हिब्रू 2 - परमेश्‍वरए ताँ तमु क्युइर

ङ्यो जोगेमिंबै घ्‍याँ

¹ छतसि ङ्योइ तो ताँ थेइमुँ च ताँ झन् छेनाले थेल् त्हुम्। छेनाले आथेइ बिस्याँ ङ्योइ घ्‍याँ फ्लेयाम्।

² स्‍वर्गदूतमैंइ बिबै ताँ चारसि, आछ्याँबै के लब्मैंइ दण्ड योंइ बिस्याँ,

³ खोंयोंइ आखाँबै छ्ह पिंबै च्हौ थेबै मुक्‍तिलाइ तो धोंइ आङ्हाँस्याँ ङ्यो खैले परमेश्‍वरउँइँले स्योरल् खाँमुँ? चु मुक्‍तिए ताँ धाँसे ओंसों प्रभु येशूजीन् बिब् ग, धै खीए ताँ थेब्‍मैंइ चु ताँ क्ह्रोंसेंन ग बिसि ङ्योने उँइँमिंइ।

⁴ छलेन परमेश्‍वरज्‍यै या थे-थेबै चिनुमैंउँइँले प्लेटोयान् तबै औदिबै केमैं लइ, धै खीए सैंर मैंब् धोंले खीजी म्‍हिमैंलाइ पबित्र प्ल्हउँइँले बरदानमैं पिंसि चु ताँए ग्वाइ पिंइ।

परमेश्‍वरजी दे त्हेए ल्हागिर येशूलाइ स्‍वर्गदूत भन्दा च्‍योंबै क्‍ल्‍ह्‍योर थेंमिंइ

⁵ ङ्योइ ताँ लबै तारे खबै ह्‍युल परमेश्‍वरजी स्‍वर्गदूतमैंए योर आपिं।

⁶ परमेश्‍वरए छ्वेर्बै क्ल्ह्‍यो घ्रिर छ बिसि ग्वाइ पिंइमुँ: “म्‍हि तो जा, क्‍हिजी चए वास्ता लमुँ? म्‍हिए च्ह खाब् जा, क्हिजी खीए न्हुँ लमुँ?

⁷ क्‍हिजी खीलाइ दे त्हेए ल्हागिर स्‍वर्गदूतमैं भन्दा च्योंब लमिंइ। क्हिजी खीलाइ धबै थेब लमिंसि थेबै मान योंबै मुकुट कुमिंइमुँ।

⁸ क्हिजी ताँन् सै खीए प्हले न्होंर थेंमिंइ।” ताँन् सै खीए न्होंर थेंमिंमा खीउँइँले बैरु तोइ सैया आरेल। दिलेया तिंजोरो ताँन् सै म्हिमैंए न्होंर मुँब ङिइ आम्रों।

⁹ दिलेया ताँन् सै खीए न्होंर मुँ बिबै ताँ ङिइ सेइमुँ। दे त्हेए ल्हागिर खीलाइ स्वर्गदूतमैं भन्दा दे क्युरु लमिंइ, तलेबिस्याँ म्हिमैंए फिर्बै परमेश्‍वरए दयाम्हाँयाइ लमा म्हिमैंए पाप ख्रुमिंबै ल्हागिर खी दु:खले सिल् त्हुइ। दिलेया सिबइले खी धबै सोगों तसि खइ। छतसि परमेश्‍वरजी खीलाइ थेबै मानए मुकुट कुमिंइ।

¹⁰ परमेश्‍वरजी खीउँइँलेन् ताँन् सै बनेइ बनेबै ताँन् सै खीए ल्हागिर्न बनेइ। चु बेल्‍ले छ्याँब मुँल। परमेश्‍वरजी ल्‍हें सन्तानमैं खीने बालुन् मान योंबै क्ल्ह्‍योर पखबै ल्हागिर चमैंए मुक्‍ति पिंबै येशूलाइ ल्‍हें दुःख नोल् पिंसि म्हिमैंए पाप त्होमिंइ।

¹¹ तलेबिस्याँ म्हिमैंलाइ पबित्र लमिंबै येशू नेरो येशूजी पबित्र लमिंल् खाँबै म्हिमैं परवा घ्रिर्बैन् ग। छतसि चमैंने अलि बिबर येशू फा आपे।

¹² खीजी छ बिइमुँ, “ङए अलिमैंए उँइँर ङइ क्‍हिए मिं थेब् लब्‍मुँ, म्‍हि च्होंए म्‍हाँजोर ङ क्‍हिए मिं क्वेब्‍मुँ।”

¹³ अर्को क्‍ल्‍ह्‍योरै या खीजी बिइमुँ, “ङइ खीए फिर्न भर लमुँ।” अर्को क्‍ल्‍ह्‍योरै या खीजी बिइमुँ, “ङ्ह्‍योद्, ङ नेरो परमेश्‍वरजी ङलाइ पिंबै च्ह च्हमिंमैं।”

¹⁴ चु च्ह च्हमिंमैं से को कोंसि तबइले येशू या चमैं धोंलेन् से कोए ज्यु तइ। तलेबिस्याँ खी सिमिंसि कालए शक्‍ति मुँबै दुष्‍टलाइ (दियाबलस) नास लवाइ।

¹⁵ छले छ्ह तिगोंन् सिल् त्‍हुम् बिसि ङ्हिंरिबै म्हिमैंलाइ ङ्हिंबउँइँले फ्रेमिंइ।

¹⁶ तलेबिस्याँ क्ह्रोंसेंन खीजी स्‍वर्गदूतमैंला आङिं, अब्राहामए सन्‍तानमैं ल्हागिर चु के लमिंब् ग।

¹⁷ छतसि ताँन् सैर खी ह्रोंसए अलिमैं धोंबन् तल् त्हुइ, धै म्‍हिमैंए पाप त्होमिंसि क्षमा लबै ल्हागिर परमेश्‍वरए सेवा लबै ल्हागिर खी बिश्‍वास मुँब नेरो ल्हयो मुँबै ख्रो पिंबै खेगि क्रथे तइ।

¹⁸ तलेबिस्याँ खीजी ह्रोंसजीन् थेबै दुःख नोल् त्हुइ दिलेया दुःखलाइ खीजी ट्होवाइ, छतसि दुःख तब्मैंलाइ खीजी ल्होमिंल् खाँम्।