भजनमैं 146 - परमेश्‍वरए ताँ तमु क्युइर

ह्‍युलर्बै क्रथेमैंए फिर भर आथेंन्

¹ हल्‍लेलूयाह! ओ ङए सो, याहवेहए मिं थेब् लद्!

² ङए छ्ह तिगोंन् ङ याहवेहए मिं थेब् लब्मुँ, छ्ह तिगोंन् ङ परमेश्‍वरए क्वेमैं प्रिंरिब्मुँ।

³ क्रथे मिंथेमैं नेरो सिल् त्हुबै म्हिमैंए फिर भर आथेंन्, तलेबिस्याँ चमैंइ जोगेमिंल् आखाँ।

⁴ चमैंइ सो पिमा चमैं सर कोंयाम्, च त्हिंइर्न चमैंए चाँजोमैं या नुयाम्।

⁵ याकूबए परमेश्‍वरजी ल्होमिंबै म्हिइ आशिक योंम्, ह्रोंसए याहवेह परमेश्‍वरने चइ आशा लम्।

⁶ स्वर्ग, पृथ्बी, मा ङ्युँइ, नेरो चर मुँबै तोंन्दोरि सैमैं खीजी बनेइ, खी खोंयोंन् बिलै भर लल् खाँब मुँ;

⁷ आगुइ क्र ओलै आपिंब्मैंलाइ याहवेहजी ठिक निसाफ लमुँ, खीजी फो ख्रेंब्मैंलाइ चल् पिंमुँ। याहवेहजी कैदिमैं बैरु तेमिंम्,

⁸ याहवेहजी मि आम्रोंब्मैंए मि थोंमिंम्। ल्हिबै ति नोसि ओलै आखाँब्मैंलाइ याहवेहजी रेमिंम्, याहवेहजी ठिक के लब्मैं म्हाँया लम्।

⁹ अरू ह्‍युलउँइँले खबै तोइ आरेब्मैं याहवेहजी रक्षा लम्, आबा-आमा आरेब्मैं नेरो म्हरेस्योमैं खीजी ल्होमिंम्, दिलेया दुष्‍ट म्हिमैंए चाँजो खीजी फुवाम्।

¹⁰ याहवेहजी खोंयोंन् बिलै ग्याल्स लब्मुँ, ओ सियोन, क्हिए परमेश्‍वरजी पुस्ता-पुस्ता समा ग्याल्स लब्मुँ। हल्‍लेलूयाह! याहवेहए मिं क्वेद्!