Yoshua 10 - Ṅmãle̱ Kroṅkroṅ Le̱

¹ Ni eba mli ake̱, beni Ierusalem maṅtše̱ Adonizedek nu ake̱ *Iošua eṅõ Ai ni efele̱ musu, ni bo̱ni efe Ieriko ke̱ emaṅtše̱ le̱, nakai efe Ai ke̱ emaṅtše̱ le̱ hũ, ni †asaṅ Gibeonbii le̱ ke̱ Israel eyafe ekome ni ame̱ye̱ ame̱ṅõ le̱, *Yi. 8. †Yi. 9.

² ame̱še gbeyei naakpa; edšake̱ maṅ kpeteṅkple dši Gibeon, tamo̱ maṅtše̱maṅ noṅṅ, ni eda fè Ai, ni emli hĩĩ le̱ fẽ kãkãlo̱i so̱ṅṅ ni.

³ Nohewo̱ le̱ Ierusalem maṅtše̱ Adonizedek tšũ ke̱-te Hebron maṅtše̱ Hoham ke̱ Iarmut maṅtše̱ Piram ke̱ Lakiš maṅtše̱ Iafia ke̱ Eglon maṅtše̱ Debir ṅõ ake̱:

⁴ Nyebaä ni nyebafataä mihe, koni wo̱yagbe Gibeon; edšake̱ eke̱ Iošua ke̱ Israelbii le̱ eyafe ekome.

⁵ Nohewo̱ le̱ Amorbii amaṅtše̱mei enumo̱ ne̱: Ierusalem maṅtše̱ le̱ ke̱ Hebron maṅtše̱ le̱ ke̱ Iarmut maṅtše̱ le̱ ke̱ Lakiš maṅtše̱ le̱ ke̱ Eglon maṅtše̱ le̱, ke̱ ame̱tai le̱ fẽ ba ame̱babua ame̱he nä, ni ame̱bo̱ nsra ame̱wo Gibeon, ni ame̱ke̱le̱ awu.

⁶ Ke̱ke̱ ni Gibeonbii le̱ tšũ Iošua ṅõ ye̱ nsra le̱ṅ ye̱ Gilgal ame̱bakē̱: Kādšie onine ye̱ otšũdši le̱ ahe; ba wo̱ṅõ mrãmrã, ní obahere wo̱yiwala, ni obaye obuawo̱; edšake̱ Amorbii amaṅtše̱mei fẽ ni yo̱ gõdši le̱ ano̱ le̱ ebabua ame̱he nā ewowo̱!

⁷ Ke̱ke̱ ni Iošua ke̱ ta le̱ fẽ ke̱ tabilo̱i agboi le̱ fẽ fã ke̱-dše̱ Gilgal ke̱-te.

⁸ Ni Iehowa kē̱ Iošua ake̱: Kāšeame̱ gbeyei; edšake̱ mituame̱ miwo odeṅ; ame̱teṅ mokomoko damo̱ṅ ohĩe!

⁹ Ke̱ke̱ ni Iošua banyie nyõṅnyõṅ fẽ ke̱-dše̱ Gilgal ni ebahẽṅame̱ trukā.

¹⁰ Ni Iehowa hã ame̱dšidšā ye̱ Israel hĩe, ni ame̱gbeame̱ babaō ye̱ Gibeon, ni ame̱tiuame̱ ke̱-tšṍ Bet-Horon kwē̱he le̱, ni ame̱gbegbẽame̱ ke̱-yaši Azeka ke̱ Makeda tō̃.

¹¹ Ni eba mli ake̱, beni ame̱dšo foi ye̱ Israel hĩe ní ame̱še̱ Bet-Horon šikple-kemo̱he le̱, Iehowa hã *te̱i kpeteṅkplei dše̱ ṅwei baſie ame̱no̱ ke̱-yaši Azeka, ni ame̱gboi; mei ni nyoṅmo̱ṅte̱i le̱ gbe le̱ fá fè mei ni Israelbii le̱ ke̱ klante gbe. *2 Mose 9,22-25.

¹² No be le̱ mli Iošua ke̱ Iehowa wie, gbĩ ní Iehowa ṅõ Amorbii le̱ ewo Israelbii le̱ adeṅ le̱, ni ekē̱ ye̱ Israel hĩe ake̱: Hũlũ, wa odamo̱ ši ye̱ Gibeon, ni bo nyoṅtšẽre hũ, ye̱ Ayalon dšē̱ le̱ṅ!

¹³ Ni *hũlũ wa, ni nyoṅtšẽre hũ damo̱ ši, ke̱-yaši beyino̱ ní maṅ le̱ to̱ ame̱he owele ye̱ ame̱henye̱lo̱i le̱ ano̱. Ani aṅmãko ene̱ ye̱ †Iašar wolo le̱ mli? Ni hũlũ damo̱ ši ye̱ ṅwei teṅ, ni eyee oyai ní eyanyõ ši aafe gbĩ mū. *Hab. 8,11. †2 Sam. 1,18.

