प्रस्थान 12 - परमेश्वरए ताँ तमु क्युइरदुःखउँइँले फ्रेमिंबै चाड 1 मिश्र ह्युलर याहवेहजी मोशा नेरो हारूनने बिइ, 2 “चु म्हैंन क्हेमैंए ल्हागिर बर्षए ओंसोंबै म्हैंन तब्मुँ। 3 म्हैंनर्बै च्युगैंर क्हेमैं ताँनइ ह्रों-ह्रोंसए परवाए ल्हागिर ताँन् घराना अनुसार घ्रि-घ्रि र बोग्या पइ थेंरिगे बिसि इस्रालर्बै ताँन् म्हिमैंने बिद्। 4 म्हि घ्रिए घरानार र बोग्या घ्रि चबै म्हि च्युगुदे तस्याँ चइ ह्रोंसए ङ्हेब् ट्हुब्मैंने म्हिमैं च्योसे क्ह्रिरिगे। ताँन् म्हिमैंइ कति चम् बिसि र बोग्या च्योद्। 5 क्हेमैंइ त्हाँबै खेदो, र मुँले क्यु मुँले तोइ खोट आरेबै तिदिंर्बै पइ खो। 6 क्हेमैंइ च बोग्या म्हैंनर्बै च्युसे प्लिगैं समा थेंसि इस्राएलर्बै ताँन् म्हिमैंइ च ङेसा छजँ सैल् त्हुम्। 7 झाइले खा-खाबै धिंर च ख्रोए से चमुँ, चमैंइ च को म्राए न्होंरि फिरि नेरो क्होवाइ फोरिगे। 8 चमैंइ च म्हुँइँसर्न चए से मिर ख्रोंसि प्लेढा आझोंबै क्हें नेरो काँबै पिंट्हाने चरिगे 9 च से स्युन् आचद्, क्युर ख्वालसि आङिं, चए क्र प्हलेमैं नेरो न्होंर्बै सेमैं ताँन् बालुन मिर ख्रोंसि चद्। 10 च से न्हाँग समा आथेंन्, न्हाँग समा तोइ ङैस्याँ मिर ख्रोंवान्। 11 चु याहवेहजी दुःखउँइँले फ्रेमिंबै चाड ग। छतसि क्हेमैंइ फगि खिसि, प्हलेर जुत्ता खिसि, योर प्हरे किंसि यु-युनले चद्। 12 “च म्हुँइँसर ङ मिश्र तसि ह्याब्मुँ, धै मिश्रर्बै म्हि नेरो खेदोए ओंसों फिब्मैं सैवाब्मुँ, धै मिश्रर्बै ताँन् देवतामैंए बिरोधर ङइ निसाफ लब्मुँ। तलेबिस्याँ ङ याहवेह ग। 13 क्हेमैं टिबै धिंजरे च को क्हेमैंए ल्हागिर चिनु तब्मुँ। ङइ च को म्रोंसि क्हेमैंलाइ तोइ आलल्ले पिवाब्मुँ, ङइ मिश्रीमैं नास लमा क्हेमैंए फिर तोइ दुःख तरिब् आरे। 14 च चाड क्हेमैंए ल्हागिर म्लेसे म्लेल् आखाँबै त्हिंइ तब्मुँ, क्हेमैंइ च त्हिंइ याहवेहए ल्हागिर चाड म्हाँदिब्मुँ। क्हेमैंइ चु चाड पुस्ता पुस्ता समा लिउँज्यै या खोंयोंन् बिलै म्हाँदिब्रें लद्। प्लेढा आझोंबै क्हें चबै चाड 15 “क्हेमैंइ ङिगैं समा प्लेढा आझोंबै क्हें चद्। ओंसोंबै त्हिंइर्न क्हेमैंइ ह्रों-ह्रोंसए धिंउँइँले ताँन् प्लेढा भ्योंवाँन्। तलेबिस्याँ खाबइ ओंसोंबै त्हिंइउँइँले ङिगैं समा प्लेढा झोंबै क्हें चमुँ च म्हि इस्राएलउँइँले तेवाब्मुँ। 16 ओंसोंबै त्हिंइर नेरो ङिगैंर्बै त्हिंइर क्हेमैं खागु तसि ङए सेवा लद्। च त्हिंइ ङ्हिंर ताँन् म्हिमैंइ ह्योब् तेबै के मत्त्रे लद् अरू तोइ आलद्। 