एफिसी 4 - परमेश्वरए ताँ तमु क्युइरक्ह्रिसि टिबै भों लद् 1 प्रभुए ल्हागिर के लबइलेन् ङ झेलर टिल् त्हुइमुँ, दिलेया ङ क्हेमैंने यो छ्युँ लमुँ: क्हेमैं परमेश्वरजी त्हाँबै म्हिमैं ग। छतसि क्हेमैं छ्याँबै बानि ब्योरउँइँले छ्ह थोद्। 2 थेब् आप्हैंन्, च्योंब् तसि ह्रिस आखल्ले घ्रिइ घ्रिलाइ सैदिसि म्हाँया लद्। 3 धै पबित्र प्ल्हजी पिंबै शक्तिउँइँले क्हेमैं छ्याँबै सैंले क्ह्रिसि टिबै भों लद्। 4 ज्यु घ्रिन् मुँ, पबित्र प्ल्ह या घ्रिन् मुँ। च धोंलेन् परमेश्वरजी ङ्योलाइ पिंबै आशा या घ्रिन् मुँ। 5 प्रभु घ्रि मुँ, बिश्वास लबै घ्याँ घ्रिन् मुँ, बप्तिस्मा किंबै मतलबै या घ्रिन् मुँ, 6 ताँन् म्हिमैंए परमेश्वर आबा घ्रिन् मुँ। खीन् ताँनए प्रभु ग, खीजीन् ताँन् म्हिमैंउँइँले के लम्, खी ताँन् म्हिमैंए सैं न्होंरि मुँ। 7 दिलेया प्रभु येशू ख्रीष्टजी ङ्योलाइ आशिक पिंबइले ङ्यो ताँनइ स्यो-स्योबै बरदान योंइमुँ। 8 परमेश्वरए छ्वेर छले प्ह्रिइमुँ: “खी नुबर क्रे ह्यामा म्हिमैंलाइ पापर च्होवाबै सैमैंलाइ खीजी ह्रोंसनेन् बोइ, धै म्हिमैंलाइ बरदानमैं पिंइ।” 9 खी “नुबर क्रे ह्याइ” बिबै ताँए मतलब खी ह्याब् भन्दा ओंसों खी चु पृथ्बीर युसि चए क्रों समा फेनेइ। 10 चु पृथ्बीर तयुबै म्हि (येशू) ताँन् स्वर्गमैं भन्दा कैंडो क्रेयाइ। तारे खीजी ह्युलर मुँबै ताँन् सैमैं खीए सैंर मैंब् धोंलेन् तल् पिंम्। 11 खीजी पिंबै बरदानमैं ल्हें खालर्बै मुँ। कोइलाइ कुल्मिंबै चेला चिब तबर, कोइलाइ अगमबक्तामैं तबर, कोइलाइ सैं तोंबै ताँ बिप्रबर, कोइलाइ खीए म्हिमैंलाइ प्ह्रोंछैंमैंइ धोंले छेनाले छैं लबर नेरो कोइलाइ खीए ताँ लोमिंबर खटिदिइ। 12 ख्रीष्टए ज्यु बडिबै ल्हागिर परमेश्वरए ताँन् म्हिमैंइ खीए के लरिगे बिसि ख्रीष्टजी छाबै बरदानमैं पिंइ। 13 छतसि ताँन् बालु तसि ङ्योइ परमेश्वरए च्हए फिर छेन्ले बिश्वास लब्मुँ, खीलाइ छेनाले ङो सेब्मुँ। धै ङ्यो च्हैंब् मैंब् लल् खाँब्मैं तसि ङ्यो ख्रीष्ट धोंन् तब्मुँ। 14 धै ङ्यो कोलोमैं धों तरिब् आरे। म्हिमैंइ स्योर तेसि स्यो स्योबै ताँ लोमिंन बिलेया ङ्योइ च्हैब् मैंब् लल् खाँसि सैं ङ्हिं तरिब् आरे। च म्हिमैंइ लुसि स्योलिबै ताँ लोमिंलेया ङ्योइ क्वेंरिब् आरे। 15 बरु ङ्योइ म्हाँया लसि खोंयोंइन क्ह्रोंसेंन्बै ताँ पोंसि ङ्यो तोन्दोंरि सैर बडिसि बिश्वासीमैंए क्र ख्रीष्ट धोंन् तल् त्हुम्। 