम्दिसि थेंब ङन् ग। तिस्याँदे मैंन्

⁴ थेब् प्हैंब्मैंने ङजी बिमुँ, ‘थेब् आप्हैंन्’, धै दुष्‍टमैंने बिमुँ, ‘क्हेमैं थेब प्हैंसि ओक्रों आतद्;

⁵ क्हेमैं स्वर्गए बिरोधर पोंसि ओक्रों आतद्; थेब् प्हैंसि आपोंन्।’”

⁶ स्याराउँइँले (पुर्वाउँइँले) मुँलेया न्हुँरउँइँले (पश्‍चिमउँइँले) मुँलेया क्यु आयोंबै क्‍ल्‍ह्‍योउँइँले मुँलेया खाबज्यै या म्हिलाइ थेब् लल् आखाँ।

⁷ दिलेया परमेश्‍वरजीन् निसाफ लमा घ्रिलाइ च्योंब लमुँ, घ्रिलाइ थेब लमुँ।

⁸ याहवेहए योर प्हेल घ्रि मुँ, खीए ह्रिसइ च प्हेलर प्लिंइमुँ। पृथ्बीर्बै दुष्‍टमैं ताँनइ दण्ड योंम्, प्हेलर मुँबै सै तोइ आचैल्‍ले चमैं थुँल् खाँल् त्हुम्।

⁹ दिलेया खीजी लबै थे-थेबै केमैंए बयन ङ खोंयोंन् बिले लब्मुँ; याकूबए परमेश्‍वरए मिं क्वेसि ङ क्वे प्रिंब्मुँ,

¹⁰ तलेबिस्याँ परमेश्‍वरजी बिइ, “ताँन् दुष्‍टमैंए भों ङइ नास लवाब्मुँ, दिलेया ठिक के लब्मैंए भों थेब लमिंब्मुँ।”