17 क्हेमैंइ प्लेढा आझोंबै क्हें चबै चाड म्हाँदिब्ब्रें लद्। तलेबिस्याँ चु त्हिंइर्न ङइ क्हेमैंए टोलि-टोलिलाइ मिश्रउँइँले पखब् ग। छतसि क्हेमैंइ चु चाड पुस्ता पुस्ता समा लिउँज्यै या खोंयोंन् बिलै म्हाँदिल् त्हुम्। 18 ओंसोंबै म्हैंनए च्युसे प्लिगैंए ङेसउँइँले ङ्हिच्युसे तिगैंए ङेसा समा प्लेढा आझोंबै क्हें चद्। 19 क्हेमैंए धिंर ङिगैं समा क्हेंर झोंबै प्लेढा थेंल् आत। खाबज्यै प्लेढा झोंबै सै चस्याँ च आगुए ह्युलर्बै म्हि मुँलेया इस्राएली मुँलेया च इस्राएलीमैं ङाँइँले तेवाब्मुँ। 20 ङिगैं समा क्हेमैंइ प्लेढा झोंबै क्हें आचद्। क्हेमैं खनिर टिलेया प्लेढा आझोंबै क्हें चल् त्हुम्।” दुःखने फ्रेबै चाड 21 झाइले मोशाइ इस्राएलर्बै ताँन् चिबनाँब्मैं हुइबर चमैंलाइ कुलसि छ बिइ, “ह्यासि ह्रों-ह्रोंसए परवा अनुसार घ्रि-घ्रि र-क्यु तो मुँलेया तेसि दुःखने फ्रेबै चाडर ख्रो पिंबर त्हाँसि सैद्। 22 हिसप धुँए ला भाँडार्बै कोर प्ल्हुँसि म्राए क्होवाइ नेरो त्हो ङ्हिंर प्राद्। क्हेमैं न्होंर खाबै या न्हाँग समा धिंर्बै म्राउँइँले बैरु आत्होंन्। 23 याहवेह मिश्रीमैं ल्हिबर चमैंए ह्युलजरे ह्यामा म्रा फिर नेरो त्हो ङ्हिंर खीजी को म्रोंब्मुँ झाइले च म्रा वाथेंसि नास लबै सै क्हेमैं सैबर धिं न्होंर होंल् आपिं। 24 क्हेमैंइ चु ताँ खोंयोंन् बिलै तरिबै रोस घ्रि धोंले ह्रोंस नेरो ह्रोंसए लिउँइँबै सन्तानए ल्हागिर म्हाँदिद्। 25 याहवेहजी बाछा फैसि पिंम् बिबै ह्युलर क्हेमैं होंमा क्हेमैंइ चु चाड म्हाँदिद्। 26 क्हेमैंए च्ह-च्हमिमैंइ ‘चु चाडए अर्थ तो जा’ बिसि ङ्योएस्याँ, 27 ‘चु याहवेहजी दुःखउँइँले फ्रेमिंबै चाडए ख्रो ग। मिश्रर मुँबै इस्राएलीमैंए धिंजरे ह्यासि खीजी मिश्रीमैंलाइ ल्हिमा ङ्योए धिं पिथेंल।’” च ताँ थेसि म्हिमैं ताँनइ क्र कुरसि खीए सेवा लइ। 28 झाइले याहवेहजी मोशा नेरो हारूनने बिब् धोंले इस्राएलीमैंइ ताँन् लइ। १०. च्ह थेब सैवाबै दु:ख 29 झाइले राजगद्दिर टिबै फारोए च्ह थेबउँइँले किंसि झेलर मुँब्मैंए च्ह थेब, खेदोमैंए ओंसो फिब नेरो मिश्रर्बै च्ह थेब्मैं ताँन् याहवेहजी च म्हुँइँस आधार सैवाइ। 30 फारो चए के लब्मैं नेरो मिश्रीमैं ताँन् म्हुँइँसर्न रेइ। मिश्रर बेल्ले क्रोब्-म्होब तइ, तलेबिस्याँ चर च्ह थेब आसिबै धिं घ्रि या आरेल। 31 छतमा फारोइ म्हुँइँसर्न मोशा नेरो हारून हुइबर कुलसि बिइ, “क्हेमैं नेरो इस्राएलीमैं ताँन् ङए म्हिमैंए म्हाँजोउँइँले त्होंइ ह्याद्, धै क्हेमैंइ बिब् धोंलेन् याहवेहए सेवा लद्। 32 क्हेमैंइ बिब् धोंलेन् ह्रों-ह्रोंसए र-क्यु नेरो खेदोमैं किंसि ह्याद्। ङलाज्यै आशिक पिंन्।” 