उत्पत्ति 23 - परमेश्वरए ताँ तमु क्युइरसारा सिब 1 सारा प्रसे ङ्हिस्युसे ङिदिं सोइ। 2 सारा कनान ह्युलर्बै किर्यत-अर्बा अथवा हेब्रोन बिबै सहरर सिइ। सारा सियाबइले अब्राहाम बेल्ले शोक तसि सिनु थेंबै क्ल्ह्योर ह्याइ। 3 अब्राहाम साराए सिनु मुँबै क्ल्ह्योउँइँले रेसि हित्तीमैंने छ बिइ, 4 “ङ अरू ह्युलउँइँले खसि क्हेमैंए म्हाँजोर टिइमुँ। ङए प्ह्रेंस्यो सियाइ। छतसि सिनु पाबै छगोंए ल्हागिर क्ल्ह्यो घ्रि ङने चुँन् ओ।” 5 हित्तीमैंइ अब्राहामने बिइ, 6 “ओ चिब, ङिए ताँ थेद्! ङिए म्हाँजोर क्हि ह्रब् सेब् नेरो चिब ग। छतसि ङिए छगोंमैं न्होंर ताँन् भन्दा छ्याँबै छगों त्हाँसि क्हिए प्ह्रेंस्योए सिनु पाद्। क्हिए प्ह्रेंस्योए सिनु पाबै क्ल्ह्यो आपिं बिसि ङिइ बिरिब् आरे।” 7 चमैंइ छ बिब् थेसि अब्राहाम हित्तीमैं ओंसों कुरसि चमैंलाइ फ्योइ। 8 धै चइ चमैंने छ बिइ, “ङए प्ह्रेंस्योए सिनु क्हेमैंए क्ल्ह्योर पाल् पिंम् बिस्याँ ङए ताँ घ्रि थेमिंन्। धै सोहोरए च्ह एप्रोनने ङए ताँ बिमिंन्। 9 चइ ह्रोंसए म्रों ङाँर मुँबै मक्पेला बिबै उ ङने चुँरिगे। क्हेमैं ताँनए उँइँर च उए सै किंरिगे धै च उए क्ल्हे ङ तरिगे।” 10 च त्हेर अब्राहामइ चु ताँ बिरिमा एप्रोन बिबै चिब या हित्तीमैंए च्हों धिंर सहरर्बै थेबै म्रार्न टिरिल। छतसि चर्बै ताँन् म्हिमैंइ थेल्ले एप्रोनइ अब्राहामने बिइ, 11 “ओ चिब, ङए ताँ थेद्! ङए म्रों नेरो म्रों ङाँर मुँबै उ क्हिलाइ पिंस्यो। ङए म्हिमैंए उँइँर्न ङइ च उ क्हिलाइ पिंस्यो। क्हिए प्ह्रेंस्योए सिनु चर्न पाद्।” 12 एप्रोनइ छबिमा अब्राहामइ धबै च ह्युलर्बै म्हिमैंलाइ मान लसि फ्योइ। 13 झाइले चइ चर्बै ताँन् म्हिमैंइ थेल्ले एप्रोनने बिइ, “गार आम्हाँदिल्ले ङए ताँ थेद् ओ। ङइ च क्ल्ह्योए सै क्हिलाइ पिंस्यो। च मुइ क्हिइ किंनु धै चर ङए प्ह्रेंस्योए सिनु पाल् योंरिगे।” 14 छबिमा एप्रोनइ अब्राहामने बिइ, 15 “ओ चिब, ङए ताँ थेद्! क्ल्ह्योए सै चाँदिए मुइ प्लिब्ब्र ग। दिलेया क्हि नेरो ङए न्होंर च तोइ आङिं! क्हिए प्ह्रेंस्योए सिनु चर्न पाद्।” 16 छबिमा अब्राहामइ एप्रोनए ताँ ङिंइ। छतसि चइ हित्तीमैंए उँइँर एप्रोनइ बिब् धों प्रेन् चाँदिए मुइ प्लिब्ब्र च त्हेर चल्दिबै पारइ क्वेसि पिंइ। 17 छले मम्रेए स्यार हारबै मक्पेलार मुँबै एप्रोनए म्रों नेरो चर मुँबै उ, सिधुँमैं ताँन् 18 एप्रोनइ च म्हि च्होंर खबै ताँन् म्हिमैं नेरो हित्तीमैंए उँइँर अब्राहामए मिंर लमिंइ। 19 च लिउँइँ अब्राहामइ ह्रोंसए प्ह्रेंस्यो सारा कनान ह्युलर हेब्रोनए चेंदो मुँबै मम्रे ङाँर्बै मक्पेलार्बै म्रों ङाँर्बै उर पाइ। 20 छले च म्रों नेरो चर मुँबै उ हित्तीमैंउँइँले छगोंए ल्हागिर अब्राहामए मिंर दर्ता तइ। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.