हितोपदेश 22 - परमेश्वरए ताँ तमु क्युइर1 ल्हें सै न्होरमैं भन्दा बरु छ्याँब के लसि मिं कालिदिब छ्याँब् ग, मारा-चाँदि भन्दा बरु इजेत योंब छ्याँब् ग। 2 प्लब्मैं नेरो ङ्हाँदुमैं खाबै स्यो आरे, तलेबिस्याँ चमैं ङ्हिंन-ङ्हिंन् याहवेहजीन् बनेब् ग। 3 बुद्धि मुँबै म्हिइ ह्रोंसए फिर दुःख खब ओंसोंन् म्रोंसि लोबै क्ल्ह्यो म्हैम्, दिलेया आमादु म्हि छाइन ह्याम् धै दुःख योंबर फेम्। 4 च्योंरि तब नेरो याहवेहलाइ म्हाँदिबै म्हिइ सै न्होर, इजेत नेरो ह्रिंबै छ्ह योंम्। 5 दुष्ट म्हिमैंए घ्याँमैंर पुजु नेरो ङोमैं तम्; ह्रोंसलाइ जोगेबै म्हि च सैमैंउँइँले ह्रेंगो टिम्। 6 कोलोलाइ ठिक घ्याँर प्रबर छेनाले लोद्; छलस्याँ च खेब् तन् समा च घ्याँर्न प्ररिब्मुँ। 7 प्लब्मैंइ ङ्हाँदुमैंलाइ न्होंर थेंम्, धै छे किंबै म्हि बिस्याँ छे पिंबै म्हिए केब्छैं तम्। 8 आछ्याँबै के लप्रबै म्हिए फिर दु:ख खम्; धै अरूलाइ दु:ख पिंप्रब चइ पियाब्मुँ। 9 आयों-आख्युब्मैंलाइ पिंबै म्हिइ आशिक योंब्मुँ, तलेबिस्याँ चइ ह्रोंसए चबै सैमैं ङ्हाँदुमैंलाइ चुमिंम्। 10 आगुलाइ प्ह्रब्मैं बैरु तेवाद्; छलस्याँ प्होंगि तब, गाल् केब, सैं नबै ताँमैं नुयाम्। 11 छ्याँबै सैं नेरो छ्याँबै सुँले पोंबै म्हिल म्रुँ या थु तम्। 12 याहवेहए मिइ ज्ञानए छैं लरिम्; दिलेया भर लल् आखाँब्मैंइ पोंबै ताँ खीजी फुवाम्। 13 “बैरु सिंह मुँ! छतसि घ्याँर ह्यास्याँ ङलाइ सैवाम्!” बिसि प्ल्हेगु म्हिइ बिम्। 14 फ्यालुस्योए सुँ गैरु होंल्दों ग; याहवेहलाइ ह्रिस खल् लब्मैं च होंल्दोंर होंयाब्मुँ। 15 कोलोमैं आचडु मत्त्रे लदा ङ्हाँम्; दिलेया तार झोंबर प्हरेइ प्रुमा आचडु लब पिवाम्। 16 ह्रोंसए सै न्होर ल्हें लबर ङ्हाँदुमैंलाइ ह्रुगुदिब्मैं नेरो प्लब्मैंलाइ क्होल्समैं पिंब ङ्हिंन-ङ्हिंन् ङ्हाँदु तब्मुँ। बुद्धि मुँबै म्हिए अहानमैं 17 बुद्धि मुँब्मैंइ बिबै अहानमैं छेनाले थेद्, ङइ लोमिंबै ताँमैं क्हिए सैंर थेंन्, 18 तलेबिस्याँ च ताँमैं क्हिए खोंर थेंइ बिस्याँ धै च ताँमैं क्हिए सुँर मुँस्याँ च ताँइ क्हिए सैं तोंल् लब्मुँ। 19 क्हिए भर याहवेहए फिर तरिगे बिसि तिंयाँ ङइ चु ताँमैं क्हिलाइ लोमिंइमुँ, आँ क्हिलाइन लोमिंम्। 20 ङइ क्हिए ल्हागिर सल्लाए ताँमैं, अर्थि-बुद्धि नेरो ज्ञान योंबै सोंच्यु ताँमैं प्ह्रिइमुँ। 21 ह्रोंसलाइ कुलब्मैंए ङाँर क्हिइ ठिक जवाफमैं पिंल् खरिगे बिसि ङइ क्हिने क्ह्रोंसेंन्बै भर लल् खाँबै ताँमैं लोमिंइमुँ। 22 आयों आख्युब्मैं बिसि ङ्हाँदुमैंलाइ लुडिबै के आलद्; निसाफ लबै क्ल्ह्योर दु:ख योंब्मैंलाइ ह्रुगुदिबै के आलद्, 23 तलेबिस्याँ याहवेहजीन् चमैंए मुद्दा नेमिंब्मुँ, धै चमैंलाइ लुडिब्मैंलाइ याहवेहजी लुडिब्मुँ। 24 ह्रिस खबै म्हिने थु आतद्, युनन् ह्रिस खबै म्हिने प्रब् टिब् आलद्, 25 आस्याँ चए बानि ब्योर क्हिइ लोब्मुँ धै ह्रोंसन् ङोर फेब्मुँ। 26 बन्दगिर थेंबै सैमैंर यो आझोंन्, आगुए छेए जमानि आटिद्। 27 तलेबिस्याँ क्हिने आगुए छे फोबर मुइ आरेस्याँ क्हि रोबै खाटै या आगुइ बोवाब्मुँ। 28 क्हिए खेमैं मामैंइ स्योंम् ओंनोंन् क्योथेंबै साँदर्बै युँमामैं आस्योद्। 29 सैं झोंसि ह्रोंसए केमैं लबै म्हि क्हिइ म्रोंइमुँ वा? छाबै म्हि म्रुँए उँइँर रासि के लब्मुँ; तोन् तोर्बै म्हिमैंए उँइँर राल् त्हुरिब् आरे। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.