33 मिश्रीमैंइ इस्राएलीमैंलाइ युनन् खेंमैंए ह्युलउँइँले कुलबै सैं लइ। “चुमैंलाइ युनन् आकुलस्याँ ङि ताँन् सिब्मुँ,” बिसि चमैंइ बिइ। 34 छतमा इस्राएलीमैंइ ह्रों-ह्रोंसए चेंबै प्रोर प्लेढा आझोंबन् थेंसि चमैंइ ह्रों-ह्रोंसए प्रो चेंबै भाँडामैं क्वेंर म्होरसि प्हैंदर थेंइ। 35 मोशाइ बिब् धोंले इस्राएलीमैंइ लइ, चमैंइ मिश्रीमैंने मारा चाँदिए घाना नेरो क्वेंमैं या ह्रिइ। 36 याहवेहजी मिश्रीमैंइ इस्राएलीमैंए फिर ल्हयो खन् लमिंइ। छतमा चमैंइ ह्रिबै ताँन् सै मिश्रीमैंइ पिंइ। छले चमैंइ मिश्रीमैंए सै न्होर बोयाइ। इस्राएलीमैंइ मिश्र ह्युल पिथेंब 37 इस्राएलीमैं रामसेसउँइँले प्रसि सुक्कोत बिबै क्ल्ह्योर ह्याइ। प्हलेइ प्रब्मैं च्हमिरिमैं नेरो कोलोमैं पिसि लाख टुदे मुँल। 38 चमैंने बालु अरू म्हिमैं र-क्यु नेरो खेदोमैं या बोइ। 39 चमैंइ ह्रोंसने बालु मिश्रउँइँले पखबै चेंबै प्रोला प्लेढा आझोंल्ले क्हें बनेइ। तलेबिस्याँ चमैं मिश्रउँइँले ल्हामा ह्रोंसए ल्हागिर चबै सैमैं बनेबै त्हे आयोंल। 40 इस्राएलीमैं मिश्रर प्लिब्रासे सोंच्यु बर्ष समा टिल। 41 प्लिब्रासे सोंच्यु बर्ष तबै त्हिंइर्न याहवेहए ताँन् म्हिमैं मिश्रउँइँले त्होंइ। 42 मिश्रउँइँले चमैं तेइ पखबर च म्हुँइँसर याहवेह न्हरु आच्हुइल्ले चमैं म्रोंइ। छतसि इस्राएलीमैं या च म्हुँइँसर न्हरु आच्हुइल्ले पुस्ता पुस्ता समा याहवेहए मान लरिगे। याहवेहजी दुःखउँइँले फ्रेमिंबै चाडर लल् आतबै ताँमैं 43 याहवेहजी मोशा नेरो हारूनने बिइ, “दुःखउँइँले फ्रेमिंबै चाडर लल् त्हुबै ताँमैं चुन् ग: आगुए ह्युलर्बै म्हिमैंइ ख्रो पिंबै सेमैं आचरिगे। 44 दिलेया किंसि पखबै केब्छैंमैंइ ज्युर चिनु लल् खाँइ बिस्याँ च चरिगे। 45 आगुए ह्युलर्बै म्हि नेरो नों सै फोसि थेंबै केब्छैंइ च आचरिगे। 46 “चब् थुँब् ह्योब् तेब् लबै धिंर्न च चल् त्हुम्, चए से धिंउँइँले बैरु आबोद्, चए ह्रुइब घ्रि या आचोद्। 47 इस्राएलर्बै ताँन् म्हिमैंइ चु ताँमैं ललन् त्हुम्। 48 दिलेया क्हिने बालु आगुए ह्युलर्बै म्हि खाबै मुँस्याँ, चइ दुःखउँइँले फ्रेमिंबै चाड म्हाँदिबै सैं लस्याँ चए धिंर्बै ताँन् मुँयुँमैंइ ट्हुबिर चिनु लल् त्हुम्। छलमा चइ च ह्युलर्न फिब धोंले च चाड म्हाँदिल् खाँम्। ट्हुबिर चिनु आलबै म्हिइ च आचरिगे। 49 च ह्युलर्बै म्हिमैं नेरो आगुए ह्युलर्बै म्हिए ल्हागिर ठिम घ्रिन् म्हाँदिल् त्हुब्मुँ।” 50 याहवेहजी मोशा नेरो हारूनने बिब् धोंलेन् ताँन् इस्राएलीमैंइ लइ। 51 याहवेहजी इस्राएलीमैंलाइ टोलि-टोलि लसि मिश्रउँइँले च त्हिंइर्न तेसि पखइ। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.