उत्पत्ति 31 - परमेश्वरए ताँ तमु क्युइरमामा लाबानए धिंइँले याकूब था आयोंन्ले त्होंह्याब 1 “ङ्योए आबाए तोन्दोंरि सै याकूबइ बोल् खाँइ, धै ङ्योए आबाए ताँन् सैमैंउँइँलेन् चइ च्हौ ल्हें सैमैं योंइमुँ,” बिसि लाबनए च्हमैंइ बिरिब याकूबइ थेइ। 2 झाइले चए फिर लाबनइ ओंसोंबै धोंले छेन् आलब याकूबइ म्रोंइ। 3 च लिउँइँ याहवेहजी याकूबने बिइ, “क्हिए खेमैं नेरो क्हिए ङ्हेब्-ट्हुब् ङाँर एह्याद्। ङ क्हिने तब्मुँ।” 4 छतसि राहेल नेरो लेआ ह्रोंसए र-क्युए बगाल मुँबै खर्कर याकूबइ त्होबर हुइ। 5 त्होसि चमैंने बिइ, “क्हेमैंए आबाए सैं ङने ओंसोंबै धों तब ङइ आम्रोंइमुँ। दिलेया ङए आबाए परमेश्वर ङने बालु मुँ। 6 ङए भोंइ खाँन् समा ङइ क्हेमैंए आबाए सेवा लब क्हेमैंइ सेइमुँ। 7 दिलेया क्हेमैंए आबाइ ङ लुइमुँ, ङए नों सै च्युखे फेर्दिइमुँ। दिलेया परमेश्वरजी चइ ङए न्होह्रों लल् आपिइमुँ। 8 लाबनइ ‘थोप्लेमैं ताँन् क्हिए केए नों सै तरिगे’ बिमा ताँन् बगालमैंइ थोप्लेमैंन् फिइ। धै ‘पेटारेमैं ताँन् क्हिए केए नों सै तरिगे’ बिमा ताँन् बगालमैंइ पेटारेमैंन् फिइ। 9 छले परमेश्वरजी क्हेमैंए आबाए र-क्युए बगालमैं चउँइँले किंसि ङलाइ पिंइमुँ। 10 “बगाल कोंबै त्हेर म्होदोए फिर क्रेबै बुग्यमैं पेटारे, थोप्ले नेरो छिर्केमिर्के तब ङइ म्होंडर म्रोंइ। 11 च त्हेर परमेश्वरए स्वर्गदूतइ म्होंडर ङने ‘ओ याकूब!’ बिमा ङइ ‘होइ, ङ चुर्न मुँ,’ बिइ। 12 “धै खीजी बिइ, ‘ङ्ह्योत्ति! बगलाए फिर क्रेबै ताँन् बुग्यामैं पेटारे, थोप्ले नेरो छिर्केमिर्के मुँ। तलेबिस्याँ लाबानइ क्हिए फिर लबै के म्रोंसि ङइ छ लब् ग। 13 क्हिइ युँमा क्योसि छ्युगु युसि भकल लबै क्ल्ह्यो बेथलर्बै परमेश्वर ङन् ग। तारे रेद्, चु क्ल्ह्योउँइँले क्हि फिबै क्ल्ह्योर एह्याद्।’” 14 च लिउँइँ राहेल नेरो लेआइ चने बिइ, “ङिए आबाए धिंर ङिए हगर्बै ङिइ योंल् त्हुबै सै तोइ मुँ रो वा? चइ ङिलाइ आगुए ह्युलर्बै म्हिमैं धोंन् मैंइमुँ आङिं वा? 15 चइ ङि चुँवाँइमुँ ङिलाइ पिंबै मुइ या चइन नुवाइमुँ। 16 ङिए आबा ङाँइले परमेश्वरजी बोयाबै ताँन् सै न्होर ङि नेरो ङिए प्हसेमैंल् तइमुँ। छतसि तारे परमेश्वरजी क्हिने तो-तो लद् बिइमुँ छान् लद्।” 17 च लिउँइँ याकूब रेसि ह्रोंसए च्हमैं नेरो प्ह्रेंस्योमैं सलुमैंए फिर थेंइ। 18 झाइले पद्दन-आरामर टिमा ह्रोंसइ योंबै ताँन् सै न्होर नेरो ह्रोंसए खेदोमैं ताँन् किंसि ह्रोंसए आबा इसहाक ङाँर कनान ह्युलउँइँ ह्याबर त्होंइ। 19 च त्हेर लाबान ह्रोंसए क्युए पै प्ह्रेबर ह्याल। आबा धिंर आरेबै मौका च्ह्यासि राहेलइ ह्रोंसए आबाए धिंर्बै देवतामैं ह्योसि बोइ। 20 च फिरै या मामा लाबानने याकूबइ स्योर तेइ, तलेबिस्याँ भौदिल् म्हैबै ताँ लाबानलाइ आबिल। 21 छले ह्रोंसने मुँबै तोन्दोंरि सै किंसि याकूब भौदिसि यूफ्रेटिस बिबै थेबै स्यों तर्दिसि गिलाद बिबै कोंउँइँ ह्याइ। लाबानइ याकूब ल्हाबोब 22 सोंरोर याकूब भौदिह्यान बिबै ताँ लाबानइ थेइ। 