भजनमैं 19 - परमेश्‍वरए ताँ तमु क्युइर

परमेश्‍वरजी बनेबै मुर्बै सैमैंइ खीए मिं थेब् लब।

क्वे प्रिंब्मैंए चिबए ल्हागिर दाऊदए भजन घ्रि।

¹ परमेश्‍वरए छ्याँबै बयन मुइ लमुँ, खीजी बनेबै मुसारामैंइ खीए केमैं उँइँमिंम्।

² त्हिंइ ह्रोंसे चमैंइ ताँ सेम्; धै म्हुँइँस ह्रोंसे चमैंइ ज्ञानए ताँमैं उँइँमिंम्।

³ चमैंने ताँफुँमैं आरे, चमैंल क्युइ या आरे, चमैंए कै या आथे।

⁴ दिलेया चमैंए कै ह्‍युल तिगोंन् कोनिइमुँ, चमैंइ पोंबै ताँमैं ताँन् ह्‍युलर फेनेइमुँ, खीजी त्हिंयाँ टिबै ल्हागिर मुर क्ल्‍ह्‍यो घ्रि लथेंइमुँ।

⁵ च त्हिंयाँ ब्ह्‍याए जग्‍यउँइँले पैरेसि त्होंइ खबै प्ह्रेंरो धों तब् मुँ, ट्होइ खबै म्हि सैं तोंब् धोंलेन् ह्रोंसए के लबर च सैं तोंम्।

⁶ मुए छेउ घ्रिर च त्होंमुँ, धै स्युरदै अर्को छेउ समा फेनेम्। चए राबउँइँले तो सै या लोल् आखाँ।

⁷ याहवेहए ठिम खोट आरेब मुँ, च ठिमइ सैं सिब्मैंलाइ भों पिंम्। खीजी बिबै ताँमैं भर लल् खाँब मुँ, आह्र आसेब्मैंलाइ च ताँइ बुद्धि पिंम्।

⁸ याहवेहए ठिममैं ठिक मुँ, खीजी ल्हैदिबै के लइ बिस्याँ सैं तोंल् योंम्। याहवेहजी बिबै ताँमैं ठिक मुँ, च ताँमैंइ ङ्योए न्ह मि थोंमिंम्।

⁹ खीलाइ मान लद् बिबै ताँ छ्याँब मुँ, धै खोंयोंन् बिलै तरिब्मुँ। याहवेहए ठिमर्बै ताँमैं क्ह्रोंसेंन्बै मुँ, चु ताँमैं ठिक मुँ।

¹⁰ मारा भन्दा याहवेहए ताँमैं म्हैल् त्हुब मुँ, छ्याँबै मारा भन्दा झन ल्हें खीए ताँ म्हैल् त्हुम्; खीए ताँ क्वे खुदु भन्दा खुदुब् मुँ, धै न्हाँज्युउँइँले तेयुबै खुदु भन्दा च बेल्‍ले लिंब तम्।

¹¹ चु ताँमैंउँइँलेन् क्हिए केब्छैंइ तो लल् त्हुम् बिसि सेमुँ, चु ताँमैंइ बिब् धों लस्याँ थेबै इनाम योंम्।

¹² ह्रोंसइ लबै गल्तिमैं खाबइ सेल् खाँम् रो? खाबज्यै सेल् आखाँ। छतसि ङइ था आसेल्‍ले लबै गल्तिमैं क्षमा लमिंन्।

¹³ क्हिए केब्छैंइ ह्रना-ह्रन् पाप केमैं लल् आपिंन्? च सैमैंइ ङलाइ पापर च्होवाल् आखाँरिगे, छ लस्याँ ङ क्हिए उँइँर छ्याब् आरेब तब्मुँ, धै थेबै अपराधउँइँले जोगेसि ङ दोष आरेब् तब्मुँ।

¹⁴ ओ याहवेह, ङ लोबै पारा नेरो ङलाइ खामिंबै परमेश्‍वर, ङए सुँउँइँले त्होंबै ताँफुँमैं नेरो ङए सैंर मैंबै ताँमैं क्हिए उँइँर छ्याँब तरिगे।