16 खीए न्होंर ज्युर्बै ताँन् भाग क्ह्रिसि टिइमुँ। खीजी ज्युर्बै ताँन् भाग गैंदिसि ठिक ठिक क्ल्ह्योर थेंइमुँ। झाइले ताँन् भागइ खेंमैंइ लल् त्हुबै केमैं लइ बिस्याँ ताँन् ज्यु म्हाँयार बडिदै ह्याम्। ख्रीष्टने घ्रिन् तसि छारा छ्ह थोब 17 छतसि प्रभुए मिंर ङ क्हेमैंने चु ताँ बिमुँ, परमेश्वर आम्हाँदिब्मैं ह्रोंसए सैंर मैंबै आछ्याँबै केर आफेबै ताँमैंए लिलि प्रब् धोंले तारे क्हेमैं आप्रद्। 18 चमैं तोइ च्हैंब-मैंब् लल् आखाँब्मैं तयाइमुँ। चमैंए सारो सैंउँइँले त्होंबै केर आफेबै ताँमैंइ लमा परमेश्वरजी पिंबै छ्ह चमैंइ आयों। 19 चमैंए सैं सारो तबइले चमैंइ तो धोंइ आङ्हाँन्ले तो लदा ङ्हाँमुँ चन् लप्रम्। 20 दिलेया ख्रीष्टउँइँलेम् क्हेमैंइ छाबै ताँमैं आलोइमुँ। 21 क्हेमैंइ येशू ख्रीष्टउँइँले खबै ताँ थेइ, आङिं वा? खीउँइँले परमेश्वरए बारेर्बै क्ह्रोंसेंन्बै ताँ क्हेमैंइ सेइमुँ। 22 छतसि ह्रोंसलाइ नास लवाबै ओंसोंबै धों तबै आछ्याँबै केमैं लबै बानि ब्योर क्हेमैंइ पिवाद! 23 तारे पबित्र प्ल्हजी क्हेमैंए सैं छारा लमिंरिगे। 24 झाइले छारा छ्याँबै क्वें खिब् धोंले परमेश्वरल् धों तबै छ्याँबै बानि ब्योर क्हेमैंल् तरिगे। 25 छतसि तारे पिरु स्योर आतेद्। ङ्यो ताँन् प्रभु येशू ख्रीष्टए ज्युए भागमैं ग। छतसि ह्रोंसए बिश्वासी अलिमैने क्ह्रोंसेंन्बै ताँ पोंल् त्हुम्। 26 ह्रिस खनाबिलेया पाप केमैं आलद्। ह्रिस खलेया त्हिंयाँ लिब् भन्दा ओंसोंन् क्हेमैंए ह्रिस म्हल् त्हुम्। 27 दुष्टलाइ मौका आपिंन्। 28 ह्योब्मैंइ तारेपिरु आह्योरिगे, बरु चमैंइ ह्रोंसए योइ बेल्ले दुःखले के लरिगे धै खाँचो तब्मैंलाइ पिंल् खाँरिगे। 29 आछ्याँबै ताँ क्हेमैंए सुँउँइँले आत्होंरिगे, बरु थेब्मैंलाइ आशिक खल्ले आगुलाइ छ्याँबै घ्याँर डोरेबै छ्याँबै ताँमैं मत्त्रे पोंब्रें लद्। 30 परमेश्वरए पबित्र प्ल्हलाइ सैं नल् आलद्। परमेश्वरजी आखिरि त्हिंइर स्वर्गर बोबै ल्हागिर खीजी क्हेमैंए फिर ह्रोंसए पबित्र प्ल्हजी छाप ल्हैदिइमुँ। 31 ताँन् खालर्बै आछ्याँबै ताँमैं, ह्रिस खब, ह्रिस लब, गाल् केब, प्होंगि कैगि लब पिवाद्। 32 धै परमेश्वरजी ख्रीष्टर क्हेमैंलाइ क्षमा लब् धोंले क्हेमैंज्यै या घ्रिइ घ्रिलाइ क्षमा लसि घ्रिइ घ्रिए फिर सैं प्ल्हसि ल्हयो खद्। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.