23 छतसि ह्रोंसए आघें-अलिमैं किंसि ङिरो समा याकूबलाइ ल्हाबोमा गिलाद बिबै कोंर चलाइ स्याइ। 24 दिलेया च म्हुँइँसर आरामि लाबान ङाँर परमेश्वर म्होंडर म्रोंयुसि चने बिइ, “न्ह क्रों मि क्रों तद्। क्हिइ याकूबने छ्याँब आछ्याँब तोइ आबिद्।” 25 लाबानइ याकूबलाइ स्यामा याकूबइ ह्रोंसए तम्बु गिलादए कोंर टौंदिल। छलेन लाबानज्यै ह्रोंसए आघें-अलिमैंने बालु तम्बु च क्ल्ह्योर्न टौंदिइ। 26 झाइले लाबानइ याकूबने बिइ, “क्हिइ ङ छल्दिसि ङए च्हमिमैं ल्हडेंउँइँले क्हा पखब्मैं धोंले पखब तले जा छ लब? 27 ङने तोइ आबिल्ले था आयोंन्ले भौदिसि क्हिइ तले ङ धोका पिंल? ङइ बीणा नेरो छिनछिन ह्रासि सैं तोंल्ले क्हि कुलमल। 28 ङए क्वें-क्वेंमिमैं नेरो च्हमिमैं कुलबै त्हेर तले म्वें लल् आपिंल? क्हिइ चु आछ्याँब के लइ। 29 क्हिए न्होह्रों लबै भों ङने मुँ। दिलेया क्हिए आबाए परमेश्वरजी तल् म्हुँइँसर ङने बिइ, ‘क्हि न्ह क्रों मि क्रों तद्। क्हिइ याकूबने छ्याँब आछ्याँब तोइ आबिद्।’ 30 छतसि तारे क्हिए आबाए धिंर ह्याबै सैं लसि क्हि प्रइमुँ ङइ क्होइ। दिलेया ङए धिंर्बै देवतामैं तले ह्योल?” 31 याकूबइ लाबानने बिइ, “क्हिए च्हमिमैं ङ ङाँइले क्हिइ प्हेंवाम् उ ङ्हाँसि ङ ङ्हिंइ। 32 दिलेया क्हिए देवतामैं खाब्ने बालु स्यामुँ च म्हि सिल् त्हुब्मुँ। छतसि ङने बालु क्हिए सै तो-तो मुँ च ङ्योए ङें-ट्हुब्मैंए ओंसों म्हैदु, धै योंस्याँ किंन्।” राहेलइ च देवतामैं ह्योब याकूबइ आसेल। 33 छबिमा लाबान याकूबए तम्बु न्होंर नेरो लेआए केब्स्यो ङ्हिंए तम्बु न्होंर होंइ। दिलेया च देवतामैं स्याल् आखाँ। धै लेआए तम्बुउँइँले त्होंसि राहेलए तम्बु न्होंर होंइ। 34 राहेल बिस्याँ आबाए धिं-देवतामैं किंसि ह्रोंसए सलुए काँठि न्होंर्बै बोरर झोंसि चए फिर टिरिल। लाबानइ तम्बुर खन्तोंदोंन् म्हैइ दिलेया च योंल् आखाँ। 35 राहेलइ ह्रोंसए आबाने बिइ, “आबा, क्हि ङने ह्रिस आखद् ओ। ङ क्होर्बै तइमुँ छतसि क्हिए ओंसों रेल् आखाँ।” छले चइ म्हैबम् म्हैइ दिलेया धिंर्बै देवतामैं योंल् आखाँ। 36 छतमा याकूब ह्रिस खसि लाबानलाइ हौदिसि बिइ, “ङइ क्हिला तो न्होह्रों लवाइ छले ङलाइ ल्हा प्रब? 37 ङए ताँन् सैमैं क्हिइ ङ्ह्योल् खाँइ। क्हिए धिंर्बै सैमैं तो योंइ खोइ? क्हि नेरो ङए ङे-ट्हुब्मैंए ओंसों चु ताँ थेंन्। चमैंइन ङ्योए न्होंर निसाफ लमिंरिगे। 38 “ङ्हिस्यु बर्ष ङ क्हिने बालुन् टिइ। च्हौ त्हे समा क्हिए र-क्युमैंए प्हसे खोंयोंइ आप्युल। क्हिए बगालर्बै क्युमैं ङइ आचल। 39 क्ह्योंर्बै चें भलुमैंइ र-क्यु सैवालै या चए सै ङइन नोसि चए साटोर अरू खेदोमैं ङइ पिंमल। त्हिंयाँर मुँले म्हुँइँसर मुँले म्हिमैंइ क्हिए खेदोमैं ह्योवास्याँ चए साटो या क्हिइ ङ ङाँइलेन् किंमल। 