भजनमैं 21 - परमेश्‍वरए ताँ तमु क्युइर

ट्होगों लमिंबै ल्हागिर धन्यबाद पिंब

क्वे प्रिंब्मैंए चिबए ल्हागिर दाऊदए भजन घ्रि।

¹ ओ याहवेह, क्हिजी शक्‍ति पिंबइले म्रुँ सैं तोंइमुँ। धै क्हिजी ट्होगों लमिंबइले खी बेल्‍ले सैं तोंसि उफर्दिइमुँ।

² क्हिजी म्रुँए सैंर मैंब् धों लमिंइमुँ, धै खीजी यो छ्युँ लसि ग्वार ह्रिमा क्हिजी थेमिंइमुँ। तिस्याँदे मैंन्

³ छ्याँ-छ्याँबै सैमैं पुयुसि क्हि चने त्होबर युइ, धै छ्याँबै माराए मुकुट चए क्रर कुमिंइ।

⁴ चइ क्हिने छ्ह ह्रिमा क्हिजी चलाइ खोंयोंइ आखाँबै छ्ह पिंइ।

⁵ क्हिजी ट्होंगों लमिंबइले खीए मिं थेब तइमुँ, क्हिजी चए मिं थेब् लसि म्रुँमैंइ योंब् धों तबै मान पिंइमुँ।

⁶ क्ह्रोंसेंन्ले क्हिजी चलाइ खोंयोंइ आखाँबै आशिक पिंइमुँ, धै क्हि चने तमिंबइले चए सैं खोंयोंन् बिलै तोंरिम्।

⁷ तलेबिस्याँ म्रुँइ याहवेहए फिर भर थेंम्, ताँन् भन्दा थेबै परमेश्‍वरए खोंयोंइ आनुबै म्हाँया चए फिर मुँबइले च खोंयोंइ ङ्हिंल् त्हुरिब् आरे।

⁸ क्हिए योजी ह्रोंसए ताँन् शत्तुरमैं म्हैसि पखब्मुँ, धै क्हिए शत्तुरमैं ताँन् क्हिए क्योलो योजी क्हाब्मुँ।

⁹ क्हि युबै त्हेर क्हिजी चमैं लुँरिबै मिर भ्योंवाब्मुँ, याहवेहजी ह्रोंसए ह्रिसर चमैं क्ल्ह्‍योंवाब्मुँ, धै मिइ चमैं ख्रोंवाब्मुँ।

¹⁰ क्हिजी पृथ्‍बीर चमैंए सन्तानमैं घ्रि या आचैल् लवाब्मुँ, धै चमैंए खलकमैं म्हिमैंए म्हाँजोउँइँले नास लवाब्मुँ।

¹¹ चमैंइ क्हिए बिरोधर आछ्याँबै ताँमैं मैंलेया, धै ङो चुसि क्हिए न्होह्रों लल् म्हैले या चमैंए सैंर मैंब् धों तरिब् आरे।

¹² क्हिजी त्हलेर मे थेंसि चमैं ल्हिमा चमैं लिग्याँ तोसि न्हेयाब्मुँ।

¹³ ओ याहवेह, ह्रोंसए थेबै भोंर क्हि ताँन् भन्दा थेब् तद्! क्हिए भोंजी लबै थेबै केए क्वे प्रिंदै ङि क्हिए मिं क्वेब्मुँ।