भजनमैं 100 - परमेश्‍वरए ताँ तमु क्युइर

खीए म्हाँया खोंयोंन् बिलै तरिम्

धन्यबाद पिंबै भजन घ्रि।

¹ ओ ताँन् ह्‍युलर्बै म्हिमैं याहवेहए मिंर सैं तोंदै कै तेसि ओरद्!

² सैं तोंदै याहवेह फ्योद्! सैं तोंबै क्वे प्रिंसि खीए उँइँर खो!

³ याहवेहन् परमेश्‍वर ग बिसि सेद्! खीजीन् ङ्योलाइ खीए म्हिमैं तल् पिंइ, ङ्यो खीलन् ग, छतसि ङ्यो खीए म्हिमैं नेरो खीए खर्गर्बै क्युमैं ग।

⁴ धन्यबाद पिंदै खीए तगरउँइँले न्होंर होंन्, धै खीए मिं क्वेदै खीए ह्‍युमैंर ह्‍याद्! धै खीए मिं थेब् लदै धन्यबाद पिंन्,

⁵ तलेबिस्याँ याहवेह स्वाब मुँ, खीए म्हाँया खोंयोंन् बिलै तरिमुँ, पुस्ता-पुस्ता समान् खीए फिर ङ्योइ भर लल् खाँम्।