लूका 4 - परमेश्वरए ताँ तमु क्युइरदुष्टइ येशूए जाँच लल् म्हैब ( मत्ती ४:१-११ ; मर्कूस १:१२ , १३ ) 1 येशू क्युर प्ल्हुँसि बप्तिस्मा किंबै लिउँइँ परमेश्वरए पबित्र प्ल्हजी प्लिंसि यर्दन स्योंउँइँले एखमा पबित्रए प्ल्हजी खीलाइ क्यु आयोंबै क्ल्ह्योर बोइ। 2 येशू चर प्लिच्यु त्हिंइ समा टिमा दियाबलस बिबै दुष्ट जाँच लबर चर खइ। च्हौ त्हिंइ समा तोइ आचन्ले टिमा येशूलाइ फो ख्रेंल। 3 छतमा दुष्टइ येशूने बिइ, “क्हि क्ह्रोंसेंन परमेश्वरए च्ह ग बिस्याँ चु युँमा ‘चबै सै तयाद्’ बिद्।” 4 दिलेया येशूजी चने बिइ, “‘म्हि क्हेंइ मत्त्रे सोल् आँखाँ!’ बिसि परमेश्वरए छ्वेर प्ह्रिइमुँ।” 5 च लिउँइँ चइ खीलाइ नुबै कोंर बोसि ह्युलर्बै ताँन् ग्याल्समैं उँइँइ। 6 दष्टइ येशूने बिइ, “चु ताँन् ग्याल्सर्बै सैमैं पिंसि ङइ क्हि चुर्बै क्ल्हे तल् पिंस्यो। तलेबिस्याँ चु ताँन् ङइ योंइमुँ छतसि ङइ खाबलाइ पिंदा ङ्हाँमुँ पिंल् खाँम्। 7 छतसि क्हिइ ङ फ्योस्याँ ङइ चु तोन्दोंरि सैमैं क्हिलाइ पिंब्मुँ।” 8 येशूजी चने बिइ, “क्हिइ याहवेह ह्रोंसए परमेश्वरलाइ मत्त्रे फ्योद्, धै खीए सेवा मत्त्रे लद्,” बिसि परमेश्वरए छ्वेर छले प्ह्रिइमुँ। 9 धबै च दुष्टइ खीलाइ यरूशलेम सहरर बोसि मन्दिरए ताँन् भन्दा नुबै च्होर राल् पिंसि खीने बिइ, “क्हि परमेश्वरए च्ह ग बिस्याँ छुइले फाल् झोंन्। 10 तलेबिस्याँ परमेश्वरए छ्वेर छले प्ह्रिइमुँ, ‘क्हि जोगेमिंबै ल्हागिर परमेश्वरजी ह्रोंसए स्वर्गदूतमैं कुलब्मुँ। 11 झाइले चमैंइ क्हिलाइ यो-योर्न तोब्मुँ, आस्याँ क्हिए प्हले युँमार थुरयाब्मुँ,’ बिसेया प्ह्रिइमुँ।” 12 दिलेया येशूजी चने बिइ, “‘क्हिइ ह्रोंसए याहवेह परमेश्वरए जाँच आलद्,’ बिसि परमेश्वरए छ्वेर प्ह्रिइमुँ।” 13 दियाबलसइ येशूलाइ ताँन् खालर्बै जाँच लसेया खीलाइ पापर च्होल् आखाँमा “तारे मौका ङ्ह्योसि जाँच लल् त्हुइ” ङ्हाँसि च खीलाइ वाथेंसि ह्याइ। येशूजी गालील ह्युलउँइँले ह्रोंसए के लल् म्हैब ( मत्ती ४:१२-१७ ; मर्कूस १:१४-१५ ) 14 च लिउँइँ येशू परमेश्वरए पबित्र प्ल्हए शक्ति योंसि गालील ह्युलर एखइ। छले एखमा खीए बारेर्बै ताँ च खागुबै ताँन् नाँसजरे थेनेइ। 15 खीजी चर्बै च्हों धिंजगोर परमेश्वरए ताँ लोमिंबर होंइ। छले लोमिंमा ताँन् म्हिमैंइ खीए छ्याँबै बयन लमल। 