भजनमैं 129 - परमेश्‍वरए ताँ तमु क्युइर

ङ कोलो मुँब् ओंनोन् चमैंइ ङए फिर ल्हें खे दुःख पिंइमुँ

कैंडो क्रेबै त्हेर्बै क्वे

¹ “ङ कोलो मुँब् ओंनोन् चमैंइ ङए फिर ल्हें खे दुःख पिंइमुँ!”

² “ङ कोलो मुँब् ओंनोन् चमैंइ ङए फिर ल्हें खे दुःख पिंइमुँ। दिलेया चमैंइ ङलाइ ट्होल् आखाँइमुँ।

³ क्ल्याछैंमैंइ ङए क्होर क्ल्योइ; चमैंइ खेंमैंए क्होरए फलिइ ङए क्हो तिगोंन् क्ल्योइ।

⁴ दिलेया याहवेहजी ठिक निसाफ लमुँ; छतसि खीजी दुष्‍टमैंए योउँइँले ङ फ्रेमिंइमुँ।”

⁵ सियोन म्रोंसि छेरब्मैं ताँन् फापिल् त्हुरिगे धै लिग्याँइ स्योयारिगे!

⁶ धिं फिर्बै छि धोंन् चमैं तब्मुँ! फारब् भन्दा ओंसोंन् च ङ्योंलोंयाब्मुँ।

⁷ छि खैंमा च मुठ्ठि घ्रि या तल् आखाँ, धै प्हैं फैमा च आङ्लो घ्रि या तल् आखाँ।

⁸ “याहवेहए आशिक क्हिए फिर तरिगे! याहवेहए मिंर ङिइ क्हिलाइ आशिक पिंम्!” बिसि च घ्याँ तसि ह्‍याब्मैंइ आबि।