मत्ती 25 - परमेश्वरए ताँ तमु क्युइरकन्ये च्युए अहान् - न्हक्रों मिक्रोंले टिद् बिब 1 येशूजी अझै बिइ, “स्वर्गर्बै ग्याल्स कन्ये च्युने च्हैंल् खाँम्। च कन्ये च्युइ ह्रों-ह्रोंसए बत्ति छेसि प्ह्रेंरोने त्होबर ह्याइ। 2 चमैं न्होंरि ङ्हउँलो बुद्धि मुँब् मुँल, ङ्हउँलो बुद्धि आरेबा मुँल। 3 तलेबिस्याँ च बुद्धि आरेब्मैंइ बत्ति मत्त्रे बोल, थप्दिबै छ्युगु बिस्याँ आबोल। 4 दिलेया बुद्धि मुँब्मैंइ बिस्याँ बत्तिने बालु थप्दिबै छ्युगु या बोल। 5 प्ह्रेंरो खब क्हैल् लबइले च कन्येमैं ताँन् न्हरु च्हुइयाइ। 6 “दिलेया म्हुँइँस आधार ‘ङ्ह्योत्ति! प्ह्रेंरो फेखबि छेइ! खीने त्होबर खो,’ बिबै कै थेइ। 7 छ बिब् थेसि च कन्येमैं च्यु छोरसि ह्रों-ह्रोंसए बत्ति सफा लसि छ्युगु झोंबर होंइ। 8 च बुद्धि आरेब्मैंइ बिस्याँ बुद्धि मुँब्मैंने ‘ङिए बत्ति सिबर होंइ! छतसि क्हेमैंने मुँबै च्हौदे छ्युगु ङिलाज्यै पिंन्,’ बिइ। 9 दिलेया च बुद्धि मुँब्मैंइ बिइ, ‘ङि नेरो क्हेमैंए ल्हागिर योबै छ्युगु ङिने आरे। दोकनर ह्यासि ह्रोंसए ल्हागिर चैदिबै छ्युगु किंन्।’ 10 “छबिमा च बुद्धि आरेब्मैं छ्युगु किंबर ह्यारिमा प्ह्रेंरो धिंर फेखइ, धै बत्तिर छ्युगु झोंसि टिरिब्मैं प्ह्रेंरोने बालुन् ब्ह्याए भत्यार चबर धिं न्होंर होंइ। धै म्हिमैंइ म्रा तोरवाइ। 11 “तिस्याँदे लिउँइँ च बुद्धि आरेब्मैं या फेखइ, धै ‘ओ प्रभु, ङिए ल्हागिरै या म्रा थोंमिंन्,’ बिबर होंइ। 12 दिलेया खीजी चमैंने ‘क्ह्रोंसेंन क्हेमैं खाब् जा ङइ ङो आसे,’ बिइ। 13 “छतसि न्हक्रो मिक्रोले टिद्, तलेबिस्याँ ङ एयुबै त्हिंइ नेरो त्हे खोंयों तमुँ बिसि क्हेमैंइ आसे। माराए सिक्काए अहान् ( लूका १९:११-२७ ) 14 “स्वर्गर्बै ग्याल्स म्हि घ्रि धोंन् तब् ग। च आगुए ह्युलर ह्याबर होंमा ह्रोंसए केब्छैंमैं हुइसि ह्रोंसने मुँबै सै न्होर चमैंए जिम्मार पिंइ। 15 केब्छैंमैंइ के कति लल् खाँम् च ङ्ह्योसि खीजी घ्रिने माराए सिक्का ङ्ह, घ्रिने माराए सिक्का ङ्हिं, धै घ्रिने माराए सिक्का घ्रि जिम्मा ल्हैदिसि च आगुए ह्युलउँइँ ह्याइ। 16 माराए सिक्का ङ्ह योंबै म्हिइ युनन् ह्यासि च मुइउँइँले छों लसि अर्को सिक्का ङ्ह कमदिइ। 17 छलेन सिक्का ङ्हिं योंबै म्हिज्यै या अर्को सिक्का ङ्हिं कमदिइ। 18 दिलेया सिक्का घ्रि योंबै म्हिइ बिस्याँ ह्यासि होंल्दों तासि क्ल्हेए मुइ लोथेंइ। 