Nehemia 4 - Ṅmãle̱ Kroṅkroṅ Le̱

¹ Ši eba mli ake̱, beni Sanbalat ke̱ Tobia ke̱ Arabiabii ke̱ Amonbii ke̱ Ašdodbii le̱ nu ake̱ atšrá Ierusalem gbogboi le̱ ke̱-kpe, ni abõi fo̱dši le̱ tšĩmo̱ le̱, ame̱mli wo la naakpa,

² [8.] ni ame̱fẽ-tſẽm ame̱te apäm ake̱ ame̱mība ní ame̱ke̱ Ierusalem abawu, ni ame̱fe dše̱i sakasaka.

³ [9.] Ši wo̱kpa wo̱-Nyoṅmo̱ le̱ fai, ni wo̱to bulo̱i ye̱ ame̱hewo̱ ſane ke̱ nyõṅ wo̱toame̱.

⁴ [10.] Ni Iuda kē̱: Dšatšutĕrelo̱i le̱ ahewale̱ no̱ egbo̱, ni tšũkoi le̱ fá tšṍ, hewo̱ le̱ wo̱nyẽẽ gbogbo le̱ wo̱tſa doṅṅ.

⁵ [11.] Ni wo̱henye̱lo̱i le̱ ekē̱ ake̱: Ame̱kale ni asaṅ ame̱kana ke̱-yaši beyino̱ ni wo̱o̱bote ame̱teṅ, ni wo̱o̱gbeame̱, ni wo̱hã nitšumo̱ le̱ se̱ afo!

⁶ [12.] Ši eba mlï ake̱ Iudafoi ni hĩo̱ ame̱mase̱i le̱ ba, ni ame̱dše̱ hei sro̱toi fẽ ame̱bakē̱wo̱ šii nyoṅma ake̱: Dša nyekũ nyese̱ ke̱-ba wo̱ṅõ!

⁷ [13.] Nohewo̱ le̱ miṅõ mei mito gbogbo le̱ se̱ hei ni kwo̱o̱ ni kã ši kplanā le̱; ni mito maṅ le̱ ye̱ ame̱wekui le̱ anā, ke̱ ame̱klantei ke̱ ame̱kplo̱i ke̱ ame̱gãii.

⁸ [14.] Ni miyakwe̱, ni mite ši ni mikē̱ abladei le̱ ke̱ no̱yelo̱i le̱ ke̱ maṅ ni eſe̱ le̱ fẽ ake̱: Nyekašeaame̱ gbeyei; ši moṅ nyekaia *Nuṅtšo̱ kpeteṅkple ní he yo̱ gbeyei le̱, ni nyewua nyebãa nyenyemimei ke̱ nyebihĩĩ ke̱ nyebiyei ke̱ nyeṅãmei ke̱ nyešīai le̱! *1,5.

⁹ [15.] Ni eba mli ake̱, beni wo̱henye̱lo̱i le̱ nu ake̱ abatſawe̱ adafi *ni Nyoṅmo̱ ehã ame̱dšina le̱ efe yaka le̱, ke̱ke̱ ni wo̱fẽ-tſẽm wo̱kũ wo̱se̱ ke̱-ba gbogbo le̱ he ekoṅ, mofẽmo te enitšumo̱ he. *Hiob 5,12.

¹⁰ [16.] Ni eba mli ake̱, ke̱-dše̱ nakai gbĩ le̱ no̱ le̱ miwebii le̱ fã tšuo̱ nii ye̱ nitšumo̱ le̱ mli, ni fã hĩeo̱ akplo̱i ke̱ tše̱ṅi ke̱ găii ke̱ damai; ni onukpai le̱ fĩo̱ Iuda we le̱ fẽ se̱.

¹¹ [17.] Mei ni tſaä gbogbo le̱ ke̱ mei ní tĕreo̱ dšatšuĩ le̱ ke̱ mei ni tĕreo̱ame̱ le̱, mofẽmo ke̱ enine kome mĩtšu nii, bĕle̱ eke̱ ekome hũ hĩe tawūnii.

¹² [18.] Ni tšũmălo̱i le̱, mofẽmo klante ṅmõ ehe, ni ame̱ke̱-māa; ni te̱tre̱mantre̱kpălo̱ le̱ ye̱ mimase̱i.

¹³ [19.] Ni mikē̱ abladei le̱ ke̱ no̱yelo̱i le̱ ke̱ maṅ ní eſe̱ le̱ ake̱: Nitšumo̱ le̱ da ni efá, ni wo̱mli kã ye̱ gbogbo le̱ no̱, mo ke̱ enanyo teṅ dšeke̱.

¹⁴ [20.] Nohewo̱ le̱ hefẽhe ní nyeanu te̱tre̱mantre̱ gbē̱mo̱ ye̱ le̱, nyebuaä nyehe nā ke̱-baã wo̱ṅõ ye̱ dše̱i; wo̱-Nyoṅmo̱ le̱ aawu ahãwo̱!

¹⁵ [21.] Bo̱ni wo̱tšuo̱ nii le̱ ne̱. Ni mei le̱ fã hĩeo̱ akplo̱i ke̱-dše̱o̱ hũlũ šitē ke̱-yašio̱ beyino̱ ní ṅulamii pueo̱.

¹⁶ [22.] Asaṅ nakai be le̱ mli noṅṅ le̱ mikē̱ maṅbii le̱ ake̱: Mofẽmo ke̱ ewebii awo̱ Ierusalem, koni ame̱bu wo̱he nyõṅ, ní ſane ní ame̱tšu nii.

¹⁷ [23.] Ši mi ke̱ minyemimei ke̱ miwebii le̱ ke̱ hebulo̱i ní yo̱ mise̱ le̱, wo̱ le̱ wo̱dšiee wo̱tadei, mofẽmo tawūnii ye̱ emase̱i.