२ कोरिन्थी 11 - परमेश्वरए ताँ तमु क्युइरपावल नेरो “ङि कुल्मिंबै चेला चिब्मैं ग” बिसि स्योर तेब्मैं 1 ङ तोइ बुद्धि आरेबै म्हि धों तलेया क्हेमैंइ सैदिल् खाँस्याँ छ्याँब तमल बिब ङए सैं मुँ। गार आम्हाँदिल्ले ङए ताँ थेमिंन् ओ! 2 तलेबिस्याँ क्हेमैं कन्ये धों तब् ग, ख्रीष्टने बालुन् ब्ह्या लमिंबै ल्हागिर ङइ क्हेमैंलाइ ह्रिथेंइमुँ। छतसि क्हेमैंए फिर्बै ङए ह्रिस परमेश्वरल् धोंन् तबै ह्रिस ग। 3 क्हेमैंइ छलकपट आलल्ले ख्रीष्टए फिर बिश्वास लबै सैं लइ, दिलेया स्योंम्बै हब्बालाइ प्हुरिइ खैले स्योर तेसि लुइ, छलेन क्हेमैंए सैं या न्होंवाम् उ बिसि ङ ङ्हिंइमुँ। 4 क्हेमैं ङाँर म्हि घ्रि खसि ङिइ बिबै येशू भन्दा अर्कोन् येशूए बारेर्बै ताँ बिइ बिस्याँ, झाइले क्हेमैंइ योंबै पबित्र प्ल्ह भन्दा चइ बिबै अर्कोन् प्ल्हए ताँ क्हेमैंइ क्वेंइ बिस्याँ, छलेन ङिइ बिमिंबै सैं तोंबै ताँ भन्दा अर्को ताँमैं क्हेमैंइ क्वेंइ बिस्याँ, च म्हिए ताँ क्हेमैंइ सैं तोंन्ले थेमना! 5 दिलेया “ङि कुल्मिंबै चेला चिब्मैं ग” बिसि थेब् प्हैंसि पोंब्मैं भन्दा ङ तोइ सैरै या च्योंरि आरे। 6 ओं, ङ छेनाले पोंल् आह्रलैया ङ बेल्ले ह्रब् सेब मुँ। खैले तमुँ छले ङिइ ह्रब्-सेबै ताँमैं क्हेमैंलाइ छेनाले क्होमिंइमुँ। 7 क्हेमैंलाइ थेब् लबै ल्हागिर ह्रोंसलाइन च्योंब् लसि येशूउँइँले खबै सैं तोंबै ताँ क्हेमैंने छलेन् बिमिंमा ङइ पाप लइ वा? 8 क्हेमैंए सेवा लबै ल्हागिर ङइ अरू क्ल्ह्योर्बै बिश्वासीमैंउँइँले मुइ योंमा ङइ क्हेमैंए ल्हागिर चमैंलाइ लुडिब् धोंन् तइ। 9 ङ क्हेमैं ङाँर मुँबै त्हेर ङलाइ मुइ चैदिमा ङइ क्हेमैंने तोइ खर्ज आह्रिल। बरु माकेडोनिया ह्युलउँइँले खबै अलिमैंइ ङए खाँचो पूरा लमिंइ। ङइ क्हेमैंलाइ ओंसों या तोइ सैरै या दुःख आपिंल, लिउँइँज्यै या तोइ दुःख पिंरिब आरे। 10 ख्रीष्टजी क्ह्रोंसेंन्बै ताँ बिब् धोंले ङज्यै या क्ह्रोंसेंन्बै ताँ बिम्: “ङइ क्हेमैंलाइ दुःख आपिं” बिसि प्हैंबै ताँ अखैया ह्युल तिगोंन् खाबज्यै ङलाइ आपोंन् बिल् आखाँ। 11 ङइ तले छ बिगे? ङइ क्हेमैंलाइ म्हाँया आल बिसि छ बिब् वा? आङिं! ङइ क्हेमैंलाइ म्हाँया लम् बिसि परमेश्वरजी सेइमुँ! 12 ङिइ धोंलेन् के लइमुँ बिसि थेब् प्हैंसि पोंब्मैंए ताँ थोरिगे बिसि ङइ लरिबै के खोंयोंन् बिलै ङ लरिब्मुँ। 13 तलेबिस्याँ छाबै म्हिमैं क्ह्रोंसेंन्बै कुल्मिंबै चेला चिब्मैं आङिं, दिलेया “ङि येशू ख्रीष्टए क्ह्रोंसेंन्बै कुल्मिंबै चेला चिब्मैं ग” बिसि स्योर तेसि लुप्रब्मैं मत्त्रे ग। 14 चु ताँर प्लेटोरिल् आत्हु! तलेबिस्याँ दुष्टै या चारबै स्वर्गदूत धों तल् खाँम्। 15 छतसि दुष्टए सेवा लब्मैं परमेश्वरए सेवा लब्मैं धोंले प्रलेया औदिबै ताँ आङिं। चमैंइ लबै केए नों लिउँइँ योंब्मुँ। कुल्मिंबै चेला चिब पावलइ दुःख सैदिब 16 ङइ धबै बिमुँ, ङलाइ खाबज्यै या बुद्धि आरेब आमैंरिगे। दिलेया क्हेमैंइ ङलाइ बुद्धि आरेबन् मैंलेया ङइ थेब् प्हैंल् योंरिगे बिसि ङलाइ सैदिद्। 