२ कोरिन्थी 9 - परमेश्वरए ताँ तमु क्युइरबिश्वासी अलिमैंलाइ ल्होब 1 यहूदीया ह्युलर्बै बिश्वासीमैंए ल्हागिर पिंबै भेटिए बारेर ङइ क्हेमैंलाइ प्ह्रिरिल् आत्हु। 2 तलेबिस्याँ क्हेमैंइ पिंबै सैं मुँ बिब ङइ सेइमुँ। छतसि ङइ माकेडोनिया ह्युलर्बै म्हिमैंने क्हेमैंए बारेर छ्याँबै बयन लसि छ बिइ, “अखैया ह्युलर्बै अलिमैं तुग्युम् ओंनोंन् भेटि रेसि ल्होबर तयार तइमुँ।” आगुलाइ ल्होबै ल्हागिर क्हेमैंइ सैं थेब् लब् म्रोंसि म्हिमैं या छाबन् के लबर भों खइमुँ। 3 दिलेया ङिइ क्हेमैंए बारेर प्हैंसि पोंब स्योलिन् आतरिगे, धै ङइ चुर बिब् धोंलेन् क्हेमैंइ मुइ रेरिगे बिसि ङइ च अलिमैंलाइ ङ खब् भन्दा ओंसों क्हेमैं ङाँर कुल्मिंइमुँ। 4 तलेबिस्याँ माकेडोनियार्बै म्हिमैं ङने बालु क्हेमैं ङाँर खमा क्हेमैं तयार आतब् स्यास्याँ ङि बेल्ले फा पिन् तब्मुँ, क्हेमैं या फा पिन् तब्मुँ, तलेबिस्याँ क्हेमैंइ खैले बिलै मुइए तौदु लम् बिब ङिए सैं मुँ। 5 छतसि क्हेमैंइ पिंम् बिबै भेटि ङि खब् भन्दा ओंसोंन् रेसि थेंरिगे बिसि चु अलिमैं सों ओंसोंन् कुलबै सैं खइ। क्हेमैंइ च भेटि करइ पिंब आङिं, सैं तोंदै पिंबै भेटि तब्मुँ। 6 खाबइ च्युगुदे प्लु प्लुमुँ चइ च्युगुदेन् रा-रोमैं खुब्मुँ, खाबइ ल्हें प्लु प्लुमुँ चइ ल्हेन् खुब्मुँ। 7 छतसि ताँन् म्हिमैंइ ह्रोंसइ कति पिंल् खाँमुँ च्हगन् पिंन्, आगुइ कर ल्हैदिसि सैं आतोंदै आपिंन्। तलेबिस्याँ सैं तोंदै भेटि पिंबै म्हि म्रोंसि परमेश्वर सैं तोंम्। 8 क्हेमैंने बालु खोंयोंन् बिलै तोन्दोंरि सै छ्येज्याल्हुल्हुले तरिगे, धै छ्याँबै केए ल्हागिर क्हेमैंइ ल्हें ल्हें पिंल् खाँरिगे बिसि परमेश्वरजी क्हेमैं ताँनलाइ आशिक् पिंल् खाँम्। 9 परमेश्वरए छ्वेर पिंबै म्हिए बारेर छले प्ह्रिइमुँ: “चइ प्लुमुँ, धै ङ्हाँदुमैंलाइ पिंमुँ, चइ लबै छ्याँबै के खोंयोंन् बिलै तरिम्।” 10 परमेश्वरजी प्लु प्लुबै म्हिलाइ प्लु पिंम्, धै म्हिमैंलाइ चबै सै पिंम्। च धोंले परमेश्वरजी क्हेमैंलाइ चैदिबै प्लु पिंसि चलाइ बडिमिंब्मुँ, झाइले क्हेमैंइ लबै छ्याँबै केल ल्हें रोमैं तब्मुँ। 11 छलेन क्हेमैंइ ताँन् छ्याँबै केर भेटि पिंल् खाँरिगे बिसि खीजी खोंयोंन् बिलै क्हेमैंलाइ योबा-ख्युबा लमिंब्मुँ। क्हेमैंइ पिंबै भेटि ङिए योउँइँले ङ्हाँदुमैंइ योंमा चमैंइ परमेश्वरलाइ धन्यबाद पिंब्मुँ। 12 क्हेमैंइ छले रेबै भेटिमैंइ परमेश्वरए म्हिमैंलाइ खाँचो तमा चमैंए खाँचोमैं पूरा लल् खाँम्। च्हौ मत्त्रे आङिं, चु केउँइँले चमैंइ परमेश्वरलाइ खोंयोंन् बिलै धन्यबाद पिंरिब्मुँ। 13 ख्रीष्टउँइँले खबै सैं तोंबै ताँर बिब् धोंले क्हेमैं प्रसि यहूदीमैं नेरो अरू म्हिमैंए ल्हागिर क्हेमैंइ सैं प्ल्हसि पिंबै भेटिउँइँले परमेश्वरए मिं थेब् तब्मुँ। 14 परमेश्वरजी क्हेमैंलाइ बेल्ले थेबै दयाम्हाँया लबै सैं पिंइमुँ बिसि यहूदीमैंइ क्हेमैंए फिर म्हाँया खसि क्हेमैंए ल्हागिर प्राथना लब्मुँ। 15 बयन लसे लल् आखाँबै बेल्ले थेबै बरदान परमेश्वरजी ङ्योलाइ पिंसेरो खीलाइ धन्यबाद पिंले। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.