प्रस्थान 35 - परमेश्‍वरए ताँ तमु क्युइर

प्रिबै त्हिंइर लल् त्हुबै ताँ

¹ मोशाइ इस्राएलर्बै ताँन् ह्रेंमैं खागु लसि बिइ, “क्हेमैंइ ललन् त्हुम् बिसि याहवेहजी पिंबै ताँ चुन् ग:

² क्हेमैंइ टुगैं समा के लद्, दिलेया ङिगैं क्हेमैंए ल्हागिर पबित्र ग। चु याहवेहए मिंर भों न्हबै त्हिंइ ग। खाबज्यै या च त्हिंइर के लइ बिस्याँ च म्हि सैवाल् त्हुम्।

³ प्रिबै त्हिंइर क्हेमैंए धिंर मि या आफुइद्।”

पबित्र तम्बुर चैदिबै सैंमैं

⁴ मोशाइ इस्राएलर्बै ताँन् म्हिमैंने बिइ, “ललन् त्हुम् बिसि याहवेहजी बिबै ताँ चुन् ग:

⁵ क्हेमैंइ याहवेहए मिंर भेटि पखो। भेटि पिंदा ङ्हाँब्मैंइ छाबै सैमैं पिंरिगे: मारा, चाँदि, काँसा;

⁶ मु रङर्बै क्वें, कलेजी रङर्बै क्वें, ओल्ग्या रु, नेरो छेनाले ख्रिंबै सुतिए क्वें; रए मुइ;

⁷ ओल्ग्या रङ झोंबै क्यु साँडए ट्हुबि, सिल ताँगए ट्हुबि; बबुल सिं;

⁸ बत्ति म्रोबै ल्हागिर छ्युगु; अभिषेक लबै छ्युगु नेरो लिंबै थाँ खबै धुप बनेबै मसलामैं;

⁹ एपोद नेरो तिंर खिबै क्वेंर जोड्दिबै आनिक्स नेरो अरू सै ल्हें फेबै रत्नमैं।

याहवेहए तम्बुए ल्हागिरबै सैमैं

¹⁰ “क्हेमैंए न्होंरि सिप मुँबै म्हिमैं ताँन् खसि याहवेहजी लबर ल्हैदिबै सैमैं बनेद्:

¹¹ पबित्र तम्बु, तम्बु स्युबै पाल, पाल टौंदिमा चैदिबै छत, अँङ्‍कुसिमैं फैलोमैं, बार थोबै सैमैं, त्होमैं, क्योबै क्ल्ह्‍योमैं;

¹² बाछा फैबै बकस, बकसर नोबै प्हरेमैं, बकसए क्हा नेरो पर्दा;

¹³ टेबल, टेबलर नोबै प्हरेमैं, टेबल बनेमा चैदिबै सैंमैं, परमेश्‍वर मिंर चडेबै क्हें;

¹⁴ बत्ति म्रोंबै पानस, दारमैं, नेरो बत्ति म्रोबै छ्युगु;

¹⁵ धुप म्रोबै क्ल्ह्‍यो, च क्ल्ह्‍यो नोबै प्हरेमैं, अभिषेक लबै छ्युगु, लिंबै थाँ खबै धुप; पबित्र तम्बुए म्रार्बै पर्दा;

¹⁶ मिइ ख्रोंबै ख्रो पिंबै क्ल्ह्‍यो, चए फिर तिबै काँसाए जालि, च नोबै प्हरेमैं, चैदिबै ताँन् सैमैं; प्हले ख्रुबै ल्हागिर क्यु झोंबै काँसाए बाटा, बाटाए प्हलेमैं;

¹⁷ पबित्र तम्बु कारग्युले थोबै पर्दामैं, च टौंदिबै त्होमैं, क्योबै क्ल्ह्‍योमैं, कारग्युले थोबै म्रार्बै पर्दा;

¹⁸ पबित्र तम्बु, कारग्युले थोबै काँटिमैं, छोमैं;

¹⁹ पबित्र क्ल्ह्‍योर सेवा लमा खेगिमैंइ खिबै क्वेंमैं, हारूनइ खेगि के लमा खिबै पबित्र क्वेंमैं नेरो हारूनए च्हमैंइ खेगि के लमा खिबै क्वेंमैं।”

