भजनमैं 110 - परमेश्वरए ताँ तमु क्युइरङए क्योलोउँइँ टिद् दाऊदए भजन घ्रि। 1 “ङइ क्हिए शत्तुरमैं क्हिए प्हले न्होंर आप्लेन् समा क्हि ङए क्योलोउँइँ टिद्,” बिसि याहवेहजी ङए प्रभुने बिइमुँ। 2 “क्हिजी भोंन्ले ग्याल्स लब सियोनउँइँले ल्हें क्ल्ह्योर फेनेरिगे,” बिसि याहवेहजी क्हिलाइ हग पिंब्मुँ। “क्हिए शत्तुरमैंए फिर क्ल्हे लद्! 3 क्हिजी नेल् त्हुबै त्हिंइर क्हिए म्हिमैं खेंमैंए सैंइ मैंसि नेबै ल्हागिर न्हागर्न खब्मुँ। न्हाँगर्बै शीत धोंले क्हिए फ्रेंसिमैं सियोनए पबित्र कोंमैंर क्हि ङाँर खब्मुँ।” 4 “मल्किसेदेकए पदरि क्हि खोंयोंन् बिलै खेगि तब्मुँ,” बिसि याहवेहजी कसम चइमुँ। खीए सैं फेर्दिरिब् आरे। 5 ओ याहवेह, ङए प्रभु अधिकार किंसि क्हिए क्योलोउँइँ टिम्; ह्रिस खबै त्हेर खीजी म्रुँमैं त्हुलफुँ लवाब्मुँ। 6 खीजी ह्रें-ह्रेंमैंए निसाफ लमा ल्हें सिनुमैं खागु लब्मुँ; धै पृथ्बी तिगोंर्बै म्रुँमैं त्हुलफुँ लवाब्मुँ। 7 खी म्रुँ तसि ग्याल्स लबै अधिकार योंब्मुँ; छले खी भोंब तसि शत्तुरमैंए फिर ट्होगों तब्मुँ। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.