1 ह्रोंसए नाँसथेंमैंइ येशूलाइ आक्वेंब ( मत्ती १३:५३-५८ ; मर्कूस ६:१-६ ) 16 झाइले येशू ह्रोंस फाराबै सहर नासरतर ह्याइ। खी प्रिबै त्हिंइर च्हों धिंर ह्याब्रें लबै बाँनि मुँल। छतसि च्हों धिंर ह्यासि परमेश्वरए छ्वे खेबर राइ। 17 चर्बै म्हिमैंइ खीने यशैया अगमबक्ताइ प्ह्रिबै छ्वे पिंइ। खीजी च फैसि चु ताँ प्ह्रिबै खण्ड चमैंए ल्हागिर खेमिंइ: 18 “याहवेह परमेश्वरए प्ल्ह ङए फिर मुँ, तलेबिस्याँ ङ्हाँदुमैंलाइ सैं तोंबै ताँ बिमिंबर खीजी ङलाइ त्हाँइमुँ। कैदिमैं झेलउँइँले तेमिंबर, धै कनमैं मि म्रोंल् लमिंबर। आगुइ क्र ओल् आपिंब्मैंलाइ रेमिंबर खीजी ङ कुल्मिंब् ग। 19 धै याहवेहजी ह्रोंसए म्हिमैं जोगेमिंबै त्हे खइमुँ बिबर खीजी ङ कुल्मिंब् ग।” 20 च्हौ खेल् खाँसि खीजी परमेश्वरए छ्वे च्हों धिंर्बै म्हिने पिंसि खी क्हुँइ। च्हों धिंर मुँबै ताँन् म्हिमैंइ खीलाइ ङ्ह्योबै ङ्ह्योबन् लरिल। 21 झाइले खीजी चमैंने बिइ, “तिंयाँ क्हेमैंइ चु ताँ थेना थेन् परमेश्वरए छ्वेइ तो बिइमुँ छान् तइमुँ।” 22 ताँन् म्हिमैंइ “चुम् स्वाबै म्हि मुँन!” बिसि खीए छ्याँबै बयन लइ, धै खीजी पोंबै सैं तोंबै छ्याँबै ताँमैं थेसि चमैं ताँन् प्लेटोयाइ। धै “चुम् योसेफए च्ह आङिं वा?” बिसि चमैंइ बिइ। 23 येशूजी चमैंने बिइ, “ओ बैद्य, क्हि ह्रोंसलाइन सल् लद्। क्हिजी कफर्नहुमर तो-तो केमैं लइमुँ बिब ङिंइ थेल। छतसि चर लब् धों तबै केमैं ह्रोंसए नाँसरै या लद् बिबै चु अहान् क्ह्रोसेंन क्हेमैंइ ङने बिब्मुँ आङिं वा।” 24 धबै खीजी चमैंने बिइ, “क्ह्रोसेंन ङ क्हेमैंने बिमुँ, अगमबक्ता खाबलाज्यै या ह्रोंसए ह्युलर्बै म्हिमैंइ आक्वें। 25 क्ह्रोंसेंन ङ क्हेमैंने बिमुँ, इस्राएल ह्युलर एलियाए पलोर साडे सोंदिं समा नाँ आयुमा थेबै अँङ्गल् तल। च त्हेर चर म्हरेस्योमैं ल्हेंन् मुँल। 26 दिलेया परमेश्वरजी चमैं ङाँर एलिया आकुल। बरु इस्राएल ह्युल भन्दा अर्को सिदोन ह्युलर्बै सारफत बिबै नाँसर्बै म्हरेस्यो घ्रि ङाँर मत्त्रे ल्होबर एलिया कुलइ। 27 झाइले एलीशा अगमबक्ताए पलोर इस्राएली म्हिमैं न्होंर कोर खबै म्हिमैं ल्हेंन् मुँल। दिलेया च कोर खब्मैं न्होंर खाबै आस, अरू ह्युलर्बै सिरियालिथें नामान बिबै म्हि मत्त्रे एलीशा ङाँर खसि सइ।” 28 चु ताँ थेसि च्हों धिंर मुँब्मैं ताँन् बेल्ले ह्रिस खइ। 29 छतसि चमैंइ येशूलाइ नाँसउँइँले बैरु तेवासि खेंमैंइ बनेबै सहरए कोंर्बै च्होर बोसि खीलाइ क्युरु भ्योंवाल् म्हैइ। 