गलाती 4 - परमेश्वरए ताँ तमु क्युइर1 ङइ बिल् म्हैबै ताँ चुन् ग: हकवाला ताँन् सम्पत्तिए क्ल्हे तनाबिलेया च उमेर आयुन् समा केब्छैं धोंलेन् टिल् त्हुम्। 2 झाइले आबाइ तोक्दिबै त्हे समा च कोलो ङ्ह्योबै म्हिमैंए न्होंर टिल् त्हुम्। 3 च धोंलेन् ङ्यो या कोलो मुँन् समा चु ह्युलर्बै छ्यामैंए न्होंर मुँल। 4 दिलेया तोक्दिबै त्हे पूरा तमा परमेश्वरजी ह्रोंसए च्ह कुल्मिंइ। खी म्हि तसि च्हमिरिए कोखाउँइँले ठिमए न्होंर फिइ। 5 ङ्यो खीए प्हसेमैं तरिगे बिसि परमेश्वरजी ठिमए न्होंर टिब्मैंलाइ सै फोसि खाबै ल्हागिर ह्रोंसए च्हलाइ कुल्मिंइ। 6 क्हेमैं खीए प्हसेमैं तबइले परमेश्वरजी ह्रोंसए च्हए प्ल्ह ङ्योए सैंर कुल्मिंइमुँ। छतसि च प्ल्हउँइँले ङ्योइ परमेश्वरने “आबा, ओ ङए आबा” बिम्। 7 छतसि तारे क्हेमैं केब्छैं आङिं, क्हेमैं परमेश्वरए प्हसेमैं ग। धै क्हेमैं खीए प्हसेमैं तबइले खीजी क्हेमैंलाइ हगवालामैं या लमिंइमुँ। पावलइ गलातीमैंए ल्हागिर न्हुँ लब 8 ओंसों परमेश्वरलाइ ङो आसेमा क्हेमैं परमेश्वर आङिंबै देवतामैं म्हाँदिसि चमैंए न्होंर मुँल। 9 दिलेया तोगो क्हेमैंइ परमेश्वरलाइ ङो सेइमुँ - बिलन् त्हुमा: परमेश्वरजी क्हेमैंलाइ ङो सेइमुँ। परमेश्वर ङो सेसेया क्हेमैं तले ओंसोंन् म्हाँदिबै केर आफेबै सैमैंन् म्हाँदिसि धबै चु ह्युलर्बै छ्यामैंए न्होंर तदा ङ्हाँमुँ? 10 क्हेमैंइ अझै दिनमैं ङ्ह्योसि, बारमैं बार्दिसि, छ्याँब आछ्याँब म्हैंन ङ्ह्योसि, ल्हो क्ह्रिम् उ आक्ह्रि बिसि स्योंम्बै छ्यान् म्हाँदिम्! 11 छतसि ङ न्हुँ खइमुँ! ङए सैंरम् क्हेमैंए ल्हागिर ङइ के लब फाक्कर्न तइ ङ्हाँइमुँ। 12 ओ अलि-अङाँमैं, क्हेमैं या ङ धोंन् तद् बिसि ङइ क्हेमैंने यो छ्युँ लम्। तलेबिस्याँ ङै या क्हेमैं धोंन् तइमुँ। क्हेमैंइ ङए न्होह्रों तोइ आलइमुँ। 13 क्हेमैं ङाँर सैं तोंबै ताँ ओंसोंबै लार बिखमा ङ नरिल बिब क्हेमैंइ सेइमुँ। 14 ङ छले नसि क्हेमैंलाइ ल्हें दुःख पिंलेया तो तलै तरिगे बिसि क्हेमैंइ ङलाइ हेल आल, दिलेया परमेश्वरए स्वर्गदूत नेरो ख्रीष्ट येशूलाइन धोंले क्हेमैंइ ङलाइ म्हाँया लइ। 15 क्हेमैं च त्हेर बेल्ले सैं तोंल। ङइ क्हेमैंए ल्हागिर चु ग्वाइ पिंल् खाँम्: क्हेमैंइ पिंल् तबै सै मुँस्याँ क्हेमैंए मिइ या तेसि ङलाइ पिंमल! दिलेया तोगो तो तइ? 16 ङइ क्हेमैंने क्ह्रोसेंन्बै ताँ बिमिंबइले ङ क्हेमैंए शत्तुर तइ वा? 17 च स्योर ताँ लोमिंब्मैंइ क्हेमैंलाइ खेंमैं ङाँइ बोबै भों लम्, दिलेया क्हेमैंए फिर आछ्याँबै सैं मैंम्। चमैंइ बिबै ताँ क्हेमैंइ बेल्ले सैं तोंदै क्वेंरिगे बिसि चमैंइ क्हेमैंलाइ ङि ङाँइँले फ्रेसि बोल् म्हैम्। 