चेला चिब्मैंए केमैं 3 - परमेश्वरए ताँ तमु क्युइरडुँड् म्हि सल् लमिंब 1 तिगें त्हिंइर्बै सों ह्रामा प्राथना लबै त्हे तसि पत्रुस नेरो यूहन्ना मन्दिरर ह्यारिल। 2 च त्हेर म्हिमैंइ फिब् ओंनोंबै डुँड् तबै म्हि घ्रिलाइ नोसि पखमल। मन्दिर न्होंर खब्मैंने भिक् ह्रिरिगे बिसि म्हिमैंइ च म्हि त्हिंइ ह्रोंसे मन्दिरर्बै “छ्याँबै मिं” बिबै म्रार पखसि थेंमिंब्रें लमल। 3 पत्रुस नेरो यूहन्ना मन्दिर न्होंर होंल् म्हैब् म्रोंसि चइ मुइ ह्रिइ। 4 चमैंइ च ङाँइ ङ्ह्योसि बिइ, “ङि ङाँइ ङ्ह्योद्।” 5 चमैंउँइँले तोइ योंम् उ ङ्हाँसि चइ चमैं ङाँइ ङ्ह्योइ। 6 झाइले पत्रुसइ चने बिइ, “ङने मारा चाँदि आरे, दिलेया ङने तो मुँ चन् ङइ क्हिलाइ पिंस्यो। नासरतर्बै येशू ख्रीष्टए मिंर रेसि प्रह्याद्।” 7 छ बिसि पत्रुसइ चए क्योलो योर क्हासि रेमिंबै तोंदोंन् चए प्हलेमैं नेरो च्हि गाँठोजरे भों खइ। 8 झाइले च जुरुक्कन् रेसि प्रबर होंइ, धै उफर्दिदै न्हेदै परमेश्वरए मिं क्वेदै चमैंने बालु मन्दिरर होंइ। 9 चइ परमेश्वरए मिं क्वेदै प्ररिब ताँन् म्हिमैंइ म्रोंइ। 10 मन्दिरर्बै छ्याँबै म्रार क्होएसि टिरिबै म्हि चुन् ग बिसि चमैंइ सेइ। धै च म्हि खैले प्रल् खाँब् तगे बिसि चमैं प्लेटोयाइ। पत्रुसइ मन्दिरर येशूए बारेर लोमिंब 11 छले च म्हिइ पत्रुस नेरो यूहन्ना क्हाब् म्रोंसि ताँन् म्हिमैं प्लेटोयासि सोलोमन बिबै ठाँटिर चमैं ङाँर न्हेखइ। 12 चु म्रोंसि पत्रुसइ म्हिमैंने बिइ, “ओ इस्राएलीमैं, चु ताँर क्हेमैं तले अचम्मा ङ्हाँल? ङिइ ह्रोंसए शक्ति अथवा भक्तिउँइँले चु म्हिलाइ प्रल् खाँब् लमिंइ बिसि क्हेमैं तले ङिलाइ ङ्ह्योबै ङ्ह्योबन् लरिल? 13 अब्राहाम, इसहाक नेरो याकूबए परमेश्वर, ङ्योए खेमैंए परमेश्वरजी ह्रोंसए सेवा लबै येशूलाइ कति थेब लमिंइ। दिलेया क्हेमैंइ खी क्हासि सैबर पिलातसलाइ पिंवाइ। पिलातसइ खीलाइ पिमिंबै सैं ललेया क्हेमैंइ पिलातसए उँइँर्न खीए बिरोध लसि खीलाइ पिल् आपिं। 14 क्हेमैंइ पबित्र नेरो छ्याब आरेबै म्हिलाइ पिल् आपिंसि खीए क्ल्ह्योर म्हि-सैलाइ पिमिंन् बिइ। 15 झाइले म्हिमैंलाइ खोंयोंन् बिलै आखाँबै छ्ह पिंबै येशू क्हेमैंइ सैवाइ। दिलेया परमेश्वरजी खीलाइ सिबउँइँले धबै सोगों लमिंइ। चु ताँ ङिइ म्रोंइमुँ। 16 क्हेमैंइ ङो सेबै चु सबै म्हिइ येशूए मिंए फिर बिश्वास लबइले खीजी चुलाइ भोंब् लमिंइ। धै क्हेमैं ताँनए उँइँरि छेनाले सल् लमिंइ। 17 “ओ आघें अलिमैं, क्हेमैं नेरो क्हेमैंए चिबनाँब्मैंइ येशू खाब् जा बिब् आसेसि खीलाइ सैइ बिब ङइ सेइमुँ। 18 ओंसोंन् ख्रीष्टजी दुःख नोल् त्हुम् बिसि ताँन् अगमबक्तामैंउँइँले परमेश्वरजी बिबै ताँ खीजी छले पूरा लइ। 19 छतसि खीजी क्हेमैंए पाप ख्रुमिंरिगे, खीउँइँले क्हेमैं छिं ङ्हाँन् योंरिगे, झाइले खीजी क्हेमैंए ल्हागिर ओंसोंन् त्हाँबै म्रुँ ख्रीष्ट येशू कुल्मिंरिगे बिसि 20 क्हेमैंइ पाप लब पिसि परमेश्वर ङाँइ सैं एद्। 21 दिलेया स्योंमन् परमेश्वरजी ह्रोंसए ताँ बिमिंबै पबित्र म्हिमैंइ बिब् धोंले तोन्दोंरि सैमैं छारा लबै त्हे आखन् समा ख्रीष्ट स्वर्गर्न टिल् त्हुम्। 22 मोशाइ या छ बिल, ‘क्हेमैंए याहवेह परमेश्वरजी ङलाइ त्हाँब् धोंले क्हेमैंए आघें अलिमैंए म्हाँजोउँइँले अगमबक्ता घ्रि क्हेमैंए ल्हागिर त्हाँब्मुँ। खीजी क्हेमैंने बिबै ताँमैं क्हेमैंइ थेलन् त्हुम्। 23 च म्हिइ बिबै ताँ आथेब्मैं परमेश्वरए म्हिमैंउँइँले स्यो लवासि ताँन् नास तयाब्मुँ।’ 24 शामूएल नरो चए लिउँइँबै अगमबक्तामैं ताँनइ तिंजोरो तरिबै ताँमैंए बारेर बिल। 25 अगमबक्तामैं नेरो परमेश्वरजी क्हेमैंए खेमैंने फैबै बाछा क्हेमैंए ल्हागिर्न ग। खीजी अब्राहामने बिइ, ‘क्हिए सन्तानउँइँलेन् ह्युलर्बै ताँन् ह्रेंमैंइ आशिक योंब्मुँ।’ 26 क्हेमैंलाइ ह्रोंसए आछ्याँबै केमैंउँइँले एपखसि आशिक पिंबै ल्हागिर परमेश्वरजी ह्रोंसए सेवा लबै म्हि त्हाँसि ताँन् भन्दा ओंसों क्हेमैं इस्राएलीमैं ङाँर कुल्मिंइ।” |
© 2020, Wycliffe Bible Translators, Inc. All rights reserved.
Wycliffe Bible Translators, Inc.