भजनमैं 3 - परमेश्‍वरए ताँ तमु क्युइर

दाऊदइ परमेश्‍वरने ग्वार ह्रिब

ह्रोंसए च्ह अब्शालोमउँइँले न्हेयामा दाऊदइ प्ह्रिबै भजन।

¹ ओ याहवेह, ङए शत्तुरमैं बेल्‍ले ल्हें मुँ! ङए बिरोधर रेब्मैं या ल्हेंन् मुँ!

² “परमेश्‍वरजी चलाइ ल्होमिंरिब् आरे,” बिसि ङए बारेर ल्हें म्हिइ बिरिइमुँ। तिस्याँदे मैंन्

³ दिलेया ओ याहवेह, क्हि ङलाइ जोगेमिंबै ढाल ग, क्हिजी ङलाइ मान पिंम्, क्हिजी ङए क्र कैंडो लमिंम्।

⁴ ङ थेबै कैले याहवेहने ग्वार ह्रिब्रें लमुँ, धै खीजी ह्रोंसए पबित्र कोंउँइँले ङलाइ ज्वाफ पिंमुँ। तिस्याँदे मैंन्

⁵ ङ रोमा न्हरु खयामुँ, धै छोरमुँ, तलेबिस्याँ याहवेहजीन् ङ जोगेमिंम्।

⁶ ङए बिरोधर ङए कारग्युले राबै हजार च्यु शत्तुरमैंने या ङ ङ्हिंरिब् आरे।

⁷ ओ याहवेह ल्हुसे! ओ ङए परमेश्‍वर, ङलाइ जोगेमिंन्! ङए ताँन् शत्तुरमैंए क्ह्राँबोर ल्हिमिंन्; धै दुष्‍टमैंए स चोमिंन्।

⁸ क्हिए आशिकए यो क्हिए म्हिमैंए फिर तरिगे; तलेबिस्याँ याहवेहजी ह्रोंसए म्हिमैं जोगेमिंम्। तिस्याँदे मैंन्