17 (ङइ तोगो बिबै ताँ प्रभुउँइँले बिबै ताँ आङिं, दिलेया थेब् प्हैंबै ताँर ङ बुद्धि आरेब्मैंइ धोंले पोंरिइमुँ। 18 ल्हें म्हिमैंइ थेब् प्हैंसि पोंबइले ङै या चमैं धोंले थेब् प्हैंसि पोंम्।) 19 क्हेमैं बेल्ले बुद्धि मुँब्मैं तमा क्हेमैंइ बुद्धि आरेब्मैंलाइ सैं तोंन्लेन् सैदिमना! ङए सुजाब (बुद्धि आरेब्मैंलाइ सैं तोंन्लेन् सैदिसि!) क्हेमैं बेल्ले बुद्धि मुँब्मैं तइ। 20 छलेन म्हि घ्रिइ क्हेमैंलाइ केब्छैं लवालेया, क्हेमैंए मुइ लुडिवालेया, क्हेमैंलाइ ङोर स्याब् धोंले च्युवालेया, क्हेमैंलाइ प्ह्रलेया, क्हेमैंए क्ह्राँबोर ल्हिलेया क्हेमैंइ ह्रिस आखल्ले सैदिमना! 21 ङिइमि छ लल् आखाँ, फा पिल् त्हुबै ताँ मुँ। दिलेया खाबज्यै या तो मुँले ताँर थेब् प्हैंम् बिस्याँ, ङै या बुद्धि आरेबै म्हि धोंले च ताँर्न थेब् प्हैंसि पोंम्। 22 चमैं हिब्रू क्युइ पोंल् खाँम्मा? ङै या पोंल् खाँम्। चमैं इस्राएलीमैं वा? ङै या इस्राएली ग। चमैंए खे अब्राहाम वा? ङए खे या अब्राहाम ग। 23 चमैं येशू ख्रीष्टए सेवा लब्मैं वा? चमैं भन्दा ङ झन् छेनाले सेवा लबै म्हि ग। छबिमा ङ सोबल धोंले पोंइ। ङइ बेल्ले दुःखले ख्रीष्टए सेवा लइमुँ, ङ ल्हें खे झेलर टिल् त्हुइ, ङलाइ ल्हें खे कोर्राइ प्रुइ, छले ल्हें खे ङ कालए सुँर फेइ। 24 ङ्हखे समा यहूदीमैंइ ङलाइ सोंच्युसे कु कोर्रा प्रुइ। 25 सोंखे समा रोमथेंमैंइ ङलाइ प्हरेइ प्रुइ, झाइले क्ल्ह्यो घ्रिर ङलाइ म्हिए हुलइ युँमाइ प्रिंइ। सोंखे समा ङ क्रेबै क्यु झाज मा ङ्युँइर तेसि नास तयामा त्हिंयाँ-म्हुँइँस ङ मा ङ्युँइर्न टिल् त्हुइ। 26 छलेन येशू ख्रीष्टउँइँले खबै सैं तोंबै ताँ बिप्रमा ल्हें खे ङलाइ स्योंइ नोबोल् म्हैइ, ह्योमैंइ ङ सैल् म्हैइ, ह्रोंसए यहूदी ह्रेंमैं नेरो अरू ह्रेंमैंज्यै या ङलाइ दुःख पिंइ। सहरजरे या, म्हि आटिबै ह्युलरै या, मा ङ्युँइरै या, झाइले स्योर्गु थुमैंउँइँले या ङइ दुःख योंइ। 27 झाइले गारो केमैं लल् त्हुइ, ल्हें खे न्हरु च्हुइल् आयों, फो ख्रेंन्ले क्यु पिल्ले टिल् त्हुइ, ल्हें खे चल् आयोंल्ले, बास आयोंल्ले, क्वें खिल् आयोंल्ले टिल् त्हुइ। 28 च्हौ मत्त्रे आङिं, च भन्दा थेबै दुःख त्हिंइ ह्रोंसे ताँन् क्ल्ह्योर्बै बिश्वासीमैंए ल्हागिर ङलाइ न्हुँ मुँ। 29 तलेबिस्याँ दुःख योंब्मैं मुँस्याँ ङै या दुःख योंब् धोंन् तमल। खाबै या पापर च्होयास्याँ ङए सैंर बेल्ले न्हुँ खमल। 30 ङइ प्हैंलन् त्हुम् बिस्याँ ङइ योंबै दुःखए ताँमैंर मत्त्रे प्हैंम्। 31 ङइ स्योर आतेइमुँ बिबै ताँ खोंयोंन् बिलै म्हाँदिल् त्हुबै प्रभु येशूए आबा परमेश्वरजी सेइमुँ। 32 ङ दमस्कस सहरर मुँमा अरितस म्रुँए न्होंर्बै क्रथेइ ङलाइ क्हाबै ल्हागिर सहरए मुल म्रार पालेमैं थेंल। 33 दिलेया ङए थुमैंइ ङलाइ ट्हलोर झोंसि सहरलाइ कारग्युले झोंबै गाराए झ्यालउँइँले खारमिंबइले ङ क्रथेए योउँइँले स्योरल् खाँइ। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.