भजनमैं 47 - परमेश्वरए ताँ तमु क्युइरह्युल तिगोंर्बै म्रुँ परमेश्वरन् ग क्वे प्रिंब्मैंए चिबए ल्हागिर कोरहए च्हमैंए भजन घ्रि। 1 ओ ताँन् ह्रेंमैं, योप्ल्ह ह्राद्! सैं तोंदै थेबै कै तेसि परमेश्वरए जय-जय लद्! 2 तलेबिस्याँ ताँन् भन्दा थेबै याहवेहने बेल्ले ङ्हिंल् त्हुब मुँ, पृथ्बी तिगोंर्बै थेबै म्रुँ खीन् ग। 3 खीजी ह्रें-ह्रेंर्बै म्हिमैं ङिए न्होंर पखइ, धै म्हिमैंलाइ ङिए प्हले न्होंर लमिंइ। 4 खीजी ङि याकूबए सन्तानमैं खोइमुँ, खीजी ङिए ल्हागिर टिबै ह्युल त्हाँइ, धै च ह्युल योंसि ङि सैं तोंइ। तिस्याँदे मैंन् 5 परमेश्वर कैंडो ह्यारिमा म्हिमैंइ बेल्ले सैं तोंदै खीए मिं क्वेइमुँ, छले याहवेह कैंडो ह्यामा चमैंइ थुतुरु या ह्राइ। 6 परमेश्वरए मिं थेब् लदै क्वे प्रिंन्, ङ्योए म्रुँलाइ थेब् लदै क्वे प्रिंन्, खीए मिंर क्वे प्रिंन्! 7 तलेबिस्याँ ह्युल तिगोंर्बै म्रुँ परमेश्वरन् ग; छतसि खीए मिं थेब् लबै भजन प्रिंन्। 8 ह्रें-ह्रेंमैंए फिर परमेश्वरजी ग्याल्स लमुँ; परमेश्वर ह्रोंसए पबित्र राजगद्दिर टिमुँ। 9 अब्राहामए परमेश्वरए म्हिमैंने बालु अरू ह्रेंमैंए क्रथे मिंथेमैं खागु तइमुँ। तलेबिस्याँ पृथ्बीर्बै म्रुँमैं परमेश्वरए योर्न मुँ; खी बेल्ले थेब मुँ! |
© 2020, Wycliffe Bible Translators, Inc. All rights reserved.
Wycliffe Bible Translators, Inc.