म्हिमैए भेटि

²⁰ च लिउँइँ इस्राएलर्बै ताँन् म्हिमैं मोशा ङाँइँले ह्‍याइ।

²¹ सैं प्ल्हसि पिंदा ङ्हाँब्मैंइ पबित्र तम्बु बनेबै ल्हागिर चैदिबै सैमैं नेरो खेगिमैंइ खिबै क्वें टुबै ल्हागिर याहवेहए मिंर भेटिमैं पखइ।

²² सैं प्ल्हसि पिंदा ङ्हाँबै मुँयुँमैं नेरो च्हमिरिमैइ ल्हें खालर्बै माराए घानामैं, पिन, न्हखुमैं, च्यामैं, सिक्रिमैं सजेबै सैमैं पसि याहवेह मिंर थेंमिइ।

²³ खाब्ने बालु मु रङ, कलेजी रङ, ओल्ग्या रङइ रोबै रु, नेरो छेनाले ख्रिंबै सुति क्वें, रए पै, ओल्ग्या रङर्बै क्यु साँडए ट्हुबिमैं नेरो सिल ताँगए ट्हुबिमैं मुँल, च सैमैं पखइ।

²⁴ चाँदि नेरो काँसाए भेटि पिंब्मैंइ याहवेहए मिंर पखइ। सेवार चैदिबै बबुल सिं मुँब्मैंइ चन् पखइ।

²⁵ च्हमिरिमैंइ ह्रों-ह्रोंसइ पेरबै मु रङर्बै रु, कलेजी रङर्बै रु, ओल्ग्या रङर्बै रु नेरो छेनाले ख्रिंबै सुतिए क्वें पखइ।

²⁶ पै पेरल् ह्रबै च्हमिरिमैंइ रए मुइ पेरइ।

²⁷ चिबनाँबमैंइ एपोद नेरो तिंर खिबै क्वेंर जोड्दिबै आनिक्स नेरो अरू मणिमैं पखइ।

²⁸ बत्ति म्रोबै छ्युगु, अभिषेक लबै छ्युगु, छ्याँबै थाँ खबै छ्युगु, नेरो लिंबै थाँ खबै धुप बनेबै ल्हागिर मसला या पखइ।

²⁹ याहवेहजी मोशाने लबर ल्हैदिबै केमैंए ल्हागिर पिंदा ङ्हाँबै इस्राएलर्बै ताँन् मुँयुँमैं नेरो च्हमिरिमैंइ सैं तोंदै भेटि पखइ।

पबित्र तम्बु बनेबै म्हिमैं

³⁰ मोशाइ इस्राएलीमैंने बिइ, “थेद्, याहवेहजी यहूदा कुलर्बै हुरए क्वें ऊरीए च्ह बजलेललाइ त्हाँइमुँ।

³¹ खीजी चलाइ परमेश्‍वरए प्ल्हजी प्लिंमिंइमुँ, धै सिप, ज्ञान बुद्धि, नेरो तोन्दोंरि लल् ह्रब लमिंइमुँ।

³² मारा, चाँदि नेरो काँसार बुट्टा झोंब,

³³ हिरा थोब नेरो जोड्दिब, सिंर बुट्टा झोंब धै ताँन् खालर्बै केमैं लल् ह्रबै सिप खीजी चलाइ पिंइमुँ।

³⁴ च नेरो दानए कुलर्बै अहीसामाकए च्ह ओहोलीआबइ अरूमैंलाइ लोमिंरिगे बिसि याहवेहजी चमैंलाइ तोन्दोंरि लल् ह्रबै सिप पिंइमुँ।

³⁵ चमैंइ ताँन् खालर्बै भाँडार बुट्टा झोंब, मु रङर्बै क्वें, कलेजी रङर्बै क्वें, ओल्ग्या रङर्बै क्वें नेरो छेनाले ख्रिंबै सुतिए क्वें रोसि बुट्टा झोंबै केमैं छेनाले लल् खाँरिगे बिसि खीजी चमैंलाइ सिपमैं पिंइमुँ।”