भजनमैं 46 - परमेश्वरए ताँ तमु क्युइरङ्योलाइ जोगेमिंब परमेश्वर ग क्वे प्रिंब्मैंए चिबए ल्हागिर। अलामोत बिबै भाकार प्रिंबै कोराए च्हमैंए क्वे घ्रि। 1 ङ्योए लोबै क्ल्ह्यो नेरो भों पिंब परमेश्वरन् ग, दुःख तमा युन्लेन् ङ्योलाइ ल्होमिंब खीन् ग। 2 छतसि ह्युल लालेया, मा ङ्युँइर कोंमैं तेयालेया, 3 मा ङ्युँइ घ्वा-घ्वाले ङ्हेसि पिबि थोलै या, धै च प्ल्होंखसि कोंमैं लालै या ङि ङ्हिंरिब् आरे। तिस्याँदे मैंन् 4 स्यों घ्रि मुँ, च स्योंइ ताँन् भन्दा थेबै परमेश्वरए म्हिमैं टिबै सहर नेरो खी टिबै पबित्र क्ल्ह्यो सैं तोंल् लम्। 5 परमेश्वर च सहरर मुँ; छतसि च तेयारिब् आरे; न्हाग छझँ मि छेनाले आम्रोंबर्न परमेश्वरजी च ल्होमिंब्मुँ। 6 ह्रें-ह्रेंमैं ङ्हिंसि त्हारम् धै ग्याल्समैं लायाम्; खीजी थेब कै तेमा पृथ्बी बिलेयाम्। 7 स्वर्गर्बै सेनामैंए चिब याहवेह ङ्योने बालु मुँ; ङ्योलाइ जोगेमिंबै किल्ला याकूबए परमेश्वर ग। तिस्याँदे मैंन् 8 खो, याहवेहजी लबै केमैं ङ्ह्योनेले। ह्युलर खीजी नास लबै केमैं ङ्ह्योद्। 9 ह्युलर तरिबै ल्हडें खीजी तल् आपिं; खीजी त्हलें चुवाम्, धै मेमैं कुदुकुदु लवाम्; झाइले ढालमैं मिर ख्रोंसि मेउरो लवाम्। 10 “च्याँले टिद्, धै ङ परमेश्वर ग बिसि सेद्। ह्रें-ह्रेंमैंए फिर ङ थेब् तब्मुँ, ताँन् ह्युलरै या ङन् थेब् तब्मुँ!” बिसि याहवेहजी बिम्। 11 स्वर्गर्बै सेनामैंए चिब याहवेह ङ्योने बालु मुँ; ङ्योलाइ जोगेमिंबै किल्ला याकूबए परमेश्वर ग। तिस्याँदे मैंन् |
© 2020, Wycliffe Bible Translators, Inc. All rights reserved.
Wycliffe Bible Translators, Inc.