१ कोरिन्थी 10 - परमेश्वरए ताँ तमु क्युइरस्योंम्बै इस्राएलीमैंए ताँउँइँले कुए बारेर बिमिंब 1 ओ अलि-अङाँमैं, ङ्योए इस्राएली खेमैंलाइ खै तल बिसि क्हेमैंइ सेरिगे बिब ङए सैं मुँ, चमैं मोशाए लिलि मिश्र ह्युलउँइँले त्होंखमा न्हाँम्स्योइ घ्याँ तेंमिंदै बोल, धै चमैं ताँन् ओल्ग्या मा ङ्युँइए म्हाँजोउँइँले तसि ह्याल। 2 न्हाँम्स्योए लिलि नेरो मा ङ्युँइए म्हाँजोर [ओबानो घ्याँर] ह्यामा मोशाउँइँले चमैंइ बप्तिस्मा किंब् धों तइ [अथवा चए लिलि ल्हैदिबै सैं पिंइ]। 3 चमैं ताँनइ पबित्र प्ल्हउँइँले योंबै चबै सै चइ। 4 झाइले चमैं ताँनइ पबित्र प्ल्हउँइँले योंबै क्यु पाराउँइँले थुँइ। चमैंने बालु प्रबै पारा ख्रीष्टन् मुँल। 5 दिलेया चमैं न्होंरि ल्हें म्हि म्रोंसि परमेश्वर सैं आतोंल, छतसि चमैं क्यु आयोंबै क्ल्ह्योर नास तयाइ। 6 ङ्योए खेमैंइ धोंले ङ्योज्यै या आछ्याँबै के लबै सैं आखरिगे बिसि चु ताँन् ताँ ङ्योए ल्हागिर्न मैंल् त्हुबै ताँ ग। 7 चमैं न्होंरि को-कोइ कु पूजा लब् धोंले ङ्योइ कुर पूजा लब आत। च कु पूजा लबै बारेर परमेश्वरए छ्वेर छले प्ह्रिइमुँ, “म्हिमैं [कुर पूजा लमा] मज्जाले चब्-थुँबर क्हुँइ, झाइले छाडाले सेबर रेइ।” 8 छलेन चमैं न्होंरि को-कोइइ ब्यभिचार लब् धोंले ङ्योइ ब्यभिचार लब आत। चमैंइ ब्यभिचार लबइले परमेश्वरजी सजैं पिंसि तिगेंर्न ङ्हिस्युसे सों हजार (२३,०००) म्हि सियाल। 9 झाइले चमैं न्होंरि को-कोइ प्रभुए जाँच लब् धोंले ङ्योइ प्रभुए जाँच लल् आत। प्रभुए जाँच लबइले चमैंलाइ प्हुरिइ नास लवाइ। 10 छतसि ङ्योइ गनगन लल् आत, च खेमैंइ गनगन लबइले नास लवाबै स्वर्गदूतइ चमैंलाइ सैवाइ। 11 चमैंए फिर तबै चु ताँन् ताँमैं अरूमैंलाइ लोमिंबै ल्हागिर तल। च ताँमैं ङ्योज्यै सेरिगे बिसि प्ह्रिथेंइ। तलेबिस्याँ चु ह्युल नुखबै त्हे तखइमुँ। 12 छतसि क्हेमैं न्होंरि ङ बिश्वासर भोंब् मुँ बिसि प्हैंबै म्हिइ ह्रोंस पापर आच्होरिगे बिसि झन् न्ह क्रों मि क्रोंले टिल् त्हुम्। 13 म्हिए फिर तखबै जाँच बाहेक अरू जाँच क्हेमैंए फिर आतइमुँ। दिलेया परमेश्वर भर लल् खाँब मुँ, खीजी फैबै बाछा पूरा लम्। छतसि क्हेमैंइ सैदिलै आखाँबै जाँचर खीजी फेल् आपिं। जाँचर फेमा सैदिल् खाँरिगे बिसि खीजी क्हेमैंलाइ जाँचउँइँले स्योरल् खाँबै घ्याँ या पिंमुँ। कु पूजा लब आत 14 छतसि ओ ङइ खोबै अलि-अङाँमैं, कु पूजा लन् आलद्। 15 च्हैंब् मैंब् लल् खाँबै म्हिमैंने धोंले ङइ क्हेमैंने बिइमुँ, ङइ बिबै ताँ क्हेमैंइ बिचार लद्। 16 ङ्योइ प्रभु भोजरि परमेश्वरलाइ धन्यबाद पिंसि प्हेलाउँइँले थुँम्। छले थुँमा ङ्योइ ख्रीष्टए कोए भाग योंम्। छलेन क्हें चमा ङ्योइ ख्रीष्टए ज्युए भाग योंम्। 17 प्रभु भोजरि क्हें घ्रि मत्त्रे तम्। छतसि ल्हें मुँलेया ङ्यो ताँन् ज्यु घ्रि धोंन् तब् ग, तलेबिस्याँ ङ्योइ क्हें घ्रिउँइँले चम्। 