19 “ल्हें त्हिंइ लिउँइँ चमैंए क्ल्हे एखसि चमैंने हिसाब ह्रिइ। 20 माराए सिक्का ङ्ह योंबै केब्छैंइ अरू सिक्का ङ्ह पखसि ‘चिब, क्हिजी ङने माराए सिक्का ङ्हए जिम्मा पिंल। ङइ छों लसि अर्को सिक्का ङ्ह कमदिइ पखइमुँ,’ बिइ। 21 “चए के म्रोंसि क्ल्हेजी चने बिइ, ‘स्याबास! क्हि छ्याँबै के लब नेरो भर लल् खाँब् तइ! क्हि च्युगुदे सैरै या भर लल् खाँब् तइ। छतसि तारे ङइ ल्हें सैमैंए जिम्मा क्हिलाइ पिंब्मुँ। क्हि ह्रोंसए क्ल्हेने बालुन् सैं तोंन्ले टिद्।’ 22 “च लिउँइँ सिक्का ङ्हिं योंबै केब्छैंज्यै या क्ल्हे ङाँर खसि बिइ, ‘चिब, क्हिजी ङने सिक्का ङ्हिं पिंल। ङइ अर्को सिक्का ङ्हिं कमदिसि पखइमुँ।’ 23 “चए के म्रोंसि क्ल्हेजी चने बिइ, ‘स्याबास! क्हि छ्याँबै के लब नेरो भर लल् खाँब् तइ! क्हिइ च्युगुदे सैरै या छ्याँबै के लसि भर लल् खाँब् तइ। छतसि तारे ङइ ल्हें सैमैंए जिम्मा क्हिलाइ पिंब्मुँ। क्हि ह्रोंसए क्ल्हेने बालुन् सैं तोंन्ले टिद्।’ 24 “च लिउँइँ माराए सिक्का घ्रि योंबै केब्छैं क्ल्हे ङाँर खसि बिइ, ‘चिब! क्हि आरुँइँबै क्ल्ह्योउँइँले खैंमुँ, आटाबै क्ल्ह्योउँइँले खुमुँ, धै सारो सैं प्ह्याबै म्हि मुँ बिसि ङइ सेल। 25 छतसि ङम् ङ्हिंइ, धै ह्यासि क्हिए सिक्का स न्होंर लोथेंल। नाँ, क्हिए मुइन् किंन्।’ 26 “छबिमा चए क्ल्हेजी चने बिइ, ‘ओ केर आत्हुबै प्ल्हेउ! ङइ आप्लुबै क्ल्ह्योर खैंमुँ, आटाबै क्ल्ह्योउँइँले खुमुँ बिसि क्हिइ सेस्याँ 27 क्हिइ ङए मुइ बैंकर थेंल् त्हुमल। धै ङ एखमा च मुइला ब्याजै या ङइ योंमल।’ 28 चुइ तिंफुँए फिर ङ्हिंफुँ आलसेरो ‘चने मुँबै सिक्का प्हेंसि सिक्का च्यु मुँबै म्हि पिंन्। 29 तलेबिस्याँ खाब्ने मुँ, चने मुँबै फिरै या थप्दिमिंब्मुँ, धै चने छ्येज्याल्हुल्हु तब्मुँ। खाब्ने आरे चने देदे मुँबै या प्हेंवाँब्मुँ। 30 चु केर आत्हुबै केब्छैं बैरु मिछु खैबै क्ल्ह्योर भ्योंवाँन्, चर म्हिमैं क्रोसि स ह्राब्मुँ।’ निसाफ लबै त्हिंइ 31 “म्हिए च्ह म्रुँ तसि खीए थेबै मानर ल्हें स्वर्गदूतमैंने बालुन युब्मुँ, धै ह्रोंसए पबित्र राजगद्दिर टिब्मुँ, 32 झाइले ताँन् ह्रें-ह्रेंर्बै म्हिमैं खीए उँइँर खागु तब्मुँ, धै प्ह्रोंछैंमैंइ र नेरो क्यु स्यो-स्यो लब् धोंलेन् खीजी घ्रिउँइँले घ्रि स्यो लब्मुँ। 