Tito 1 - Ṅmãle̱ Kroṅkroṅ Le̱

¹ Paulo, ni dši Nyoṅmo̱ tšũlo̱, ke̱ Iesu Kristo bo̱fo hũ ye̱ Nyoṅmo̱ halamo̱bii ahemo̱-ke̱-yeli ke̱ Ṅyoṅmo̱-dšámo̱ nā ano̱kwale le̱ he nilē le̱ nā,

² ye̱ nāno̱ wala le̱ he ne̱hĩekãmo̱ le̱ nā, nõ wala ni Nyoṅmo̱ ní malee le̱ woši ehã dãni abo̱ dšeṅ bei le̱,

³ ši *ye̱ be ni sa mli le̱ edšie ewiemo̱ le̱ ši etšõ ye̱ šie̱mosane ni †atu awo mideṅ ye̱ Nyoṅmo̱ ni dši wo̱yiwalaherelo̱ le̱ kitã nā le̱ mli le̱: *Ef. 1,9. 10. †1 Tim 1,1. 11.

⁴ ṅmã yahã Tito, ni dši *ebi kro̱ṅṅ ye̱ hemo̱-ke̱-yeli kōme le̱ noṅṅ gbe̱fāṅ le̱: Dromo̱, mo̱bo̱nale̱, hedšo̱le̱ ni dše̱ tše̱ Nyoṅmo̱ le̱ ke̱ Nuṅtšo̱ Iesu Kristo, wo̱yiwalaherelo̱ le̱, deṅ ahão! *1 Tim. 1,2

⁵ Ene̱hewo̱ mišìo ye̱ Kreta, koni oto nii ni eſe̱ le̱ gbe̱dšiano̱ pe̱pē̱pe̱, ni owowō onukpai ye̱ maṅ-fē-maṅ mli, take̱ bo̱ni mikēo momo le̱;

⁶ ké̱ moko ye̱ ni kpa ko be̱ ehe, ni edši moni yo̱ ṅā kome, ni yo̱ bii ni heo̱ yeo̱ ni awiee ame̱he ake̱ nyenyeṅtſibo̱lo̱i lo toigbolo̱i dšiame̱ le̱. 1 Tim. 3,2-4.

⁷ Edšake̱ esa ake̱ no̱kwe̱lo̱ le̱ kpa ko akahī ehe, ake̱-ni *Nyoṅmo̱ we no̱ tšũlo̱nukpa dšile̱ hewo̱ le̱; dšee moni feo̱ le̱dientše̱ etšui nā nii, dšee mlifũtše̱, dšee dā̃nulo̱, dšee ninekpokpõkpotše̱, dšee kpe̱kpē̱lo̱, *1 Kor. 4,1. 2 Tim. 2,24.

⁸ ši moṅ gbo̱felo̱, moni sumoo̱ ekpakpa, moni dſẽṅmo̱ kā ši, dšalo̱, moni he tše, moni hìe kā ši,

⁹ moni hīeo̱ tšõmo̱ le̱ nā ano̱kwa wiemo̱ le̱ mli, koni enyẽ ewie etšõ mei ye̱ nitšõmo̱ ni tšáa mo le̱ mli, ni mei ni kũo̱ wiemo̱ nā le̱ hũ, ekā ame̱hìe.

¹⁰ Edšake̱ mei pī ye̱ ni dši yakayakawielo̱i ke̱ šišiulo̱i ni baa ame̱he ši ame̱hāā moko, titri le̱ mei ni dše̱ ketiafolo̱i le̱ ateṅ le̱;

¹¹ mei ni sa ake̱ awo ame̱nā manyofle̱; ame̱, ame̱butuo̱ šīai mũdši fē, ni hīegbedšianii ase̱námo̱ hewo̱ le̱ ame̱tšōo̱ nii ni edšaa. 2 Tim. 3.6

¹² Ame̱teṅ moko ni dši ame̱dientše̱ ame̱gbalo̱ le̱ kē̱ ake̱: Kretabii maleo̱ dā; koloi fõdši ni, mũsũtše̱mei hedšõlo̱i ni.

¹³ Ne̱ke̱ odase ne̱ ano̱kwale ni. Nohewo̱ le̱ *kā ame̱hìe vevēve, koni ame̱he awa ye̱ hemo̱-ke̱-yeli le̱ mli, *2 Tim. 4,2.

¹⁴ ni ame̱kabo Iudafoi *adesãi le̱ ke̱ gbomei ni kpaleo̱ ke̱-dše̱o̱ ano̱kwale le̱ mli le̱ akitãi le̱ atoi. *1 Tim 4,7.

¹⁵ Mei *ní he tše le̱, nii fē he tše hãame̱; ši mei ní he tšee ke̱ mei ni hee yee le̱, nokonoko be̱ ni he tše hāame̱, ši moṅ ame̱yitšoṅ ke̱ ame̱henilē fẽ mli ewo mũdši. *Mat. 15,11. Rom. 14,20

¹⁶ Ame̱kē̱ ake̱ ame̱le Nyoṅmo̱, ši ame̱ke̱ ame̱nitšumo̱i kwaäle̱, ni ame̱dši gbomei ni ahĩo̱, ke̱ toigbolo̱i, mei ni ehĩĩ hãã nitšumo̱ kpakpa ko kwrā. 2 Tim. 3,5.