योना 4 - परमेश्‍वरए ताँ तमु क्युइर

निनवेथेंमैंलाइ परमेश्‍वरजी ल्हयो खमा योना ह्रिस खब

¹ दिलेया चु ताँमैं योनाइ तिफुँइ आखोसि झन् बेल्‍ले ह्रिस खइ।

² झाइले चइ याहवेहने प्राथना लसि बिइ, “ओ याहवेह, ह्रोंसए ह्‍युलर मुँबै त्हेर ङइ बिब् धोंन् तइ, आङिं वा? छतसि ङ तर्शिशर ह्‍याबै सैं लइ, तलेबिस्याँ क्हि दयाम्हाँया लबै परमेश्‍वर ग, ल्हयो लमुँ, ह्रिस खबर क्हैमुँ धै बेल्‍ले थेबै म्हाँया लम्। धै नास लबै ताँउँइँले सैं एम् बिसि ङइ सेइमुँ।

³ छतसि ओ याहवेह, ङ तोगो क्हिने यो छ्युँ लमुँ, ङए सो ङउँइँले बोद्, ङए ल्हागिर सोब् भन्दा सिब छ्याँब तम्।”

⁴ छबिमा याहवेहजी बिइ, “ह्रिस खबै हग क्हिल् मुँ रो वा?”

⁵ झाइले योना सहरउँइँले त्होंसि सहरए पूर्वउँइँ मुँबै क्ल्ह्‍यो घ्रिर ह्‍यासि टिइ। चर चइ ह्रोंस टिबै प्ह्रों घ्रि लसि टिइ। च प्ह्रों न्होंर टिसि तारे चु सहरलाइ तो तब् मुँगे बिसि ङ्‍ह्‍योरिइ।

⁶ झाइले याहवेह परमेश्‍वरजी लौकाए धुँ घ्रि म्‍लोमिंइ। धै योनाए क्रर छरि तसि त्हिंयाँइ आख्रोंरिगे बिसि च धुँ बडिमिंइ। च लौकाइ छरि लमा योना बेल्‍ले सैं तोंइ।

⁷ दिलेया प्हन्हग्धों मि म्रोंबि छेमा परमेश्‍वरजी च लौकए धुँलाइ चबर प्हुँलुँ घ्रि कुलइ, धै प्हुँलुँइ धुँ थोवामा लौकए धुँ ङ्योंलोंयाइ।

⁸ झाइले त्हिंयाँ खमा परमेश्‍वरजी पूर्वउँइँले बेल्‍ले छबै खैं कुल्मिंइ। योनाए क्रर त्हिंयाँइ बेल्‍ले ख्रोंमा योना सैं आचि आचि तबर होंइ। धै “ङ सोब् भन्दा सिब छ्याँब तमल!” बिसि सैं च्योंब् लइ।

⁹ परमेश्‍वरजी योनाने बालु बिइ, “लौकाए धुँ सियामा क्हि च्हौ थेबै ह्रिस तले खल?” योनाइ बिइ, “ङ ह्रिस खब ठिक मुँ! ङ च्हौ ल्हें ह्रिस खइ ङ सिबर होंइ!”

¹⁰ याहवेहजी बिइ, “चु धुँलाइ क्हिइ रुँइँ आरुँइ, ताब् स्युइबै या आल। दिलेया क्हिइ तोइ दु:खै आलबै चु धुँ सियामा क्हि च्हौ थेबै न्हुँ लब् वा? चु धुँ म्हुँइँस तिरोर्न म्‍लोइ, धै म्हुँइँस तिरोर्न सियाइ।

¹¹ दिलेया निनवे सहरर छ्याँब आछ्याँब फेलल् आखाँबै लाख घ्रिसे ङ्हिस्यु हजार भन्दा ल्हें म्हिमैं मुँ, धै ख्योदोमैं या चर ल्हेंन् मुँ। च थेबै सहरए ल्हागिर ङइ न्हुँ लल् आत्हुब् आ?”