भजनमैं 63 - परमेश्वरए ताँ तमु क्युइरक्यु पिरिबै खों छिं ङ्हाँब दाऊद यहूदा ह्युलर्बै क्यु आयोंबै क्ल्ह्योर टिमा खीजी प्ह्रिबै भजन घ्रि। 1 ओ परमेश्वर, क्हि ङए परमेश्वर ग; ङए सैं न्होंइले क्हिए साँ खरिम्, क्यु आरेसि कारयाबै बाँजो क्ल्ह्योर क्यु पिब्मैंइ क्यु म्हैब् धोंले ङए ज्युइ क्हिलाइन म्हैब्मुँ। 2 पबित्र क्ल्ह्योर ङइ क्हिलाइ म्रोंइमुँ, क्हि शक्ति मुँब नेरो बेल्ले म्हारब ङइ म्रोंइ। 3 ङए ल्हागिरि क्हिए खोंयोंइ आनुबै म्हाँया छ्ह भन्दा थेब मुँ, छतसि ङए म्हदिइ क्हिए मिं थेब् लब्मुँ। 4 ङए छ्ह तिगोंन् क्हिलाइन थेब् लब्मुँ, धै क्हिए मिंर ङ ह्रोंसए यो क्वेब्मुँ। 5 लिंबै चबै सैमैं चसि म्रेंब् धोंले ङए सो छिं ङ्हाँब्मुँ, ङए सुँइ सैं तोंबै क्वेमैं प्रिंसि क्हिलाइन थेब् लब्मुँ, 6 रोबै क्ल्ह्योर ङइ क्हिलाइन मैंम्, धै म्हुँइँस तिमिंन् ङ क्हिलाइन मैंरिम्, 7 तलेबिस्याँ क्हिजी ङ ल्होमिंइमुँ, छतसि ङ क्हिए प्ह्यागोंमैंए छरि न्होंर सैं तोंसि क्वे प्रिंमुँ। 8 ङए सो क्हिए कुगु न्होंर टिरिम्; क्हिए क्योलो योजी ङ ख्वेसि जोगेमिंम्। 9 ङलाइ सैल् म्हैब्मैं बिस्याँ क्रोंर फेनेसि नास तयाब्मुँ। 10 सेलाँइ चमैंलाइ सैवाब्मुँ, धै सेलमैंए चबै सै तब्मुँ। 11 परमेश्वरजी लबै के म्रोंसि म्रुँ सैं तोंरिब्मुँ। खीए मिंर कसम चब्मैंइ खीलाइन थेब् लरिब्मुँ, दिलेया स्योर तेब्मैंए सुँ म्रुवाब्मुँ। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.