30 दिलेया येशू हुलए म्हाँजोउँइँले क्युलसि त्होंह्याइ। येशूजी मोंइ स्याबै म्हि सल् लमिंब ( मर्कूस १:२१-२८ ) 31 च लिउँइँ येशू गालील ह्युलर्बै कफर्नहुम बिबै नाँसर ह्यासि प्रिबै त्हिंइर म्हिमैं लोमिंरिल। 32 खीजी लोमिंबै ताँ थेब्मैं प्लेटोयाइ तलेबिस्याँ खीजी हग मुँल्ले ताँ पोंमल। 33 च्हों धिंर मोंइ स्याबै म्हि घ्रि मुँल। चइ थेबै कैले चिरसि, 34 “ओ नासरतर्बै येशू, क्हिइ ङिलाइ तो लल् म्हैल? ङि सैबर खल् वा? क्हि परमेश्वरजी कुल्मिंबै पबित्र म्हि ग बिसि ङइ सेइमुँ।” बिइ। 35 छबिमा येशूजी हौदिदै च मोंने बिइ, “आपोंन्, च म्हिउँइँले त्होंइ ह्याद्।” बिमा मोंइ चलाइ म्हिमैंए म्हाँजोर प्योवासि तोइ नल् आलल्ले च म्हिउँइँले त्होंइ ह्याइ। 36 छ तब् म्रोंसि ताँन् म्हिमैं प्लेटोयासि “चु खैतबै ताँ जा? चुइमि हग नेरो शक्ति मुँल्ले मोंमैं हौदिबै तोदोंन् मोंमैं छ्युडिह्यामना बिसि ह्रों-ह्रोंसन् ताँ लबर होंइ।” 37 छतमा प्रभु येशूए छयाँबै बयन च खागुबै ताँन् ह्युलजरे थेनेइ। येशू प्रभुजी ल्हें नबै म्हिमैं सल् लमिंब ( मत्ती ८:१४-१७ ; मर्कूस १:२९-३४ ) 38 येशू च्हों धिंउँइँले त्होंसि सिमोन बिबै म्हिए धिंर ह्यामा सिमोनए स्युमिं बेल्ले जर खसि नरिल। छतमा चर्बै म्हिमैंइ चुलाइ सल् लमिंन् बिसि येशूने यो छ्युँ लइ। 39 छबिमा खी च ङाँर रासि जरलाइ हौदिइ, छले हौदिमा जरइ चलाइ पिवाइ। धै सबै तोदोंन् रेसि खेंमैंए सेवा लइ। 40 त्हिंयाँ लिबि छेमा च जरेबै ल्हें खालर्बै नब्मैं म्हिमैंइ येशू ङाँर पखइ। धै खीजी घ्रि-घ्रिए फिर ह्रोंसए यो थेंसि चमैं ताँन् सल् लमिंइ। 41 ल्हें म्हिउँइँले मोंमैं थेबै कैले “क्हि परमेश्वरए च्ह ग,” बिदै त्होंयाइ। दिलेया खीजी हौदिसि चमैं पोंल् आपिं। तलेबिस्याँ “येशू परमेश्वरजी कुल्मिंबै म्रुँ ख्रीष्ट ग!” बिसि च मोंमैंइ सेमल। प्रभु येशू तले युइदि बिबै ताँ ( मर्कूस १:३५-३९ ) 42 च प्हँन्हाँग्धों मि म्रोंबै लिउँइँ येशू खाबै आरेबै क्ल्ह्योर ह्याइ। दिलेया म्हिए हुलइ म्हैदै खी ङाँर खसि “ङिलाइ पिसि आह्यामिंन् बिसि,” यो छ्युँ लइ। 43 दिलेया खीजी चमैंने बिइ, “तारे परमेश्वरजी ग्याल्स लबर होंइमुँ। छतसि खीजी बिब ङिंनु, खीजी क्हेमैंए फिर आशिक पिंब्मुँ। बिसि चु सैं तोंबै ताँ ङइ अरू क्ल्ह्योरै या बिल् त्हुम्। तलेबिस्याँ चुए ल्हागिर्न परमेश्वरजी ङ कुल्मिंब् ग।” 44 च्हौ बिसि खी यहूदीया ह्युलर्बै च्हों धिंजगोर परमेश्वरउँइँले खबै सैं तोंबै ताँ बिप्रइ। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.