लूका 6 - परमेश्वरए ताँ तमु क्युइरप्रिबै त्हिंइए बारेर्बै ताँ ( मत्ती १२:१-८ ; मर्कूस २:२३-२८ ) 1 तिगें प्रिबै त्हिंइर येशू नेरो खीए चेलामैं गहुँ बारिए घ्याँ तसि ह्यारिमा चेलामैंइ गहुँए नाँ थुसि योर नेसि चइ। 2 छले चब् म्रोंसि को-कोइ फरिसीमैंइ बिइ, “प्रिबै त्हिंइर तो लल् आत चन् क्हेमैंइ तले लमुँ?” 3 येशूजी चमैंने बिइ, “क्हेमैंइ परमेश्वरए छ्वेर आखेइमुँ वा? स्योंम्बै दाऊद नेरो खीए थुमैं फो ख्रेंमा चइ तो लल? 4 चइ परमेश्वरए मन्दिरर होंसि परमेश्वरए मिंर थेंबै क्हें चवाइ। धै ह्रोंसए थुमैंलाज्यै या च क्हें चल् पिंइ। ख्रो पिंबै खेगिमैंइ बाहेक अरू खाबज्यै या च क्हें चल् आतमल।” 5 धबै येशूजी चमैंने बिइ, “म्हिए च्ह प्रिबै त्हिंइर्बै क्ल्हे ग।” येशूजी प्रिबै त्हिंइर यो कारयाबै म्हि सल् लमिंब ( मत्ती १२:९-१४ ; मर्कूस ३:१-६ ) 6 धबै अर्को प्रिबै त्हिंइरै या येशू च्हों धिंर ह्यासि लोमिंबर होंइ। चर क्योलो यो कारयाबै म्हि घ्रि मुँल। 7 छतसि खीजी प्रिबै त्हिंइरै या च नबै म्हिलाइ सल् लमिंम् उ सल् लस्याँ खीए फिर छ्याब् ल्हैदिल् योंम् बिसि को-कोइ शास्त्रिमैं नेरो फरिसीमैंइ खीए छैं लरिल। 8 दिलेया येशूजी चमैंए सैं न्होंर्बै ताँ क्होसि यो कारयाबै म्हिने “रेसि चुर खो,” बिमा च म्हि रेसि राइ। 9 झाइले येशूजी फरिसीमैं नेरो शास्त्रिमैंने बिइ, “क्हेमैंने बालु ङइ ताँ घ्रि ङ्योएम्! प्रिबै त्हिंइर छ्याँबै के लब स्वाब उ आछ्याँबै के लब स्वाब? म्हि जोगेब छ्याँब उ सिल् पिंब छ्याँब?” 10 छ बिसि खीजी ताँन् म्हिमैं ङाँइ ङ्ह्योसि यो कारयाबै म्हिने “क्हिए यो स्योंन्,” बिइ। च म्हिइ यो स्योंमा चए यो सयाइ। 11 छ लब् म्रोंसि फरिसीमैं नेरो शास्त्रिमैं बेल्ले ह्रिस खसि चुलाइ तो लले बिसि खेमैं न्होंर मत लबर होंइ। येशूजी च्युसे ङ्हिं कुल्मिंबै चेला चिब्मैं त्हाँब ( मत्ती १०:१-४ ; मर्कूस ३:१३-१९ ) 12 च त्हेजरे येशू कोंर ह्यासि म्हुँइँसतिमि परमेश्वरने प्राथना लसि म्हुँइँस थोइ। 13 मि म्रोंल् खाँबै लिउँइँ येशूजी चेलामैं ह्रोंस ङाँर हुइसि चमैं न्होंर्बै च्युसे ङ्हिं कुल्मिंबै चेला चिब्मैं त्हाँसि चमैंलाइ “कुल्मिंबै चेला चिब्मैं” बिबै मिं थेंइ। 