भजनमैं 115 - परमेश्वरए ताँ तमु क्युइरक्हिए मिं थेब तरिगे 1 ओ याहवेह, क्हि खोंयोंइ आनुबै म्हाँया लब नेरो भर लल् खाँबै परमेश्वर ग! छतसि ङिलाइ आङिं, दिलेया क्हिलाइन मान तरिगे। 2 “चमैंए परमेश्वर खनिर मुँ?” बिसि अरू ह्रेंमैंइ तले बिमुँ? 3 ङिए परमेश्वर स्वर्गर मुँ; खीजी तो लदा ङ्हाँमुँ चन् लम्। 4 दिलेया चमैंए कुमैं मारा नेरो चाँदिबै मत्त्रे ग, म्हिमैंए योइ च कुमैं बनेइमुँ। 5 चमैंल सुँ मुँ, दिलेया पोंल् आखाँ; मि मुँ, दिलेया म्रोंल् आखाँ। 6 चमैंल न्ह मुँ, दिलेया थेल् आखाँ; नखु मुँ, दिलेया थाँ नाँल् आखाँ। 7 चमैंल यो मुँ, दिलेया छुइल् आखाँ; प्हले मुँ, दिलेया प्रल् आखाँ; धै चमैंए म्लोगोउँइँले कै त्होंल् आखाँ। 8 छतसि चमैंलाइ बनेब्मैं या चमैं धोंन् तब्मुँ; चमैंए फिर भर थेंब्मैं या छाबन् तब्मुँ। 9 ओ इस्राएलए सन्तानमैं, याहवेहए फिर भर थेंन्! क्हेमैंलाइ ल्होब नेरो जोगेब खीन् ग। 10 ओ हारूनए सन्तान, याहवेहए फिर भर थेंन्! क्हेमैंलाइ ल्होब नेरो जोगेब खीन् ग। 11 ओ याहवेहलाइ मान लब्मैं, याहवेहए फिर भर थेंन्! क्हेमैंलाइ ल्होब नेरो जोगेब खीन् ग। 12 याहवेहजी ङ्योलाइ मैंरिइमुँ; धै ङ्योए फिर आशिक पिंब्मुँ; इस्राएलए सन्तानलाइ खीजी आशिक पिंब्मुँ; हारूनए सन्तानलाइ खीजी आशिक पिंब्मुँ; 13 याहवेहलाइ मान लब्मैं थेब च्योंब ताँनलाइ, खीजी आशिक पिंब्मुँ। 14 याहवेहजी क्हेमैंलाइ ल्हें लमिंरिगे, क्हमैं नेरो क्हेमैंए सन्तानलाइ ल्हें लमिंरिगे। 15 स्वर्क नेरो पृथ्बी बनेबै याहवेहउँइँले क्हेमैंइ आशिक योंरिगे! 16 स्वर्ग याहवेहलन् ग, दिलेया पृथ्बी बिस्याँ खीजी म्हिमैंलाइ पिंइमुँ। 17 सियाब्मैंइ याहवेहए मिं थेब आल, क्रोंर ह्याब्मैंइ खीए मिं थेब आल। 18 दिलेया ङिम् तोगोउँइँले खोंयोंन् बिलै याहवेहलाइ मिं थेब लब्मुँ। याहवेहए मिं थेब लद्! |
© 2020, Wycliffe Bible Translators, Inc. All rights reserved.
Wycliffe Bible Translators, Inc.