Biblia Todo Logo
Bìoball air-loidhne

- Sanasan -

प्रस्थान 23 - परमेश्‍वरए ताँ तमु क्युइर


खाबै आफेलल्‍ले निसाफ लब

1 “स्योर ताँ आपोंन्। दुष्‍टलाइ जोगेब् बिसि स्योर ताँआपोंन्।

2 आगुए न्होह्रों लबर म्हि हुलने आत्हुँन्। मुद्दा तमा खाबल् म्हि ल्हें मुँ चए ख लसि आगुइ लबै निसाफ आन्होंन्।

3 ङ्हाँदु म्हि मुद्दार फेमा ‘च म्हि ङ्हाँदु ग,’ बिसि चए ख आलद्।

4 “क्हेमैंइ ह्रोंसए शत्तुरमैंए म्ये, गदा स्योरसि ह्‍यारिब म्रोंइ बिस्याँ, च खेदोलाइ क्ल्हे ङाँर समिंन्।

5 क्हेमैंए फिर ह्रिस लब्मैंए गदा तिइ प्लेवाब म्रोंस्याँ, चलाइ छलेन् आवाथेंन्, चलाइ रेबर ल्होद्।

6 “मुद्दा तमा ङ्हाँदु म्हिइ ठिक निसाफ योंल् पिंन्।

7 “स्योर ताँ तिफुँइ पोंसि छ्याब आल्हैदिद्। छ्याब् आरेबै म्हि नेरो स्योर आतेबै म्हिलाइ सिबै दण्ड आपिंन्, तलेबिस्याँ छ्याब् मुँबै म्हिलाइ ङइ खोंयोंन् बिलै छ्याब् आरे बिल् आखाँ।

8 ख्याब आचद्, तलेबिस्याँ ख्याबइ म्हिमैं मि आम्रोंब् लवाम्, धै चइ क्ह्रोंसेंन्बै ताँ आसे। छतसि छ्याब् आरेब्मैंइ निसाफ आयों।

9 “आगुए ह्‍युलर्बै म्हिमैंलाइ दुःख आपिंन्। क्हेमैं मिश्रर परदेशि तसि टिबइले आगुए ह्‍युलर टिब्मैंए सैं खैतब् तम् बिसि क्हेमैंइ सेइमुँ।


प्रिबै बर्ष नेरो त्हिंइर लल् त्हुबै ठिममैं

10 “टुदिं समा ह्रोंसए म्रोंर प्लु प्लुसि छाइले खबै रोमैं खुद्।

11 दिलेया ङिदिंर च क्ल्ह्‍यो आक्योल्‍ले बाँजोन् पिवाद्, च क्ल्ह्‍योउँइँले खबै रोमैं ङ्हाँदुमैंइ चरिगे। चमैंइ चसि ङैब क्ह्‍योंर्बै खेदोमैंइ चरिगे। क्हेमैंए अँगुरए ह्‍वे (बारि) नेरो जैतुनए ह्‍वे या छान् लद्।

12 “टुगैं समा के लद्, दिलेया ङिगैंर भों न्हद्, छ लस्याँ क्हेमैंए क्ल्या, गदा, क्हिए धिंर्न फिबै केब्छैं नेरो आगुए ह्‍युलर्बै म्हिमैंइ भों न्हल् योंब्मुँ।

13 “ङइ बिबै ताँन् ताँ क्हेमैंइ सैंर थेंन्। अरू देवतामैंए मिं या आकिंन्। क्हेमैंए सुँउँइँले देवतामैंए मिं या आकिंन्।


सोंलो चाडमैं
( प्रस्थान ३४:१८-२६ ; व्यवस्था १६:१-१७ )

14 “ङए मान लबर बर्षर सोंखे चाड म्हाँदिद्।

15 क्हेमैंइ प्लेढा आझोंबै क्हें चबै चाड म्हाँदिद्। ङइ क्हेमेंने बिब् धोंले आबीब म्हैंनर बिबै त्हेर ङिगैं समा प्लेढा आझोंबै क्हें चद्, तलेबिस्याँ चु म्हैंनर्न क्हेमैं मिश्र ह्‍युलउँइँले त्होंइ खब् ग। क्हेमैं ङ ङाँर खमा यो क्होत्‍ते आखो।

16 “अर्को, क्हेमैंइ म्रोंर प्लुसि खबै ओंसोंबै रो परमेश्‍वरए मिंर पिंसि बालि खैंबै चाड म्हाँदिद्। “अर्को, ह्रोंसइ रुँइँबै रो ह्रोंसए म्रोंउँइँले खुमा बालि ङ्‍हेरबै चाड म्हाँदिद्।

17 “क्हेमैंए ताँन् मुँयुँमैं बर्षर सोंखे याहवेहए उँइँर ह्‍याल् त्हुब्मुँ।

18 “ङलाइ खेदोए ख्रो पिंबै कोने प्लेढा झोंबै क्हें आचडेद्। “ङए ल्हागिर चाडर ख्रो पिंबै खेदोमैंए छि प्हन्हाँग समा आथेंन्।