14 कुल्मिंबै चेला चिब्मैंए मिं छले मुँ: सिमोन (चए मिं येशूजी पत्रुस थेंइ) चए अलि अन्द्रियास, याकूब, यूहन्ना, फिलिप नेरो बारथोलोमाइ, 15 मत्ती, थोमा, अल्फयसए च्ह याकूब नेरो सिमोन, (चने “ह्रोंसए ह्युललाइ म्हाँया लबै म्हि या” बिमल)। 16 याकूबए च्ह यहूदा नेरो यहूदा इस्करयोतथें (चु इस्करियोतथेंइ लिउँइँ धोका पिंसि येशूलाइ शत्तुरमैंए योर पिंवाम्। आशिक नेरो सराप ( मत्ती ४:२३-२५ ) 17 च लिउँइँ खी कोंउँइँले चेलामैंने बालुन् क्युरु युसि चेप्ला तबै क्ल्ह्योर राइ। चर यहूदीया, यरूशलेम नेरो मा ङ्युँइ रेजरेबै टुरोस नेरो सिदोन सहर खागुबै ह्युलउँइँले या ल्हें म्हि खल। चर खीए अरू चेलामैं या मुँल। चमैं येशूजी लोमिंबै ताँ थेबर नेरो ह्रोंसए नब्-छब् सल् लमिंरिगे बिसि खल। 18 च त्हेर्न मोंमैंइ स्याबै म्हिमैं या येशूजी सल् लमिंइ। 19 ताँन् म्हिमैंइ येशूलाइ छुइल् म्हैमल, तलेबिस्याँ येशूउँइँले शक्ति त्होंरिल। छतमा चमैं ताँन् सल् लमल। येशूजी सुख नेरो दुःखए बारेर ताँ लब ( मत्ती ५:१-१२ ) 20 झाइले येशूजी खीए चेलामैं ङाँइ ङ्ह्योसि बिइ, “ओ आयों आख्युब्मैं, क्हेमैंइ आशिक योंब्मुँ तलेबिस्याँ परमेश्वरए ग्याल्स क्हेमैंलन् ग। 21 ओ तोगो फो ख्रेंब्मैं, क्हेमैंइ आशिक योंब्मुँ तलेबिस्याँ क्हेमैंइ म्रेंन्ले चल् योंब्मुँ। तोगो क्रोब्मैंइ आशिक योंब्मुँ, तलेबिस्याँ क्हेमैं निस्योल् योंब्मुँ। 22 “म्हिए च्हए फिर क्हेमैंइ बिश्वास लबइले म्हिमैंइ हेल लसि खेंमैंउँइँले स्यो लावाब्मुँ, धै क्हेमैं फिर आछ्याँबै ताँमैं पोंसि क्हेमैंए बिल्लि लब्मुँ, धै दुष्ट म्हिमैं धों ङ्हाँसि म्हि आच्हिन् लब्मुँ। छ ललेया क्हेमैंइ आशिक योंब्मुँ। 23 च त्हेर क्हेमैं सैं तोंदै उफरदिद्, तलेबिस्याँ स्वर्गर क्हेमैंए इनाम थेब तब्मुँ। चमैंए खेमैंज्यै या स्योंमा अगमबक्तामैंलाइ छलेन् ह्रुगुदिल। 24 दिलेया धिक्कार क्हेमैं तोगो प्लब्मैं! सै न्होरए लिलि प्रब्मैं क्हेमैंइ परमेश्वरए ग्याल्सर तोइ योंरिब् आरे। तलेबिस्याँ क्हेमैंइ सुख योंल् खाँइमुँ। 25 धिक्कार, क्हेमैं तोगो म्रेंन्ले चल् योंब्मैं! तलेबिस्याँ लिउँइँ क्हेमैं फो ख्रेंल् त्हुब्मुँ। धिक्कार, क्हेमैं तोगो निस्योब्मैं! तलेबिस्याँ लिउँइँ क्हेमैं शोक लसि क्रोल् त्हुब्मुँ। 