¹⁴ Ni nakai gbĩ le̱ hĩe lo ese̱ ne̱ gbĩ ko bako pẽṅ ni tamo̱ no, ni Iehowa ebo gbomo gbē toi ne̱ke̱; edšake̱ *Iehowa wu hã Israel. *K. 42. 2 Mose 14,25.

¹⁵ Ni Iošua kũ ese̱, ni Israel fẽ fata ehe, ni ame̱ba nsra le̱ṅ ye̱ Gilgal.

¹⁶ Ši maṅtše̱mei enumo̱ ne̱ dšo foi, ni ame̱yatē ame̱he ye̱ te̱kplo ni yo̱ Makeda le̱ mli.

¹⁷ Ni abatſa Iošua adafi ake̱: Ana maṅtše̱mei enumo̱ le̱ ní ame̱yatẽ ame̱he ye̱ te̱kplo ní yo̱ Makeda le̱ mli.

¹⁸ Ni Iošua kē̱: Nyeyakokloa te̱i kpleikplei nyeke̱-tšĩmo̱a te̱kplo le̱ nā, ni nyeṅõ hĩĩ nyeto he ní ame̱bu ame̱he.

¹⁹ Ši nye le̱ nyekadamo̱a ši; nyetiua nyehenye̱lo̱i le̱, ni nyetſia mei ní ekpe se̱ le̱ anii; nyekahãa ame̱yabotea ame̱mãdši le̱ amli; edšake̱ Iehowa, nye-Nyoṅmo̱ le̱, etuame̱ ewo nyedeṅ.

²⁰ Ni eba mli ake̱, beni Iošua ke̱ Israelbii le̱ egbeame̱ babaō dientše̱ egbe nā ni ame̱yi etã, ní mei ni ſe̱ le̱ edšo foi ke̱-bote mãdši ni atſa gbogbo awo he le̱ amli le̱,

²¹ maṅ mū le̱ fẽ kũ ame̱se̱ ke̱-ba nsra le̱ṅ ye̱ Iošua ṅõ ye̱ Makeda ye̱ hedšo̱le̱ mli; mokomoko etſaa esẽṅ ye̱ Israelbii le̱ ahĩe.

²² Ke̱ke̱ ni Iošua kē̱: Nyegblea te̱kplo le̱ nā, ni nyedšiea nakai maṅtše̱mei enumo̱ le̱ ke̱-dše̱a te̱kplo le̱ṅ nyebahãami!

²³ Ni ame̱fe nakai, ni ame̱dšie nakai maṅtše̱mei enumo̱ le̱ ye̱ te̱kplo le̱ṅ ame̱-bahãle̱: Ierusalem maṅtše̱ le̱ ke̱ Hebron maṅtše̱ le̱ ke̱ Iarmut maṅtše̱ le̱ ke̱ Lakiš maṅtše̱ le̱ ke̱ Eglon maṅtše̱ le̱.

²⁴ Ni eba mli ake̱, beni ake̱ nakai maṅtše̱mei le̱ dše kpo ke̱-ba Iošua ṅõ le̱, Iošua tšé̱ Israel hĩĩ le̱ fẽ ke̱-ba, ni ekē̱ tabilo̱i ní ke̱le̱ te le̱ ano̱ asafoiatše̱mei le̱ ake̱: Nyetšia nyebaä ni nyeke̱ nyenãdši abamãmo̱a ne̱ke̱ maṅtše̱mei ne̱ akue̱i ano̱! Ni ame̱tši ame̱ba, ni ame̱ke̱ ame̱nãdši bamãmo̱ ame̱kue̱i ano̱.

²⁵ Ni Iošua kē̱ame̱ ake̱: Nyekašea gbeyei, ni nyetšui hũ akafãã! nyehe awaä ni nyefea ekã; edšake̱ ne̱ke̱ Iehowa bafe nyehenye̱lo̱i le̱ fẽ ní nyeke̱wuo̱ le̱!

²⁶ Ni no se̱ le̱ Iošua tſiaame̱ nii ni egbeame̱, ni ese̱ṅame̱ ye̱ tšei enumo̱ no̱; ni ame̱tšotšõro tšei le̱ ano̱ ke̱-yaši gbe̱ke̱.

²⁷ Ši beni *hũlũ yanyõ ši le̱, Iošua fã́ ní adšieame̱ ke̱-dše̱ tšei le̱ ano̱, ni aše̱re̱ame̱ aſie te̱kplo ni ame̱yatẽ ye̱ mli le̱ noṅṅ mli, ni ame̱hole te̱i kplei ame̱tšĩ te̱kplo le̱ nā, ni eye̱ ke̱-baši ṅmene̱. *8,29. 5 Mose 21,23.

²⁸ Ni Iošua ṅõ Makeda hũ ye̱ nakai gbĩ le̱ no̱, ni eke̱ klante gbeame̱, ni efe emli maṅtše̱ le̱ ke̱ susumai ní yo̱ mli le̱ fẽ musu, eſe̱e̱ mokomeflo ni dše mli; ni efe Makeda maṅtše̱ le̱, tamo̱ bo̱ni *efe Ieriko maṅtše̱ le̱. *6,21.