40 त्हिंइर्बै ख्वालबइ नेरो म्हुँइँसर्बै ङ्युँबइ ङलाइ बेल्ले दुःख तमल ङइ कति दुःख योंइ। ङ तिफुँइ न्हरु च्हुइल् आयोंमल। 41 क्हिए च्हमि ङ्हिंए ल्हागिर ङइ च्युसे प्लिदिं क्हिए के लइ। धै ट्हुदिं समा क्हिए बगालमैं छैं लइ। चु ङ्हिस्यु बर्ष समा छ लसिन् ङ क्हिए धिंर टिइ। दिलेया क्हिइ ङए नों सै आबडिमिं झन च्युखे फेर्दिइ। 42 ङए आबाए परमेश्वर, ङए बाज्यु अब्राहाम नेरो इसहाकए परमेश्वर ङने बालु आरेस्याँ क्ह्रोंसेंन क्हिइ ङए यो क्होत्तेन् कुल्मिंमल। दिलेया ङइ योंबै दुःख नेरो ङइ लबै के खीजी म्रोंइ। छतसि खीजी तल् म्हुँइँसर क्हिलाइ हौदिब् ग।” मामा लाबान नेरो भान्जा याकूबए न्होंर्बै बाछा 43 लाबानइ याकूबने बिइ, “चु च्हमिमैं ङए च्हमिमैंन् ग। चु कोलोमैं या ङए क्वेंमैं ग। चु बगालमैं या ङए बगालमैंन् ग। चुर क्हिइ म्रोंबै तोन्दोंरि सै ङलन् ग। दिलेया चु ङए च्हमिमैं नेरो चमैंइ फिबै च्ह-च्हमिमैंए फिर ङइ तो लल् खाँमुँ? 44 छतसि तारे खो, क्हि नेरो ङए न्होंर बाछा घ्रि फैले। छले ङ्योइ फैबै बाछा क्हि नेरो ङए म्हाँजोर साक्षि तरिगे।” 45 झाइले याकूबइ युँमा घ्रि पखसि त्हो धोंले क्योइ। 46 धै याकूबइ ह्रोंसए ङे-टहुमैंने “क्हेमैंज्यै युँमामैं पखो बिमा” चमैंइ युँमामैं पखसि थुप्रो लइ। धै च युँमाए थुप्रो ङाँर चमैंइ चब् थुँब् लइ। 47 लाबानइ च युँमाए थुप्रोए मिं “यगर-सहदूता” थेंइ। दिलेया याकूबइ चने “गलेद” बिइ। 48 लाबानइ याकूबने बिइ, “क्हि नेरो ङए म्हाँजोर बाछाए साक्षि तसि ङ्योए सैंर चु बाछा मैंल् लबर तिंयाँ चु युँमाए थुप्रो क्योइमुँ।” छतसि चए मिं गलेद थेंइ। 49 धबै लाबानइ चु ताँ या बिइ, “ङ्यो स्यो-स्यो तयालेया क्हि नेरो ङलाइ याहवेहजी ङ्ह्योरिगे।” छतसि च थुप्रोए मिं मिस्पा या मुँल। 50 लाबानइ याकूबने धबै बिइ, “खनिज्यै ङए च्हमिमैंए फिर क्हिइ आछ्याँब लइबिस्याँ धै चमैंए फिर अरू प्ह्रेंस्योमैं पखइबिस्याँ, ङने था आसेलेया, परमेश्वरजी क्हि नेरो ङलाइ ङ्ह्योरिमुँ। 51 क्हि नेरो ङए म्हाँजोर ङइ क्योथेंबै चु युँमाए थुप्रो नेरो त्हो ङ्ह्योद्। 52 चु थुप्रो नेरो त्हो साक्षि तरिगे। तारे चु थुप्रो ङ्वैसि क्हि ङाँर ङ न्होह्रों लबर क्योंजा खरिब् आरे। छलेन चु थुप्रो नेरो त्हो ङ्वैसि क्हि या ङ ङाँर तोइ न्होह्रों लबर चोंजा आखो। 53 क्हिए बाज्यु अब्राहाम नेरो ङए बाज्यु नाहोर नेरो चमैंए आबा तेराहए परमेश्वरजी ङ्योए म्हाँजोर निसाफ लरिगे।” छतसि याकूबइ ह्रोंसए आबा इसहाकए परमेश्वर साक्षि थेंसि कसम चइ। 54 झाइले याकूबइ कोंर क्यु सैसि ख्रो पिंइ, धै ह्रोंसए ङें-ट्हुब्मैं हुइसि चब्-थुँब् पिंइ। चमैंइ चब्-थुँब लसि च क्ल्ह्योर्न म्हुँइँस थोइ। 55 लाबान न्हाँगर्न रेसि ह्रोंसए क्वें-क्वेंमिमैं नेरो च्हमिमैं म्वें लसि आशिक पिंसि धिंर एह्याइ। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.