मत्ती 2 - परमेश्वरए ताँ तमु क्युइरस्यारउँइँले (पूर्वउँइँले) ङ्ह्योब् लिब्मैं येशूने त्होखब 1 यहूदीया ह्युलर्बै बेथलेहेम बिबै नाँसर हेरोद बिबै म्रुँए पलोरि येशू फिल। येशू फिबै लिउँइँ स्यारर्बै ङ्ह्योब् लिब्मैं यरूशलेमर फेखइ। 2 च ङ्ह्योब् लिब्मैंइ बिइ, “यहूदीमैंए म्रुँ तसि फिबै कोलो खनिर मुँ? तलेबिस्याँ खी फिइमुँ बिसि सेल् पिंबै मुसारा ङिइ स्यारउँइँले त्होंब म्रोंइ। छतसि खीलाइ फ्योबर ङि चुर खइमुँ।” 3 चु ताँ थेसि हेरोद म्रुँ बेल्ले आतिदिइ धै यरूशलेमथेंमैं या ताँन् आतिदिइ। 4 छतमा हेरोद म्रुँइ ख्रो पिंबै खेगि चिब्मैं नेरो शास्त्रिमैं खागु लसि “परमेश्वरजी कुल्मिंबै म्रुँ खनिर फिब्मुँ?” बिसि ङ्योएइ। 5 चमैंइ बिइ, “यहूदीया ह्युलर्बै बेथलेहेम नाँसर, तलेबिस्याँ अगमबक्ताइ ओंसोंन् छले प्ह्रिइमुँ: 6 ‘ओ यहूदा ह्युलर्बै बेथलेहेम नाँस, क्हि तो सैरै या यहूदार्बै सहरमैं भन्दा च्योंब आरे। तलेबिस्याँ क्हिउँइँलेन् चिब घ्रि त्होंब्मुँ। खीजीन् ङए म्हिमैं अथवा इस्राएलीमैंए छैं लब्मुँ।’” 7 च्हमा हेरोद म्रुँइ च स्यारउँइँले खबै ङ्ह्योब् लिब्मैं खाबज्यै आसेल्ले हुइसि मुसारा खोंयों म्रोंल बिसि चमैंउँइँले था सेइ। 8 झाइले चमैंने बिइ, “क्हेमैं बेथलेहेम नाँसर ह्यासि च कोलो छेन्ले म्हैद्, धै योंबै लिउँइँ कोलो खनिर मुँ बिसि ङने या बिद्। ङै या खीलाइ फ्योबर ह्याम्।” 9 म्रुँइ बिब् ङिसि चमैं ह्रोंसए घ्याँ क्हासि ह्याइ। छले ह्याम चमैंइ स्यारउँइँ म्रोंबै मुसार खेंमैंए ओंसों-ओंसों ह्याइ। धै कोलो मुँबै क्ल्ह्योर फेसि च मुसारा चर्न टिइ। 10 छले चमैंइ च सारा म्रोंमा चमैं बेल्ले सैं तोंइ। 11 झाइले चमैं च धिं न्होंर होंमा कोलो खीए आमा मरियमए क्वेंदर म्रोंइ। धै पत्खु तसि खीलाइ फ्योसि ह्रोंसए नेंदो फैसि मारा, छ्याँबै थाँ खबै धुप नेरो मूर्र बिबै लिंबै थाँ खबै छ्युगु भेटिमैं पिंइ। 12 झाइले एह्याबै त्हेर परमेश्वरजी “हेरोद म्रुँ ङाँर आह्याद्,” बिसि चमैंने म्होंडर बिइ। छतसि चमैं स्योबै घ्याँउँइँले ह्रोंसए ह्युलर एह्याइ। मिश्र ह्युलर ह्याब 13 च ङ्ह्योब् लिब्मैं ह्याबै लिउँइँ स्वर्गदूत घ्रिइ योसेफने म्होंडर बिइ, “रेद्, कोलो नेरो खीए आमा बोसि मिश्र ह्युलउँइँ ह्याद्। ङइ च ह्युलउँइँले आहुइन् समा चर्न टिरिद्, तलेबिस्याँ हेरोदइ चु कोलो सैबर म्है प्रइमुँ।” 14 झाइले योसेफ रेसि आमा नेरो च्ह बोसि च म्हुँइँसर्न मिश्र ह्युलउँइँ त्होंयाइ। 15 झाइले हेरोद आसिन् समा चमैं मिश्र ह्युलर्न टिरिइ। “ङइ ह्रोंसए च्ह मिश्र ह्युलउँइँले हुइमुँ।” बिसि अगमबक्ताउँइँले याहवेहजी ओंसोंन् बिबै ताँ छले पूरा तइ। बेथलेहेमर्बै कोलोमैं सैब 16 ङ्ह्योब् लिब्मैंइ खीने स्योर तेना बिब् सेसि हेरोद बेल्ले ह्रिस खइ। चइ मुसारा म्रोंबै त्हे च ङ्ह्योब् लिब्मैंने ङ्योएसि ओंसोंन् था सेल् खाँल। छतमा चमैंइ बिबै त्हे मैंसि हेरोदइ बेथलेहेम नेरो च खागुबै नाँसजरेबै ङ्हिंदि न्होंर्बै मुँयुँ कोलोमैं ताँन् सैबर ल्हैदिइ। 17 छले यर्मिया अगमबक्ताइ बिबै ताँ पूरा तइ। चइ स्योंमन् छले प्ह्रिथेंल: 18 “रामा नाँसर क्रोब्-म्होब् तसि दुःखए कै म्हिमैंइ थेइ। स्योंम्बै राहेलए खलकर्बै आमामैं ह्रोंसए कोलोमैंए ल्हागिर क्रोसेन् मुँ। चमैंए सैं खैलसे क्होल् आङिं। तलेबिस्याँ चमैंए कोलोमैं ताँन् सियाल।” मिश्र ह्युलउँइँले एखब 19 हेरोद म्रुँ सियाबै लिउँइँ याहवेहए स्वर्गदूत घ्रि मिश्र ह्युलरि योसेफए म्होंडर धबै बिइ। 20 “ओ योसेफ, रेद्, कोलो नेरो आमा बोसि इस्राएल ह्युलर एह्याद्। तलेबिस्याँ कोलो सैल् म्हैबै म्हिमैं सिल् खाँइमुँ।” 21 छबिमा योसेफ रेसि कोलो नेरो आमा बोसि इस्राएल ह्युलर एखइ। 22 दिलेया यहूदीयार अर्खिलाउस ह्रोंसए आबा हेरोदए क्ल्ह्योरि म्रुँ तइमुँ बिबै ताँ योसेफइ थेइ। चु ताँ थेसि योसेफ छाइ ह्याब ङ्हिंइ। छतमा म्होंडरि धबै परमेश्वर चने पोंइ। खीजी बिब् म्हाँदिसि योसेफ गालील ह्युलर ह्याइ। 23 चर ह्यासि नासरत बिबै सहरर टिइ। खीने नासरतथें बिब्मुँ बिसि अगमबक्ताइ स्योंमन् पोंबै ताँ छले पूरा तइ। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.