26 धिक्कर, तोगो म्हिमैंइ स्वाब म्हि बिसि थेब् लब्मैं! तलेबिस्याँ चमैंए खेमैंज्यैया स्योलिबै ताँ पोंबै अगमबक्तामैं स्वाब म्हि बिसि थेब् लमल। येशूजी शत्तुरमैंलाज्यै या म्हाँया लद् बिब ( मत्ती ५:३८-४८ ; ७:१२ ) 27 “छतसि ङए ताँ थेब्मैंने ङ बिमुँ, ह्रोंसए शत्तुरमैंलाज्यै या म्हाँया लद्, धै क्हेमैंलाइ हेल लब्मैंलाज्यै छ्याँब लद्। 28 क्हेमैंए फिर सराप पिंब्मैंलाज्यै आशिक पिंन्, धै क्हेमैंए फिर गाल् केब्मैंए ल्हागिर परमेश्वरने क्षमा ह्रिसि प्राथना लमिंन्। 29 खाबज्यै क्हिए क्हाँबोर ल्हिस्याँ अर्को क्हाँबो या तोमिंन्, छलेन खाबज्यै क्हिए बक्खु प्हेंवास्याँ ह्रेंगै या बोल् पिंन्। 30 क्हिने बालु ह्रिब्मैंलाइ पिंन्, धै क्हिए समनमैं बोयाब्मैंने धबै आह्रिद्। 31 “म्हिमैंइ ह्रोंसने छ्याँब् लरिगे ङ्हाँस्याँ क्हेमैंज्यै या चमैंने छ्याँबन् लद्। 32 ह्रोंसने म्हाँया लब्मैंने मत्त्रे म्हाँया लइ बिस्याँ क्हेमैंलाइ तो फयादा तइ? तलेबिस्याँ पापिमैंज्यै या ह्रोंसने म्हाँया लब्मैंने मत्त्रे म्हाँया लम्। 33 ह्रोंसलाइ छ्याँब लब्मैंलाइ मत्त्रे छ्याँब लइ बिस्याँ, क्हेमैंलाइ तो फयाद तइ? तलेबिस्याँ पापिमैंज्यै या छान् लम्। 34 फोल् खाँबै म्हिमैंलाइ मत्त्रे छे पिंइ बिस्याँ, क्हेमैंइ तो इनाम योंम् रो? तलेबिस्याँ पापिमैंज्यै छे फोल् खाँबै पापिमैंलाइ छे पिंम्। 35 छले आङिं, ह्रोंसए शत्तुरमैंलाज्यै या म्हाँया लद्, चमैंए फिर ल्हयो खद्, एल् आखाँबै म्हिमैंलाज्यै या छे पिंन्। छलस्याँ परमेश्वरङाँइँले क्हेमैंइ थेबै इनाम योंब्मुँ। धै क्हेमैं ताँन् भन्दा थेबै परमेश्वरए च्ह-च्हमि ठर्दिब्मुँ, तलेबिस्याँ परमेश्वरजी बैगुनिमैं नेरो दुष्टमैं फिर ल्हयो खम्। 36 क्हेमैंए परमेश्वर आबाजी ताँनए फिर ल्हयो खब् धोंले क्हेमैंज्यै या ताँनए फिर ल्हयो खद्। येशूजी आगुए फिर छ्याब् आल्हैदिद् बिब ( मत्ती ७:१-५ ) 37 “आगुए फिर छ्याब् आल्हैदिद्, आगुने चम् आछ्याँबै के लबै म्हि ग आबिद्। छलस्याँ परमेश्वरज्यै या क्हेमैंए फिर छ्याब् ल्हैदिरिब् आरे। अरूलाइ क्षमा पिंन्, धै परमेश्वरज्यै या क्हेमैंलाइ क्षमा पिंब्मुँ। 38 ह्रोंसने मुँबै सैमैं अरूलाज्यै या पिंन् छलस्याँ खाँदि-खाँदिसि, म्युरुरुले ङेयाल्ले परमेश्वरजी झन् ल्हें सैमैं क्हेमैंलाइ पिंब्मुँ। क्हेमैंइ खैले क्होंएँसि पिमुँ, छलेन परमेश्वरजी क्हेमैंलाज्यै या क्होंएँसि पिंब्मुँ।” 