हितोपदेश 8 - परमेश्‍वरए ताँ तमु क्युइर

बुद्धिइ बिबै ताँमैं

¹ बुद्धिइ थेबै कैले हुइरिमुँ! च्हैंब्-मैंब् लल् खाँबै शक्तिइ थेबै कै तेइमुँ!

² घ्याँ रेजरे, घ्याँ त्हुँजे जरे खन्तोदोंन् बुद्धि राम्;

³ सहर न्होंर होंबै मुल गेट जरे छ बिदै बुद्धि ओरम्:

⁴ “ओ म्हिमैं, ङ ङाँइ खो, ङइ बिबै बुद्धिए ताँमैं क्हेमैंए ल्हागिर्न ग।

⁵ ओ बुद्धि आरेब्मैं, बुद्धि म्हैद्; ओ आमादुमैं, च्हैंब्-मैंब् लल् खाँब्मैं तद्।

⁶ थेद्, ङइ पोंबै ताँमैं क्हेमैंए ल्हागिर केर फेम्, ङइ ठिक ताँ मत्त्रे पोंम्,

⁷ ङए सुँइ क्ह्रोंसेंन्बै ताँ पोंम्; स्योलिबै ताँमैं ङइ आखो।

⁸ ङइ सुँउँइँ ठिक ताँ मत्त्रे पोंम्, ङइ पोंबै ताँर छलु म्हिलु आत।

⁹ च्हैंब् मैंब् लल् खाँबै म्हिए ल्हागिर च छ्याँब मुँ, ज्ञान मुँबै म्हिए ल्हागिर च ठिक मुँ।

¹⁰ चाँदि भन्दा ङए अर्ति थेद्, छ्याँबै मारा भन्दा ङए ज्ञान म्हैद्,

¹¹ तलेबिस्याँ हिरा-मोति भन्दा बुद्धि ठिक मुँ, क्हिइ म्हैबै छ्याँ-छ्याँबै सैमैं बुद्धिने च्हैंल् आखाँ।

¹² “ङ बुद्धि ग, ङइ तोंन्दरि सै ह्रइमुँ सेइमुँ, ङने ज्ञान नेरो च्हैंब्-मैंबै शक्‍ति मुँ।

¹³ याहवेहलाइ म्हाँदिब आछ्याँबै के-ति पिब् ग। थेब् प्हैंब, शेखि लब, आछ्याँब् मैंब नेरो स्योलिबै ताँ पोंब्मैंलाइ ङइ आखो।

¹⁴ छ्याँबै सल्‍ला नेरो ठिक बुद्धि ङउँइँलेन् खम्, ङने क्होल् खाँबै शक्‍ति नेरो भों मुँ।

¹⁵ ङउँइँले बुद्धि योंसि म्रुँमैइ ग्याल्स लमुँ, धै क्रथे मिथेमैंइ ठिक ठिम बनेम्;

¹⁶ ङउँइँले बुद्धि योंसि क्रथे मिथेमैं नेरो ह्‍युलर्बै ताँन् थेबै म्हिमैंइ ग्याल्स लम्।

¹⁷ ङलाइ म्हाँया लब्मैंने ङइ म्हाँया लम्, धै ङलाइ म्हैब्मैंइ ङने त्होब्मुँ।

¹⁸ मान, इजेत सै न्होर नेरो ठिक के ङने मुँ।

¹⁹ ङ ङाँइले योंबै बुद्धि छ्याँबै मारा भन्दा या छ्याँब, नेरो चाँदि भन्दा सब मुँ।

²⁰ ङ ठिक घ्याँर प्रम्, धै ठिक निसाफ लम्,

²¹ ङलाइ म्हाँया लब्मैंलाइ ङइ ल्हें सै न्होरमैं लमिंब्मुँ, धै चमैंए भकारि प्लिंमिंब्मुँ।

²² “याहवेहजी ह्‍युल बनेब् भन्दा ओंसोंन् ङलाइ बनेइ, खीजी बनेबै सैमैं भन्दा ओंसों-ओंनोंन् बुद्धि मुँल।

²³ पृथ्बी बनेब् भन्दा ओंसोंन्, ङलाइ बनेइ।

²⁴ ङ भन्दा ओंसों, मा ङ्युँइ, स्योंमैं तोइ आरेल।

²⁵ खीजी क्लिंकाँमैं थेंब् भन्दा ओंसों, धै थे-थेबै कोंमैं बनेब् भन्दा ओंसोंन् ङ मुँल।

²⁶ खीजी पृथ्बी नेरो स युँमा, सिं धुँमैं बनेब् भन्दा ओंसोंन ङ मुल।

²⁷ खीजी पृथ्बीए फिर मु थेंमा, मा ङ्युँइए कारग्युले बार थोमा ङ चर्न मुँल।

²⁸ खीजी न्हाँम्स्योमैं मुर थेंमा, थेबै मा ङ्युँइर ह्‍याबै क्युए मुल्मैं त्होंमिंमा,

²⁹ क्युमैं खीजी बिब् भन्दा बैरु आह्‍यारिगे बिसि मा ङ्युँइर साँद थेंमा, खीजी पृथ्बीए जग झोंमा,

³⁰ सिपालु म्हि घ्रि धोंले ङ खीने मुँल। त्हिंइ ह्रोंसे ङ सैं तोंरिमल, खीए उँइँर ङ खोंयोंइन आनन्द तरिमल।

³¹ खीजी बनेबै ह्‍युल म्रोंसि आनन्द तदै ताँन् म्हिमैंने ङ सैं तोंरिमल।

³² “ओ ङए च्हमैं, तारे ङए ताँ थेद्; ङए घ्याँर प्रब्मैंइ आशिक योंब्मुँ।

³³ ङए अर्थि थेदु धै ह्रब्-सेब् तदु, च हेल आलद्।

³⁴ ङए ताँ थेबै म्हिइ आशिक योंम्, चइ त्हिं ह्रोंसे ङए म्राउँइँन ङ्‍होरिमुँ, धै ङए म्रार पैंरिम्।

³⁵ तलेबिस्याँ खाबइ ङलाइ त्होमुँ, चइ छ्ह योंम् धै याहवेहजी चए फिर ल्हयो खम्।

³⁶ दिलेया ङने त्होल् आम्हैबै म्हिइ ह्रोंसलाइन नास लम्; ङलाइ हेल लबै म्हिइ कालने म्हाँया लम्।”