33 खीजी क्यु धों तब्मैं ह्रोंसए क्योलो हारइ थेंब्मुँ, धै र धों तब्मैं त्हेब्रे हारइ थेंब्मुँ। 34 झाइले म्रुँजी ह्रोंसए क्योलो हारबै म्हिमैंने ‘खो, ङए आबाउँइँले आशिक योंबै म्हिमैं, ह्युल बनेब् ओंनोंन् क्हेमैंए ल्हागिर बनेथेंबै ग्याल्सर क्ल्हे लबर खो,’ बिब्मुँ। 35 तलेबिस्याँ ङ फो ख्रेंमा क्हेमैंइ चल् पिंइ। ङ क्यु पिमा क्हेमैंइ क्यु थुँल् पिंइ। ङ अरू ह्युलर्बै मुँलेया क्हेमैंइ धिंर बोसि टिल् पिंइ। 36 ङ क्लुनान् मुँमा क्हेमैंइ क्वें खिमिंइ। ङ नमा क्हेमैं ल्होबर खइ। ङ झेलर मुँमा क्हेमैं ङ ङाँर त्होबर खइ। 37 “चु ताँ थेसि ठिक के लब्मैंइ ‘ओ प्रभु, क्हि फो ख्रेंब ङिइ खोंयों म्रोंसि चब् चल् पिंल? क्यु पिब् सेसि खोंयों थुँल् पिंल?’ बिब्मुँ। 38 ‘क्हि अरू ह्युलर्बै मुँलेया ङिइ खोंयों धिंर बोसि क्हिए मान लल? क्हि क्लुनान् तब् म्रोंसि ङिइ खोंयों क्वें खिमिंल? 39 झाइले क्हि नबै त्हेर क्हिलाइ ल्होबर ङि खोंयों खइ? धै क्हि झेलर मुँब् सेसि क्हि ङाँर त्होबर ङि खोंयों खल?’ 40 “छबिमा म्रुँइ चमैंने बिब्मुँ, ‘क्ह्रोंसेंन ङ क्हेमैंने बिमुँ, क्हेमैंइ ङए अलि-अङाँमैं न्होंर्बै धाँसे च्योंबै म्हिलाइ तो-तो लइ, च क्हेमैंइ ङलाइन लब् ग।’ 41 “च लिउँइँ खीजी ह्रोंसए त्हेब्रे हारइ टिब्मैंने ‘ओ सराप योंबै म्हिमैं! ङ ङाँइँले ह्रेंगो तयाद्। दियाबलस नेरो चए दूतमैंए ल्हागिर बनेथेंबै खोंयोंइ आसिबै मिर ह्याद्,’ बिब्मुँ। 42 तलेबिस्याँ ङ फो ख्रेंमा क्हेमैंइ चबै सै आपिं, ङ क्यु पिमा क्हेमैंइ क्यु थुँल् आपिं। 43 ङ अरू ह्युलर्बै म्हि मुँमा क्हेमैंइ धिंर बोसि टिल् आपिं। ङ क्लुनान् तमा क्हेमैंइ क्वें आखिमिं। ङ नमा नेरो झेलर मुँमा क्हेमैं ङने त्होबर आखा। 44 “‘प्रभु, क्हि फो ख्रेंब नेरो क्यु पिब, अरू ह्युलर्बै म्हि मुँब, क्लुनन् तब, नब, नेरो झेलर टिब ङिइ खोंयों म्रोंसि क्हिए सेवा आल?’ बिसि चमैंइ ङ्योएब्मुँ। 45 “धबै म्रुँइ बिब्मुँ, ‘क्ह्रोंसेंन ङ क्हेमैंने बिमुँ, ङए चु अलि-अङाँमैं न्होंर्बै धाँसे च्योंबै म्हिलाइ क्हेमैंइ आल्होसेरो क्हेमैंइ ङलाइ आल्होब् ग।’ 46 “छतसि चुमैंइ खोंयोंइ आखाँबै दण्ड योंब्मुँ, दिलेया ठिक के लब्मैंइ बिस्याँ खोंयोंइ आखाँबै छ्ह योंब्मुँ।” |
© 2020, Wycliffe Bible Translators, Inc. All rights reserved.
Wycliffe Bible Translators, Inc.