भजनमैं 124 - परमेश्‍वरए ताँ तमु क्युइर

याहवेहजी ङ्योलाइ ल्होमिंम्

कैंडो क्रेबै त्हेए ल्हागिर दाऊदइ प्ह्रिबै क्‍वे।

¹ “याहवेह ङ्योने बालु आरेस्याँ!” इस्राएलीमैंइ बिरिगे।

² “याहवेह ङ्योने आरेस्याँ म्हिमैंइ सैल् म्हैबै त्हेरि

³ चमैंए ह्रिंस ङिए फिर मि धोंले लुँमा चमैंइ ङि सोगोंन् क्ल्ह्‍योंवामल।

⁴ प्ल्होंखबै बाढिइ धोंले चमैंइ ङि गास घ्रिन् लवामल; धै प्हलें ङिए फिर प्रमल;

⁵ प्ल्हों खबै बाढिइ ङि नोइ बोयामल।”

⁶ याहवेहजी शत्तुरमैंए योउँइँले ङ्योलाइ सिल् आपिं। छतसि खीए मिं थेब् तरिगे!

⁷ नमे सैइ प्रबै म्हिइ चुबै ङोउँइँले नमे स्योरब् धोंले ङि स्योर खइमुँ; चमैंए जाल ट्होयाइ, धै ङि त्होंल् योंइ!

⁸ स्वर्ग नेरो पृथ्बी बनेबै याहवेहए मिंर ङ्योइ ग्वार योंम्।