हितोपदेश 26 - परमेश्वरए ताँ तमु क्युइर1 ख्वालबै त्हेर क्लिं युब नेरो बालि खैंबै त्हेर नाँ त्हिंब् आङ्हेब् धोंले, आमादुइ मान योंब आङ्हें। 2 प्हुरियाबै कोल्मे नेरो आतुरले प्हुरियाबै चिब्लि नमे धोंले, तोनतोर्न झोंबै सराप आल्हैदि। 3 घोडालाइ कोर्रा, गधालाइ लगाम झोंब् धोंले, आमादुए क्होर प्हरेइ प्रिंल् त्हुम्। 4 आमादुइ पोंब् अनुसार्बै जवाफ चलाइ आपिंन्, आस्याँ क्हिइ या च धोंबन् तब्मुँ। 5 आमादुने पोंब् अनुसार्बै जवाफ चलाइ पिंन्, आस्याँ चइ ह्रोंसन् ह्रब् सेब् तब् मैंम्। 6 आमादुने सँउँसर कुलबै म्हिइ ह्रोंसए प्हलेर तइ ल्हिसि ह्रोंसए न्होह्रों लब् धों तब् ग। 7 आमादुइ झोंबै अहान डुड म्हिए प्हले स्याले तब् धों ग। 8 आमादुलाइ मान लब घुँयात्रोर युँमा फैब् धों ग। 9 आमादुइ झोंबै अहान प्हाकोए योर पुजुइ म्लुब् धों तब् ग। 10 आमादुमैं नेरो घ्याँर प्ररिबै म्हिलाइ केर ल्हैदिब मेत्हले छेबै म्हिइ खनि तमुँ छाइन मे ल्हिसि घा-घा लब् धों ग। 11 नगिइ ह्रोंसए रुइ चबर एसि ह्यामुँ छलेन बुद्धि आरेबै म्हिइ बुद्धि आरेबै कमैं लब्रें लम्। 12 ह्रोंसन् ह्रब्-सेब् ग बिसि प्हैंबै म्हि म्रोंइमुँ वा? छाबै म्हि भन्दा बरु आमादुए फिर आशा थेंल् खाँम्। 13 “घ्याँर सिंह मुँ! ङ्हिंन् तबै सिंहमैं घ्याँजरे मुँ!” बिसि प्ल्हेगु म्हिइ बिम्। 14 कब्जार म्रा छाइ-छुइ तब् धोंले, प्ल्हेगु म्हि खाडर क्याइ-माइ प्लिंरिम्। 15 प्ल्हेगुइ थलिर्न यो थेंरिमुँ, सुँर यो बोबै या छोरों ङ्हाँम्। 16 च्हैंसि मैंसि पोंबै म्हि ङि भन्दा प्ल्हेगुइ ह्रोंसन् ह्रब्-सेब् ङ्हाँम्। 17 आगुए आक्ह्रिबै ताँर यो झोंबै म्हि नेरो घ्याँजरे प्ररिबै नगिए न्हमेर क्हाबै म्हि धों तब् ग। 18 ह्रोंसए ङ्हेब् टहुब्मैंलाइ धोका पिंल् खाँबै लिउँइँ “ङइ स्यो-स्योलिर्न लब् ग!” बिबै म्हि 19 मिग्लु अथवा मेत्हलेइ खनि तमुँ छाइन ल्हिप्रबै म्हि धों तब् ग। 20 सिं आरेस्याँ मि सियाम्, ताँ स्यारब्मैं आरेस्याँ प्होंब-कैब म्हयाम्। 21 मि भुराए ल्हागिर क्रोफुँ धै मिए ल्हागिर सिं चैदिब् धोंलेन् प्होंगि मिबै म्हिइ प्होंब्-कैब् मचैम्। 22 ताँ प्ह्रेबै म्हिए ताँमैं लिंबै चबै सैमैं धों तम्; धै छाबै ताँमैं म्हिइ न्ह क्रोंले थेम्। 23 सए भाडोर चाँदिइ म्होरब् धोंले दुष्ट म्हिमैंइ सुँइ मत्त्रे छ्याँब् लम्। 24 छलु म्हिलु लबै म्हिइ ह्रोंसइ न्होह्रों ललैया आलब् धोंलेन् पोंम्; दिलेया छलु म्हिलु लब चइ आपि। 25 छाबै म्हिमैंइ छ्याँबै ताँमैं पोंलेया आक्वेंन्, तलेबिस्याँ चए सैंर छलु म्हिलु लबै ताँमैं मत्त्रे तम्। 26 ह्रोंसइ लबै छलु म्हिलुए केमैं खाबज्यै आसेइमुँ ङ्हाँलैया चइ लबै छलु म्हिलुए केमैं ताँन् म्हिमैंइ सेब्मुँ। 27 छतसि आगु पायारिगे बिसि ताबै होंल्दोंर ह्रोंसन् पायाब्मुँ, छलेन आगु सियारिगे बिसि युँमा क्हुरमिंमा च युँमा ह्रोंसए फिर्न तेयुब्मुँ। 28 स्योलिबै ताँ पोंबै म्हिइ ह्रोंसइ पोंबै ताँइ सैं नल् लबै म्हिलाइन हेल् लम्, धै सुँइ मत्त्रे छ्याँब लबै म्हिइ न्होह्रों लम्। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.