भजनमैं 133 - परमेश्‍वरए ताँ तमु क्युइर

आघें-अलिमैं क्ह्रिसि टिब

कैंडो क्रेबै त्हेए ल्हागिर दाऊदइ प्ह्रिबै क्वे घ्रि

¹ थेद्, आघें-अलिमैं क्ह्रिसि टिब बेल्‍ले छ्याँबै सैं तोंबै ताँ ग!

² सै ल्हें फेबै छ्युगु हारूनए क्रर युमिंब् धोंब चु तम्। च छ्युगु हारूनए दाह्रि समा युम्, चए क्वेंए ङाँ समा फेनेम्।

³ हेर्मोन बिबै कोंर्बै शीत धोंन् च छ्याँब तम्! च शीत सियोनर्बै कोंमैंर युम्। चर्न खोंयोंइ आखाँबै छ्ह योंबै आशिक युरिगे बिसि याहवेहजी बिइमुँ।