39 येशूजी चमैंने अहान् घ्रि बिइ, “कन घ्रिइ अर्को कन डोरेल् खाँम्मा? कनइ कन डोरेस्याँ ङ्हिंना ङ्हिंन् होंल्दोंर आपाय वा? 40 चेला ह्रोंसए गुरु भन्दा थेब आत, दिलेया गुरुइ लोमिंबै ताँमैं ह्रल् खाँबै लिउँइँ मत्त्रे च गुरु धोंब तल् खाँम्। 41 “क्हिइ ह्रोंसए अलिए मिर्बै कसिं म्रोंम्, दिलेया ह्रोंसए मिर्बै म्हुँडा बिस्याँ तले आम्रों? 42 क्हिइ ह्रोंसए मिर्बै म्हुँडा आम्रोंस्याँ, ह्रोंसए अलिने ‘ओ अलि क्हिए मिर कसिं मुँन तेमिंले ओ,’ बिसि क्हिइ खैले बिल् खाँम्? ओ फिब्लो पार्दिब्मैं! ओंसों ह्रोंसए मिर्बै म्हुँडा तेद्, धै बल्ल ह्रोंसए अलिए मिर्बै कसिं तेबर क्हिइ छेन्ले म्रोंल् खाँम्। छ्याँब नेरो आछ्याँबै रोमैं ( मत्ती ७:१६-२० ; १२:३३-३५ ) 43 “छ्याँबै सिं धुँर न्होंह्याबै रो आरो। छलेन आछ्याँबै सिं धुँर छ्याँबै रो आरो। 44 सिं धुँ खैब मुँ, रो या छाबन् तम्। रो म्रोंसि सिं धुँ खैब मुँन बिब था सेम्। पुजुए धुँउँइँले म्हिमैंइ तुँबुए रो थुल् आखाँ, छलेन पुलुए धुँउँइँले पलाँ थुल् आखाँ। 45 छ्याँबै सैं प्ह्याबै म्हिइ ह्रोंसए सैंर मुँबै छ्याँबै सैमैंउँइँले छयाँबै ताँमैं पोंम्, धै आछ्याँबै सैं प्ह्याबै म्हिइ ह्रोंसए सैंर मुँबै आछ्याँबै सैंउँइँले आछ्याँबै ताँमैंन् पोंम्। तलेबिस्याँ सैंर तो मुँ चन् म्हिए सुँउँइँले त्होंम्।” धिं बनेबै म्हि ङ्हिं ( मत्ती ७:२४-२७ ) 46 येशूजी धबै अर्को ताँ बिइ, “ङइ बिबै ताँ आङिंस्याँ क्हेमैंइ तले ङने ‘ओ प्रभु, प्रभु’ बिमुँ? 47 खाब् म्हि ङ ङाँर खसि ङइ बिबै ताँ थेसि ङइ खै बिमुँ छान् लमुँ, च म्हि खैबै तम् बिसि ङ क्हेमैंने बिमुँ: 48 च म्हि धिं बनेबै म्हि धों तब् ग। च म्हिइ गैरु जग त्हासि पारए फिर जग झोंइ। झाइले नाँ बाडि तसि थेबै प्हँले च धिंए फिर उँयालेया च धिं तोइ आत, तलेबिस्याँ चइ भोंन्ले धिं बनेल। 49 दिलेया खाबइ ङए ताँ थेसेया ङइ बिब् धों आल, च म्हि अर्को धिं बनेबै म्हि धों तब् ग। च म्हिइ गैरु जग आतल्ले सए फिर्न धिं बनेइ। धै च धिंए फिर प्हँले युमा युनन् फुयाम्। झाइले चला थेबै नोक्सन् तयाइ।” |
© 2020, Wycliffe Bible Translators, Inc. All rights reserved.
Wycliffe Bible Translators, Inc.