19 “क्हेमैंए म्रोंर ताँन् भन्दा ओंसों रोबै छ्याँबै रो ह्रोंसए याहबेह परमेश्‍वरए धिंर पखो। “र बोक्याए से चए आमाए ङ्‍हेर आह्‍योद्।


स्वर्गदूतइ घ्याँ तयार लब

20 “ङ्‍ह्‍योद्, क्हेमैंलाइ घ्याँर जोगेबर नेरो ङइ तयार लबै क्ल्ह्‍योर क्हेमैंलाइ सथेंनेबर ङइ क्हेमैंए ओंसो-ओंसो स्वर्गदूत घ्रि कुलब्मुँ।

21 क्हेमैंइ चए ताँ छेनाले थेद्, तलेबिस्याँ चलाइ ङइ कुलब् ग। छतसि चए बिरोध आलद्, आस्याँ चइ क्हेमैंए पापमैं क्षमा लरिब् आरे।

22 क्हेमैंइ चइ बिबै ताँ ङिंसि ङइ बिब् धों लस्याँ, ङ क्हेमैंए ताँन् शत्तुरमैं नेरो बिरोधीमैंए बिरोध लब्मुँ।

23 ङए दूत क्हेमैंए ओंसो-ओंसो ह्‍यासि एमोरी, हित्ती, परिज्जी, कनानी, हिव्‍वि नेरो यबूसीमैंए ह्‍युलर क्हेमैं सथेंनेब्मुँ, धै ङइ चमैंए मिं क्ह्रन् मेटिमिंब्मुँ।

24 चमैंए देवतामैं पूजा लसि आफ्योद्, चमैंए छ्यार लब् धोंले आलद्, चमैंए देवतामैं फतिवाद्, चमैंए पबित्र युँमामैं या फतिवाद्।

25 क्हेमैंइ ह्रोंसए याहवेह परमेश्‍वरए सेवा लद्। छ लस्याँ ङइ क्हेमैंए रा-रोमैंर आशिक पिंब्मुँ, धै ङइ क्हेमैंए नब्-छब् सल् लमिंब्मुँ।

26 क्हेमैंए ह्‍युलर खाबै या प्हसे प्युलब नेरो थरि तरिब् आरे। ङइ क्हेमैंलाइ ह्रिंबै छ्ह पिंब्मुँ।

27 “क्हिए बिरोध लब्मैंलाइ ङए मान लबर ल्हैदिब्मुँ। क्हेमैं खाब् ह्रेंमैं ङाँर नेबर ह्‍यामुँ चमैं ताँनलाइ खेंमैंए न्होंर्न ङइ आक्ह्रिन् लवाब्मुँ, धै क्हेमैं ङाँइँले क्हेमैंए शत्तुरमैं ल्हाब्मुँ।

28 ङ क्हेमैंए ओंसों-ओंसों च्ह्‍युगु कुलब्मुँ‍, झाइले च च्ह्‍युगुइ क्हेमैंउँइँले हिव्वी, कनानी नेरो हित्तीमैंलाइ ल्हाब्मुँ।

29 दिलेया ङ चमैंलाइ तिदिं न्होंर्न क्हेमैं ङाँइले ल्हारिब् आरे, छ लस्याँ ह्‍युल सुन्य तब्मुँ, धै क्हेमैं भन्दा क्ह्‍योंर्बै खेदोमैं ल्हें तब्मुँ।

30 क्हमैंए म्हिमैं ल्हें तसि च ह्‍युल क्हेमैंइ क्ल्हे आलन् समा ङ चमैंलाइ दे-दे लसि क्हेमैं ङाँइँले ल्हाब्मुँ।

31 ङ क्हेमैंए ह्‍युलए साँध ओल्ग्या माँ ङ्युँइउँइँले पलिश्‍तिमैंए माँ ङ्युँइ समा छलेन क्यु आयोंबै क्ल्ह्‍योउँइँले यूफ्रेटिस स्यों समा तोक्दिमिंब्मुँ। च ह्‍युलर्बै म्हिमैंलाइ ङइ क्हेमैंए योर सुम्पिदिवाब्मुँ, धै क्हेमैंइ चमैंलाइ ल्हाब्मुँ।

32 चमैं नेरो चमैंए देवतामैंने क्ह्रिबै बाछा क्हेमैंइ आफैद्।

33 च म्हिमैंलाइ क्हेमैंए ह्‍युलर टिल् आपिंन्। टिल् पिंइ बिस्याँ क्हेमैंलाइ ङए बिरोधर पाप लबर ल्हैदिब्मुँ, तलेबिस्याँ क्हेमैंइ चमैंए देवतामैंए पूजा लइ बिस्याँ क्हेमैं जालर फेब्मुँ।”

© 2020, Wycliffe Bible Translators, Inc. All rights reserved.

Wycliffe Bible Translators, Inc.
Lean sinn:



Sanasan