18 छ्याँबै के लबर भों खब छ्याँब् ग। ङ क्हेमैं ङाँर मुँमा मत्त्रे आङिं, खोंयोंन् बिलै छाबै केमैं लरिल् त्हुम्। 19 ओ, ङए कोलोमैं, क्हेमैंए बानि ब्योर ख्रीष्टए बानि ब्योर धों आतन् समा सुत्केरि बेथा ल्हैदिसि नबै च्हमिरि धोंले ङए सैं नसिन् मुँ। 20 ङ तोगोन् क्हेमैं ङाँर मुँस्याँ ङइ छले ताँ लल् आत्हुमल। ङ तोगो क्हेमैं ङाँइले ह्रेंगो मुँ, छतसि क्हेमैंने खैले ताँ लल् त्हुम् बिसि ङ अलमल् तइमुँ। हागार नेरो साराए बारेर्बै ताँ 21 क्हेमैं ठिमए न्होंर टिदा ङ्हाँब्मैंइ ङने चु ताँ बिद्: ठिमइ तो बिइमुँ बिसि क्हेमैंइ आसेइमुँ वा? 22 अब्राहामल च्ह ङ्हिं मुँल। घ्रि खीए केब्स्यो ङाँइँले योंल, अर्को ह्रोंसए प्ह्रेंस्यो सारा ङाँइँले योंल बिसि परमेश्वरए छ्वेर प्ह्रिइमुँ। 23 केब्स्यो हागार ङाँइँले योंबै च्ह अब्राहामइ ह्रोंसए ज्युर्बै इच्छाउँइँले योंल। दिलेया ह्रोंसए प्ह्रेंस्यो सारा ङाँइँले योंबै च्ह बिस्याँ परमेश्वरजी च्ह पिंम् बिसि बाछा फैबइले योंल। 24 चु च्हमिरि ङ्हिंउँइँले ङ्योइ छले क्होल् खाँम्: च च्हमिरि ङ्हिंए मतलब बाछा ङ्हिं ग। हागार बिबै केब्स्योए मतलब सिनै बिबै कोंउँइँले युबै बाछा ग। च केब्स्योइ केब्छैं तल् त्हुबै प्हसेमैं फिल। 25 च सिनै बिबै कों अरब ह्युलर मुँ। हागारए मतलब तिंजोरोबै यरूशलेम ग। चर्बै ताँन् म्हिमैं ठिमए न्होंर मुँबइले केब्स्योए सन्तानमैं धोंन् तइ। 26 दिलेया स्वर्गर्बै यरूशलेम बिस्याँ खाँसों ङ्हाँन् तब मुँ। च ङ्योए आमा धों तब् ग। 27 च यरूशलेम ङ्हिंए बारेर परमेश्वरए छ्वेर छले प्ह्रिइमुँ, “ओ थरिस्योमैं, सैं तोंन्! ओ सुत्केरि बेथा सैदिल् आत्हुबै च्हमिरि, सैं तोंसि कै तेद्! तलेबिस्याँ प्युँ मुँबै च्हमिरिल् भन्दा प्युँइ वाबै च्हमिरिल् प्हसेमैं ल्हें तब्मुँ।” 28 ओ अलि-अङाँमैं, इसहाक धोंले ङ्यो या परमेश्वरजी फैबै बाछाउँइँले योंबै प्हसेमैं ग। 29 अब्राहामए ज्युर्बै इच्छाउँइँले केब्स्योइ योंबै च्हइ च त्हेर परमेश्वरए प्ल्हउँइँले योंबै च्हलाइ ह्रुगुदिल। च धोंलेन् तिंजोरो या छान् तम्। 30 दिलेया परमेश्वरए छ्वेर तो बिइमुँ बिस्याँ “केब्स्यो नेरो चए च्हलाइ ल्हावाद्, तलेबिस्याँ केब्स्यो ङाँइँले योंबै च्हइ, केब्स्यो आङिंबै प्ह्रेंस्यो ङाँइँले योंबै च्हइ योंब् धों तबै हक योंल् आखाँ।” 31 छतसि ओ ङए अलि-अङाँमैं, ङ्यो केब्स्योए प्हसेमैं आङिं, ङ्योम् केब्स्यो आङिंबै प्ह्रेंस्यो ङाँइँले योंबै प्हसेमैं ग। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.