हितोपदेश 2 - परमेश्‍वरए ताँ तमु क्युइर

बुद्धिउँइँले योंबै छ्याँबै ताँमैं

¹ ओ ङए च्ह, ङए ताँ क्हिइ छेनाले थेइ बिस्याँ, ङइ बिबै ताँमैं क्हिए सैं न्होंर थेंइ बिस्याँ,

² क्हिए न्हेमेइ बुद्धिए ताँ थेइ बिस्याँ, क्होल् त्हुबै ताँमैंउँइँ क्हिए सैं छेनाले ल्हैदिस्याँ,

³ बुद्धिए ताँमैं क्होबै ल्हागिर क्हिइ ङने ह्रिस्याँ, क्होल् खाँबै शक्‍ति योंबै ल्हागिर थेबै कै तेसि ह्रिस्याँ,

⁴ चाँदि धोंले क्हिइ च म्हैस्याँ, लोथेंबै सै न्होर म्हैब् धोंले चलाइ म्हैस्याँ,

⁵ क्हिइ याहवेहने खैले ङ्हिंल त्हुमुँ बिबै ताँमैं छेनाले क्होब्मुँ, धै परमेश्‍वरए ज्ञान योंब्मुँ।

⁶ तलेबिस्याँ याहवेहजीन् म्हिमैंलाइ बुद्धि पिंम्, खीए सुँउँइँले ज्ञान बुद्धिए ताँमैं त्होंम्;

⁷ सोजो म्हिमैंलाइ खीजी ट्होगो लमिंम्; धै स्योर आतेल्‍ले प्रब्मैंलाइ रक्षा लम्।

⁸ तलेबिस्याँ खीजी ठिक के लब्मैंलाइ छ्याँबै घ्याँर डोरेब्मुँ, धै खीए फिर भर थेंब्मैंलाइ रक्षा लम्।

⁹ छतसि खीजी बिबै ताँ ङिंब्मैंइ ठिक के खैले लब, खाबलाज्यै या आफेलल्‍ले ठिक निसाफ खैले लब, छ्याँबै केमैं तो जा बिसि क्होब्मुँ;

¹⁰ तलेबिस्याँ बुद्धि क्हिए खों न्होंर खब्मुँ, धै ज्ञानइ क्हिए सैं प्लिंसि छिं ङ्‍हाँब्मुँ,

¹¹ छले च्हैंब्-मैंब् लल् खाँबइले आछ्याँबै केउँइँले क्हि फ्रेब्मुँ, ह्रब-सेब तल् खाँसि क्हि दुष्‍टमैंउँइँले जोगेब्मुँ।

¹² दुष्‍ट म्हिमैंइ लबै केउँइँले नेरो स्योलिबै ताँ पोंबै म्हिमैंउँइँले बुद्धिइ क्हिलाइ जोगेमिंब्मुँ।

¹³ दुष्‍ट म्हिमैं छ्याँबै घ्याँर प्रब् पिसि मिछु खैबै घ्याँर प्रम्।

¹⁴ आछ्याँबै केमैं लमा चमैं सैं तोंमुँ, धै आगुए न्होह्रों लल् योंमा चमैं छिं ङ्‍हाँम्।

¹⁵ चमैं प्रबै घ्याँमैं ख्यद-ख्योदे मुँ, धै चमैंए प्रब-टिबै चाल आछ्याँब मुँ।

¹⁶ फ्रें क्ल्योंप्रबै च्हमिरिउँइँले नेरो आछ्याँबै के लबै म्रिंस्योइ वाँबै ताँउँइँले बुद्धिइ क्हिलाइ जोगेमिंब्मुँ।

¹⁷ च च्हमिरिइ ह्रोंसए प्युँ पिवासि परमेश्‍वरए उँइँर फैबै बाछा म्‍लेयाइमुँ।

¹⁸ चए धिं न्होंर होंबै म्हि कालइ क्युरु-क्यरु बोमुँ धै चए घ्याँर प्रबै म्हिए प्ल्ह नर्गर फेनेम्;

¹⁹ छाबै च्हमिरि ङाँर ह्‍याब्मैं खाबै एइरि आख, चमैंइ खोंयोंइ आखाँबै छ्ह योंबै घ्याँ आयों (च्ह्‍योल् आखाँ)।

²⁰ छतसि छ्याँबै के लसि छ्ह थोबै म्हिइ धोंले क्हिज्यै या छ्ह थोद्। धै ठिक के लब्मैंए घ्याँर प्रद्।

²¹ तलेबिस्याँ ठिक लब्मैं परमेश्‍वरए ग्याल्सर टिल् योंब्मुँ, छले तोइ छ्याब् आरेबै म्हिमैं चर टिब्मुँ,

²² दिलेया दुष्‍टमैं बिस्याँ परमेश्‍वरजी छाइले स्योवाब्मुँ, धै बिश्‍वास घात लब्मैंलाइ नो धोंले स्युसि भ्योंवाब्मुँ।