भजनमैं 5 - परमेश्‍वरए ताँ तमु क्युइर

जोगेमिंन् बिसि प्राथना लब

क्वे प्रिंब्मैंए चिबए ल्हागिर मुरलि ह्रादै दाऊदइ भजन घ्रि प्रिंब।

¹ ओ याहवेह, ङए ताँमैंर न्ह तोमिंन्; ङइ दुःख तबै सो हेंमा क्हिजी थेमिंन्।

² ओ ङए म्रुँ, ङए परमेश्‍वर, ङ क्हिनेन् प्राथना लम्, छतसि ङइ ग्वार ह्रिमा थेमिंन्।

³ ओ याहवेह, न्हाँगर्न क्हिजी ङए कै थेम्; ङइ न्हाँग फोर्न क्हिने प्राथना लसि क्हि ङाँइँले योंबै ज्वाफ ह्रेरिम्।

⁴ क्हि आछ्याँबै केर सैं तोंबै परमेश्‍वर आङिं; धै आछ्याँबै सैमैं क्हिने टिल् आखाँ।

⁵ थेब् प्हैंब्मैं क्हिए ओंसों रालन् आखाँ; आछयाँबै के लब्मैं ताँन् क्हिजी हेल लम्।

⁶ स्योर तेसि पोंब्मैं क्हिजी नास लम्; म्हि सैब्मैं नेरो लुब्मैंने याहवेह छेरम्।

⁷ दिलेया ङ बिस्याँ क्हिए खोंयोंइ आनुबै म्हाँयाइ लमा क्हिए धिं न्होंर होंल् योंब्मुँ। मान लदै ङ पबित्र क्ल्ह्‍योउँइँ तोसि क्हिलाइ फ्योब्मुँ।

⁸ ओ याहवेह, ङए शत्तुरमैं ल्हें मुँ छतसि क्हिए ठिक घ्याँर ङ डोरेमिंन्; क्हिए घ्याँ ङए ओंसों सोजो लमिंन्।

⁹ चमैंए सुँइ क्ह्रोंसेंन्बै ताँ आपों; चमैंए खों आछ्याँबै सैमैंइ प्लिंइमुँ; चमैंए म्‍लोगो थोंथेंबै छगों ग; छतसि चमैंइ फिब्लो पार्दिसि पोंम्।

¹⁰ ओ परमेश्‍वर, चमैंए दोष उँइँमिंन्; ह्रोंसइ चुबै ङोर चमैं खेंमैंन् फेरिगे; चमैंइ ल्हें अपराधमैं लइमुँ, छतसि चमैं पिवाद्, तलेबिस्याँ चमैं क्हिए बिरोधर राइमुँ।

¹¹ दिलेया क्हि ङाँइँले ग्वार योंब्मैं सैं तोंरिगे, धै चमैं खोंयोंइन सैं तोंदै क्वे प्रिंरिगे। धै क्हिए मिंलाइ म्हाँया लब्मैं क्हिनेन् सैं तोंरिगे बिसि चमैं जोगेमिंन्।

¹² तलेबिस्याँ ओ याहवेह, ठिक के लब्मैंलाइ क्हिजी आशिक पिंम्, ढालइ धोंले क्हिए म्हाँयाजी चमैं जोगेमिंब्मुँ।