भजनमैं 140 - परमेश्‍वरए ताँ तमु क्युइर

ओ याहवेह दुष्‍ट म्हिमैंउँइँले ङ फ्रेमिंनु

क्वे प्रिंबै चिबए ल्हागिर दाऊदए भजन घ्रि।

¹ ओ याहवेह, दुष्‍टमैंउँइँले ङ फ्रेमिंनु। म्हिसैमैंउँइँले ङ जोगेमिंन्।

² चमैंइ ह्रोंसए खोंर आछ्याँबै चाँजोमैं लम्, धै त्हिंइ ह्रोंसे नेबै के लम्।

³ प्हुरिइ च्हिब् धोंले चमैंए लेइ नल् लम्, चमैंए सुँर प्हुरिए म्येकैं ल्हें तम्। तिस्याँदे मैंन्

⁴ ओ याहवेह, दुष्‍टमैंए योउँइँले ङ जोगेमिंन्, म्हिसैमैंउँइँले ङ रक्षा लमिंन्, ङए प्हले थुरवाबै चाँजो चमैंइ लइमुँ।

⁵ थेब् प्हैंबै म्हिमैंइ ङए ल्हागिर ङो चुइमुँ, चमैंइ ह्रोंसए जालए छो च्योइमुँ, धै ङ प्रबै घ्याँर ङो चुइमुँ। तिस्याँदे मैंन्

⁶ ओ याहवेह, ङ क्हिने बिमुँ, “क्हि ङए परमेश्‍वर ग!” ओ याहवेह, ङइ ग्वार ह्रिब थेमिंनु!

⁷ ओ याहवेह, ङलाइ जोगेमिंबै शक्ति मुँबै परमेश्‍वर, ल्हडें तबै त्हिंइर क्हिजी ङए क्र जोगेमिंमुँ।

⁸ ओ याहवेह, दुष्‍टमैंए सैंर मैंब योल् आपिंनु, चमैंइ लबै चाँजोमैं फुवाद्, आस्याँ चमैं थेब् प्हैंब्मुँ। तिस्याँदे मैंन्

⁹ ङलाइ घेर्दिब्मैंए क्रए फिर चमैंए सुँइ पोंबै आछ्याँबै ताँइन हुवारिगे!

¹⁰ लुँरिबै मिए राब चमैंए फिर उँयारिगे! बेल्‍ले लुँरिबै मिर चमैं भ्योंवारिगे, धै रेलै आखाँन्ले चमैं हिल् मुँबै होल्दोंर तेयारिगे!

¹¹ आगुलाइ स्यारब्मैं चु ह्‍युलर टिल् आयोंरिगे, म्हिसैमैं युनन् नास तबर फेरिगे!

¹² आगुइ क्र ओलै आपिंब्मैंए ख लसि याहवेहजी मुद्दा नेमिंम्, धै ङ्हाँदुमैंए ठिक निसाफ लमिंब्मुँ बिसि ङ सेइमुँ।

¹³ क्ह्रोंसेन ठिक के लब्मैंइ क्हिए मिंलाइ थेब लब्मुँ, झाइले सोजो म्हिमैं क्हिए उँइँर टिब्मुँ।