18 झाइले अर्को नमुना: इस्राएलीमैं ङ्ह्योद्, परमेश्वरए मिंर ख्रो पिंबै सै चब्मैं ख्रो पिंबै म्हिने घ्रिन् तइ। 19 ङइ बिल् म्हैब तो जा बिस्याँ “कुर चडेबै सै तोइ आङिं!” धै “कु या तोइ आङिं!” 20 दिलेया कुर ख्रो पिंब्मैंइ परमेश्वरलाइ पिंब आङिं, स्यागि म्होंगिलाइ पिंम्। छतसि क्हेमैं स्यागि म्होंगिए घ्याँर प्ररिगे बिब ङए सैं आरे। 21 क्हेमैंइ प्रभुए प्हेला नेरो स्यागि म्होंगिए प्हेला ङ्हिंना ङ्हिंनउँइँले थुँल् आखाँ। छलेन क्हेमैंइ प्रभुए टेबल नेरो स्यागि म्होंगिए टेबलउँइँले या चल् आखाँ। 22 क्हेमैंइ छाबै ताँ क्होसे या अझै प्रभुलाइ ह्रिस खल् लब् वा? प्रभु भन्दा ङ्यो भोंब मुँ ङ्हाँइमुँ वा? से चबै बारेर ङ्योइ तो लले 23 “क्हेमैंइ तो ललेन् तम्,” बिम्। दिलेया ताँन् सैइ क्हेमैंए फायदा आत। क्हेमैंइ “ताँन् सै छ्याँब मुँ बिमुँ,” दिलेया कति सैम् आछ्याँबै तम्। 24 खाबज्यै या ह्रोंसल् मत्त्रे छ्याँब तरिगे बिसि आमैंन्, अरूमैंलाज्यै छ्याँब तरिगे बिसि मैंन्। 25 छतसि छ लद् ओ: से चुँबै क्ल्ह्योरि तोए से मुँलेना सैंर तोइ आङ्हाँन्ले चवाद्। “चु से कुर चडेब् उ?” बिसि आङ्योएद्। 26 तलेबिस्याँ “पृथ्बी नेरो चर मुँबै तोन्दोंरि सै प्रभुलन् ग,” बिसि परमेश्वरए छ्वेर प्ह्रिइमुँ। 27 छलेन येशूए फिर बिश्वास आलब्मैं खाबै मुँलेया क्हेमैंलाइ चब् चबर न्हिम्तो लइबिस्याँ, क्हेमैं या ह्याबै सैं मुँस्याँ, क्हेमैंलाइ तो सै चल् पिंमुँ, च सै तोइ संका आलल्ले चद्। चु कुर चडेबै सै वा बिसि आङ्योएद्। 28 दिलेया खाबै मुँले क्हेमैंने, “चु कुर चडेबै सै ग,” बिस्याँ च सै आचद्। तलेबिस्याँ, चु कुर चडेबै सै ग बिमिंबै म्हिए ल्हागिर नेरो चइ छ्याँब् नेरो आछ्याँब फेलल् खाँना बिब् मैंसि च सैमैं आचद्। 29 क्हिइ छ्याँब् नेरो आछ्याँब फेलल् खाँमना बिसि बिब् आङिं, बिश्वासर आभोंबै अलि अङाँमैंए सैं आन्होंरिगे बिसि छ बिब् ग। “ङइ ताँन् के लबै हग मुँ। छतसि अरू म्हिमैंइ छ्याँब् आछ्याँब फेलल् खाँइ बिबर्न ङइ लदा ङ्हाँबै के आलब?” 30 ङइ परमेश्वरलाइ धन्यबाद पिंसि चबै सै चइ बिस्याँ अरूमैंइ तले ङए ताँ लल् त्हुइ? 31 ङइ तो बिम् बिस्याँ: क्हेमैंइ चलेया, थुँलेया, तो ललेया परमेश्वरए थेबै मान तबै ल्हागिर मत्त्रे लद्। 32 क्हेमैंइ छ्ह थोमा यहूदी मुँले, अरू ह्रेंमैं मुँले, परमेश्वरए फिर बिश्वास लब्मैं मुँले, खाबलाज्यै या सैं नल् लबै के आलद्। 33 ङज्यै या ङइ लबै तोन्दोंरि केर म्हिमैंए सैं खैले तोंन् लब् ङ्हे ङ्हाँम्। ङइ ह्रोंसल् मत्त्रे छ्याँब् तरिगे धै सैं तोंल् योंरिगे आङ्हाँ, बरु ताँन् म्हिमैंइ मुक्ति योंसि छ्याँब् तरिगे बिब ङए सैं मुँ। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.