²⁹ Ke̱ke̱ ni Iošua ke̱ Israel fẽ tšẽre̱ mli ke̱-dše̱ Makeda ke̱-te Libna, ni eke̱ Libna wu.

³⁰ Ni Iehowa ṅõ no hũ ewo Israel deṅ ke̱ emli maṅtše̱ le̱ fẽ; ni eke̱ klante gbele̱ ke̱ susumai ni yo̱ mli le̱ fẽ, eſe̱e̱ mokomeflo ni dše mli; ni efe emli maṅtše̱ le̱, tamo̱ bo̱ni efe Ieriko maṅtše̱ le̱.

³¹ Ke̱ke̱ ni Iošua ke̱ Israel fẽ tšẽre̱ mli ke̱-dše̱ Libna ke̱-te Lakiš, ni ebo̱ nsra ewo ehe, ni eke̱le̱ wu.

³² Ni Iehowa ṅõ Lakiš ewo Israel deṅ, ni ame̱ṅõle̱ ye̱ gbĩ ni dši gbĩ enyo̱ le̱ no̱, nī ame̱ke̱ klante gbele̱ ke̱ susumai ní yo̱ mli le̱ fẽ, tamo̱ bo̱ni efe Libna le̱,

³³ No be le̱ mli le̱ Geser maṅtše̱ Horam fã ke̱-ba ni ebaye ebua Lakiš: ni Iošua gbele̱ ke̱ emaṅ le̱ fẽ ke̱-yaši beyino̱ ní eſe̱e̱ mokomeflo ni dše mli.

³⁴ Ke̱ke̱ ni Iošua ke̱ Israel fẽ tšẽre̱ mli ke̱-dše̱ Lakiš ke̱-te Eglon; ni ame̱bo̱ nsra ame̱wo ehe, ni ame̱ke̱le̱ wu;

³⁵ ni ame̱ṅõle̱ ye̱ nakai gbĩ le̱ no̱ noṅṅ, ni ame̱ke̱ klante gbele̱ ke̱ susumai ní yo̱ mli le̱ fẽ; efeame̱ musu nakai gbĩ le̱ no̱ noṅṅ, tamo̱ bo̱ni efe Lakiš le̱ pe̱pē̱pe̱.

³⁶ Ke̱ke̱ ni Iošua ke̱ Israel fẽ fã ke̱-dše̱ Eglon ke̱-te Hebron, ni ame̱ke̱le̱ wu;

³⁷ ni ame̱ṅõle̱, ni ame̱ke̱ klante gbeame̱ ke̱ emli maṅtše̱ le̱ ke̱ ehe akrowai le̱ fẽ ke̱ susumai ní yo̱ mli le̱ fẽ; eſe̱e̱ mokomeflo ni dše mli, tamo̱ bo̱ni efe Eglon le̱ pe̱pē̱pe̱, ni efele̱ ke̱ susumai ni yo̱ mli le̱ fẽ musu.

³⁸ Ke̱ke̱ ni Iošua ke̱ Israel fẽ kũ ame̱se̱ ke̱-te Debir, ni eke̱le̱ yawu;

³⁹ ni eṅõle̱ ke̱ emli maṅtše̱ le̱ ke̱ ehe akrowai le̱ fẽ, ni ame̱ke̱ klante gbeame̱, ni ame̱fe susumai ní yo̱ mli le̱ fẽ musu; eſe̱e̱ mokomeflo ní dše mli; bo̱ni efe Hebron le̱, ke̱ bo̱ni efe Libna ke̱ emli maṅtše̱ le̱ hũ le̱, nakai noṅṅ efe Debir ke̱ emli maṅtše̱ le̱.

⁴⁰ Ni Iošua kpãtã šikpoṅ le̱ fẽ hĩe: gõdši ašikpoṅ le̱ ke̱ wuoyigbe̱ šikpoṅ le̱ ke̱ ṅãno̱ šikpoṅ le̱ ke̱ gõdši ahĩe ši le̱ ke̱ ame̱mli maṅtše̱mei le̱ fẽ, ni eſe̱e̱ moko ni dše mli; ni nofẽno ni mũo̱ le̱ *efele̱ musu, tamo̱ bo̱ni Iehowa, Israel Nyoṅmo̱ le̱, ewo kitã le̱. 4 Mose 21,2. 5 Mose 20,18-48.

⁴¹ Ni Iošua kpãtã ame̱hīe ke̱-dše̱ Kadeš-Barnea ke̱-te Gaza tõ, ke̱ *Gošen šikpoṅ le̱ fẽ ke̱-yaši Gibeon tõ. *11,18.

⁴² Ni ne̱ke̱ maṅtše̱mei ne̱ fẽ ke̱ ame̱šikpõdši le̱ Iošua ṅõ šikōme; edšake̱ *Iehowa, Israel Nyoṅmo̱ le̱, wu ehã Israel. *K. 14.

⁴³ Ni Iošua ke̱ Israel fẽ kũ ame̱se̱ ke̱-te nsra le̱ṅ ye̱ Gilgal. K. 15.